2-vjetori i Shenjtërimit të Nënë Terezës

Ora 08:15 - Presidenti Meta: Të ruajmë si sytë e ballit bashkëjetesën dhe harmoninë e pashembullt fetare

Dita e sotme shënon 2 vjetorin e Shenjtërimit të Nënë Terezës nga Papa Françesku në Shtator 2016.

Presidenti i vendit Meta reagoi përmes një mesazhi të shpërndarë nga Institucioni i Presidencës.

Meta shprehet se  “Dita e sotme është një ditë feste, përkujtimi e respekti mbarëkombëtar ndaj veprës humane, hyjnore e të paharruar të Shenjtores sonë”.

Meta vijon duke thënë se: “E bekuara dhe e Shenjta Nënë Terezë, me veprën e saj na fton të ruajmë si sytë e ballit bashkëjetesën dhe harmoninë e pashembullt fetare që kombi ynë ka kultivuar e përsosur ndër shekuj. Me mesazhin e saj nuk duhet të harrojmë se i përkasim njëri-tjetrit”

“Jo të gjithë ne mund të bëjmë gjëra të mëdha, por secili nga ne mund të bëjë gjëra të vogla me dashuri të madhe”. – përfundon Meta.

Ora 08:20 - Kryeministri Rama: "Më mirë të ndezësh një qiri, sesa të mallkosh errësirën"

"Në këtë ditë të bekuar të Nënë Terezës, e para fjalë që kujtoj prej saj është fjala që më ndihmon shpesh në të përpjetat e të tatëpjetat e rrugës sime". - Me këtë fjali nis postimi i Kryeministri Rama në mesazhin përkujtues për Nënë Terezën. 

Postimi në Facebook i Ramës vijon me shprehjen: "Më mirë të ndezësh një qiri, sesa të mallkosh errësirën".

Postimi i Ramës në Facebook i shoqëruar me një video të një familjeje në nevojë të cilën kryeministri e ka ndihmuar

Ora 12:00 - Kreu i Kishës Katolike apel kundër krimit: Politika ndryshon strukturat, kurse besimi zemrat

Kreu i Kishës Katolike, Imzot George Frendo, në një intervistë për Report TV ka apeluar për më shumë shpresë, paqe dhe dashuri.

Imzot George Frendo, ka kujtuar rolin dhe veprën e Nënë Terezës në jetën e çdo shqiptari dhe gjithë botës. Imzot George Frendo, u ndal dhe tek çështja e kriminalitetit në qytetin e Shkodrës. Ai iu bëri thirrje qytetarëve dhe politikës, që të kuptojnë rolin e besimit, që sipas tij, ka fuqinë të ndryshojë zemrat.

“Është ditë jo vetëm për katolikët, por për të gjithë shqiptarët. Vlera e saj nuk vetëm për shqiptarët, por për të gjithë botën.”-thotë Imzot George Frendo.

Ora 13:00 - Kur Nënë Tereza vizitonte Shtëpinë e Bardhë, Ambasada e SHBA kujton takimin e shenjtores shqiptare me presidentin Reagan 

Ambasada Amerikane në Tiranë ka postuar në faqen në Facebook një foto të Nënë Terezës me presidentin e 40-të të SHBA Ronald Reagan në Shtëpinë e Bardhë. Bamirësja shqiptare ka vizituar Zyrën Ovale në vitin 1986 ku është pritur në takim nga Reagan. Në foto duket Nënë Tereza duke qeshur me presidentin e asaj kohe.

Ora 17:00 – Erion Veliaj: Qendra sociale tek Bregu i Lumit do quhet “Gonxhe Bojaxhi”

Në përvjetorin e dytë të Shënjtërimit të Nënë Terezës edhe kreu i Bashkisë Tiranë Erion Veliaj ka bërë një postim në Twitter.

Veliaj shkruan se: “Qendra sociale tek Bregu i Lumit do quhet “Gonxhe Bojaxhi”.

"Bashkia e përkujtoi Nënë Terezën me punë në komunitet, zgjodhëm mensat sociale të qytetit për të shërbyer drekën e për të kaluar kohë me fëmijët”. – përfundon postimi i Veliaj

4 Shtator 2016 - Papa Françesku shenjtëron Nënë Terezën 

Papa Françesku shpalli Shenjtore Nënë Terezën nga Bazilika e Shën Pjetrit në Vatikan. 

Mbi 100 mijë njerëz ndodheshin në sheshin e Vatikanit kur Papa lexoi formulën e shenjtërimit, duke e shpallur kështu Nënë Terezën Shenjtore.

Me shenjtërimin, Nënë Terezës iu njohën dy mrekulli, ajo është lutur për një burrë brazilian me tumor në tru, lutjet e saj plot dashuri e shëruan atë, ka raportuar një nga gazetat lokale.

Bamirësja shqiptare “u lumturua” në Tetor të vitit 2003, nga Papa Gjon Pali II. Ai miratoi mrekullinë e parë pas vdekjes së saj në 5 shtator 1997. Një grua 30-vjeçare në Kalkuta tha se ajo u shërua nga një tumor në stomak pas lutjeve të Nënë Terezës.