Autizmi vërtet nuk zgjedh. Urmete Gjypi, nëna nga Durrësi nuk e mendonte kurrë që kjo gjë mund ti ndodhte dhe asaj. Ajo ka tre fëmijë. Dy djem e një vajzë. Më i vogli Alessio është diagnostikuar para 3 vitesh me autizëm.
“Oh, vumë re që nuk donte të rrinte me fëmijët e tjerë bashkë, se kam dy fëmijë të tjerë. Ikte dhe fshihej pas derës, ose dilte jashtë. Nuk ishte që.. folte. Djali im pat fol. E la të folurën, i harroi fjalët. Kishte shumë gjëra ndryshe nga fëmijët e tjerë që kisha rritur. Thashë ky fëmijë do ketë diçka. Arrita e çova, e vizitova, e çova te 9-katëshet te një mjek psikiatër. Ai tha: për mendimin tim, ka qeliza autike”, tregon Urmetja.
Pas kësaj, Urmetja u drejtua te qendra e mirërritjes së fëmijëve të prekur nga autizmi.
“Kam vazhduar terapi zhvillimi, një herë në gjashtë javë, dy javë. Nuk i kam ndërprerë absolutisht, as kopshtin që ëshjtë këtu në qendër, as terapitë e zhvillimit siç është rregulli. Për mendimin tim për fëmijën tim po flas, unë kam dëshirë që ta çoj për parashkollor dhe ta çoj në shkollë. Unë jam shumë e kënaqur. Djali im nuk ka shumë diferencë me fëmijët normalë”, vijon Urmetja.
Në ditën botërore të autizmit Ministrja e shëndettësisë Ogerta manastirliu vizitoi qendrën. Prej aty, premtoi investime për vitin 2018
“Ne kemi vendosur që me buxhetin e vitit 2018, kjo qendër të investohet, të investojmë me një rehabilitim të kësaj qendre, duke i kushtuar më shumë vëmendje disa protokolleve europiane të trajtimit, edhe nëpërmjet ndryshimeve që do të sjellim këtu”, u shpreh ministrja.
Teksa rastet shtohen dhe prindërit mundohen të gjejnë forcë, mjekët neuropediatër japin kurajo
“Të mos dorëzohen asnjëherë dhe të punojnë sa më shumë me fëmijën e tyre, sepse duket ndonjëherë sikur nuk funksionon terapia, por arrin një moment që fëmija fillon të ndryshojë”, thotë Migena Kika.