Banorët e 'Unazës së Re' kanë dalë sërish për të prostetuar këtë të enjte përpara Bashkisë së Tiranës, ndaj shembjes së banesave të tyre që preken nga projekti i 'Unazës së Madhe'.
Paralelisht me mbledhjen e Këshillit Bashkiak të Tiranës, banorët kanë vendosur të shfaqen përpara Bashkisë së Tiranës me një pankart gjigante ku shkruhet “Mashtrim”. Ata janë shfaqur edhe më një sërë pankartash të tjera, në të cilat shkruhet: “Duam pronat tona”, “Ku je fshehur kryeministër”, etj.
Situata ka përvijuar më tej, pasi banorët kanë sulmuar Bashkinë e Tiranës me tymuese dhe vezë, si dhe kanë qëlluar edhe gazetarët teksa tentojnë të hyjnë me forcë në Bashkinë e Tiranës. Në tentativa e sipër, banorët e 'Unazës së Re' kanë lënduar edhe një polic bashkiak, i cili po kryente detyrën e tij.
Banorët e 'Unazës së Re' brohorasin të revoltuar se nuk janë shpellarë, por qytetarë. Reagimi i tyre ka ardhur si pasojë e një fjalimi që ka mbajtur dje kryetari i Bashkisë së Tiranës, Erion Veliaj, në të cilin ka përmendur fjalën shpellar, duke iu referuar kështu banorëve që kundërshtojnë projektin e “Unazës së Madhe”.