POP 5

Lajmet më të lexuara të 5 minutave të fundit

Televizioni më i madh kinez reportazh për Shqipërinë: Bunk’art, një nga atraksionet më të vizituara

Heqja e vizave me shtetin kinez ka rritur numrin e turistëve kinezë në vendin tonë përgjatë këtij sezoni turistik. Televizioni më i madh në Kinë, CGTN ka përgatitur një reportazh për Shqipërinë ku thekson se një nga atraksionet më të vizituara është Bunk’art.

Televizioni vë në dukje se trashëgimia historike dhe kulturore është një nga arsyet pse ky bunker është i preferuari i turistëve.

"Shqipëria po përpiqet të përfitojë nëpërmjet trashëgimisë së saj kulturore dhe kuzhinës për të tërhequr turistë. Nën rrugët e Tiranës, në qendër të qytetit është një labirint i bunkerëve nëntokësorë që tani është e hapur për turistët”- thekson televizioni kinez.

“Ne jemi duke punuar shumë fort që të krijojmë një paketë të re me një ofertë të trashëgimisë kulturore dhe kulinarisë dhe po promovojmë agroturizmin më shumë se çdo gjë tjetër në vendin tonë”- tha ministri i Turizmit dhe Mjedisit, Blendi Klosi në intervistën dhënë për televizionin CGTN.

Televizioni më i ndjekur në Kinë thekson se Shqipëria ëshë krenare për traditën e kulinarisë duke sjellë shembullin pêrmes gatimeve vendase. Televizioni kinez rendit gjithashtu atraksionet më të mëdha turistike në vendin tonë. Vendi i parë më i vizituar nga turistët kineze është Bunk'art, muzeu i komunizmit në Shqipëri kjo për shkak edhe të lidhjeve historike. 

Qeveria shqiptare vendosi heqjen e vizave turistët nga Kina për periudhen 1 prill deri në 31 tetor 2018. Heqja e vizave me Kinën për 8 muaj në vit nga qeveria shqiptare ka dhënë rezultatet e para. Numri i turistëve nga Kina drejt Shqipërisë është shumëfishuar krahasuar me një vit më parë. Falë heqjes së vizave, Kina u rendit me shpejtësi në 5 vendet me më shumë vizitorë në Shqipëri

f.g./b.ha.
Komento