Alban Hoxha nesër para Gjykatës, portieri i Partizanit rrezikon deri në 6 muaj burg

Alban Hoxha dhe klubi i Partizanit do të presin nesër me ankth vendimin e gjykatës për portierin 31-vjeçar. Hoxha pritet të njihet nesër me masën e sigurisë për shkak se në orët e para të mëngjesit të ditës së dielë u arrestua në flagrancë nga policia e Tiranës pasi drejtonte automjetin në gjendje të dehur. Futbollisti kishte konsumuar alkool mbi normat e lejuara dhe në testet e kryera rezultoi të ishte në masën 0.51 mg/l. 

Kapiteni i Partizanit më herët të premten nuk ishte në fushë kundër Flamurtarit për shkak dëmtimi. Ai u lëndua me Kombëtaren dhe nga kampi i kuq shpresohej të ishte i gatshëm për ndeshjen e kësaj jave që është derbi me Tiranën.

Duke parë rrethanat kjo do të jetë e vështirë pasi Alban Hoxha rrezikon jo pak. Në bazë të nenit 291 të kodit penal mbi të cilin u arrestua futbollisti thuhet se: “Drejtimi i automjeteve apo mjeteve të tjera të motorizuara në gjendje të dehur apo pa dëshminë përkatëse të aftësisë, përbën kundërvajtje penale dhe dënohet me gjobë ose me burgim gjer në gjashtë muaj.”

Në rastin më të mirë Hoxha të martën mund të lirohet me kusht, por do të jetë mbrapa me përgatitjet.

TAG:
• arrestim
• Alban Hoxha
• masa e sigurise