Ditën e sotme, do të mbahen zgjedhjet për kreun e Forumit të Gruas në Partinë Socialiste. Në garë për degën e Tiranës janë katër zonja; Etilda Muhaj, Klodeta Dibra, Voltiza Prendi dhe Zana Sina. Ky proces do të zhvillohet nën parimin 1 anëtar 1 votë. Pjesëmarrja është objektivi kryesor i këtyre zgjedhjeve, si rrjedhojë e fushatës “Partia Socialiste e Hapur për Ty”. Të katërta zonjat vijnë në këtë garë me një kontribut të pasur në jetën e Partisë Socialiste. Një prej kandidateve Zana Sina ish-kryetarja e njësisë së Farkës, shprehet se ndërmori këtë hap sepse beson se pavarësisht përfaqësimit mjaft të mirë që gratë kanë në rradhët e PS-së, ajo beson se kanë mundësi për një përfaqësim edhe më të mirë. “Me garën e hapur për kryetaren e gruas socialiste të Tiranës, mendova se ishte momenti i duhur për të dhënë një kontribut të mirë e domethënës për qytetin tim.
Pavarësisht se kryetari që udhëheq sot PS-në i ka dhënë një vizion të ri e fokus të veçantë gruas, jemi ende në një botë maskile të cilën është shumë e vështirë ta çash, dhe të ecësh. Kisha kohë qe mendoja se duhej një platformë më e fuqishme e se pavarësisht punës së madhe që është bërë, forumi i gruas socialiste ka nevojë jo vetem për kaq, por edhe për një organizim politik më specifik që të përfshijë gratë në çdo interes që ato shfaqin; e vetëm kështu do mund të kemi një përfaqësim dinjitoz të gruas, e cila zë jo 20, as 30, por 50% të shoqërisë, pra i tillë duhet të jetë përfaqësimi dhe vendimmarrja e tyre në çdo fushë të jetës”, shprehet Zana Sina. Ajo e ka paraqitur tashmë një platformë e cila beson se do jetë e gjitha në shërbim të gruas. Zana Sina e cila pas studimeve në Itali, është rikthyer në Shqipëri me dëshirën për të dhënë kontributin e saj në jetën sociale e politike të vendit beson tek ndryshimi.
“Kam punuar si ekonomiste sapo dola nga bankat e shkollës e më pas kam vazhduar studimet duke punuar jashtë vendit, në Itali dhe në vitin 2009 jam kthyer në Shqipëri me dëshirën e madhe për të dhënë sadopak ndihmën time në të mirën e vendit tim. U riktheva se doja të kontribuoja në vendin tim, gjithmonë kam dashur të kthehem në vendin tim, të punoj e jetoj këtu. Më pëlqen politika, ajo që u vjen në ndihmë njerëzve. Nisem gjithmonë nga parimi se "Mendimet bëhen veprime", nëse ne i mbështesim ato; ndaj ajo platformë gjjthëpërfshirëse që kam hartuar, mendoj se i përshtatet shumë mirë situatës dhe patjetër që do të jetë një frymëzim i ri në këtë aspect” shprhet Zana Sina.
Vajza e pilotit që uli avionin pa rrota në 1967
Zana Sina është vajza e një personazhi mjaft të njohur e pilotit legjendar, Bilal Sina. Babai I saj njihet si piloti që “tmerroi vdekjen” pasi më 18 mars të vitit 1967 teksa kryente detyrën luftarake dhe avioni i pësoi defekt në motor ai nuk pranoi të hidhej me parashutë, por arrit që për mrekulli ta ulte avionin në Kuçovë.
