Ahmetaj: Rrisim buxhetin me 11% për bashkitë/ Replikon Xhelal Mziu: Kamza u diskriminua

Pushteti vendor ne vitin 2019 do të ketë një rritje të buxhetit me 11%. Ka qenë kjo ajo që ka premtuar Ministri i Financave Arben Ahmetaj gjatë diskutimeve në  Këshillin Konsultativ  për buxhetin 2019 të pushtetit vendor për  vitin e ardhshëm.  Ahmetaj shtoi se vëmendja është tek taksa e pronës, kjo me qëllim regjistrimin dhe taksimin e drejtë mbi bazën e sipërfaqes dhe jo në mënyrë të çrregullt siç ka ndodhur deri më tani.

“Taksa mbi pronat është burim i rëndësishëm për buxhetet tuaja. E ndërsa deri tani ka qenë larg përgjegjësisë suaj, tani është e juaja. Nëse janë sot 600 mijë prona të detajuara do të duhen edhe 600 mijë të tjera që të detajohen, që të mos i taksoni qytetarët me një nivel metri standard, pasi mund ti bëni dëm buxhetit dhe qytetarit. Decentralizimi është shumë i rëndësishëm” tha ministri. Ahmetaj përsëriti faktin se pushteti vendor e ka për detyrë ligjore për të përditësuar të dhënat në platformë për çdo ditë dhe nëse ndodh e kundërta, ata do të mbajnë përgjegjësi ligjore.

Pjesë e takimit ishte edhe kryebashkiaku i Kamzës, Xhelal Mziu i cili akuzoi pushtetin qendror për diskriminim të bashkive që drejtohen nga përfaqësuesit e zgjedhur nga opozita. Referuar bashkisë që drejton ai tha se ‘Bashkia Kamëz ka marrë zero lekë për mirëmbajtjen e rrugëve, zero lekë për shërbim zjarrfikës, por edhe për pyjet”. Por Ahmetaj reagoi duke thënë se ‘Bashkia Kamëz e ka 7 për qind rritjen e fondeve grand. Pra, jemi në rritje të konsiderueshme. Kjo tryeze nuk i shmanget politizimit”.

/r.k./Shqiptarja.com

TAG:
• Bashkia Kamez
• arben ahmetaj
• xhelal mziu
• buxheti i shtetit