Kërkon rigjykim/ Haxhia: Fatmira Hajdari shiti gjakun e burrit për t’u bërë gjyqtare, Apeli i lidhur me Berishën e Metën

TIRANE-Shtyhet sërish seanca për kërkesën e Izet Haxhisë për rigjykim për dosjen "Azem Hajdari". Shkak i shtyrjes ishte kërkesa e Haxhisë dhe avokatit të tij për përjashtimin e trupit gjykues që përbëhet nga; Valdete Hoxha relatore, Astrit Haxhialushi, Genti Shala. Ish-bodigardi i Berishës është shprehur në gjykatë seancën e sotme se kërkon një trupë gjykuese që të ketë kaluar vettingun dhe se nuk pranon që ta gjykojnë kolegët e Fatmira Hajdarit.

“Dua të gjykohem nga gjykatës që kanë kaluar vettingun” tha ai, raporton gazetari Arsen Rusta, ndërsa në seancë nuk u lejuan mediat. Gjithashtu Haxhia ka lëshuar akuza të forta edhe në drejtim të gruas së Azem Hajdarit. Ai tha se “Nuk mund të pranoj të gjykohem nga ju, në korridoret e kësaj gjykate endet gjysma e familjes Hajdari, Fatmira shiti gjakun e Azemit për tu bërë gjyqtare, ju jeni gjyqtarë të paktit Berisha-Meta, ndaj kërkoj një trupë gjyqtarësh që më parë kanë kaluar vetingun”.

Ndërsa avokati i Haxhisë, Bashkim Nikolla sqaroi se çfarë do të ndodhë nëse nuk pranohet kërkesa. “Kjo është kërkesë e klientit tim dhe plotësisht e përligjur, pasi janë me detaje shkaqet përse duhet të jetë nga vettingu. Një nga shkaqet janë sepse e gjithë kjo trupë që ka mbetur pas vetingut është krijesë e politikës shqiptare, edhe procesi ka shumë ngjyrime dhe rryma të forta politike. Nëse kërkesa nuk pranohet do bëjmë ankime në institucione të tjera të drejtësisë dhe deri më tutje” tha ai.

Seanca e sotme ishte thirrur nga vetë Izet Haxhiaj, i cili pasi fitoi të drejtën për rivendosje në afat ju drejtua Apelit me kërkesë për rihapjen e dosjes “Hajdari”. Seanca u shty pa afat deri sa një trupë gjykuese të shqyrtojë kërkesën e Haxhisë dhe avokatit të tij për t’u gjykuar nga një trupë e cila sipas tyre ka kaluar më parë vetingun. Ndërkohë prokuroria e përfaqësuar nga prokurorja Fatjona Memcaj kërkoi në Apel që të rrëzohet kërkesa e Haxhisë dhe gjykimi të zhvillohej pasi nuk kishte asnjë pengesë ligjore.

Tashmë pritet vendimi për trupën gjykuese. Më parë kanë qenë vetë gjyqtarët që kanë kërkuar që të mos e gjykojnë këtë dosje, por drejtuesi i Apelit Hysni Demiraj ka refuzuar. Izet Haxhia, i dënuar me 25 vite burg si bashkëpunëtor në vrasjen e Azem Hajdarit, kërkon rigjykim pasi pretendon se i janë shkelur të drejtat në një gjykim i cili është zhvilluar në mungesë dhe sipas tij, pa prova. Izet Haxhia u ekstradua nga Turqia në Shqipëri në maj të këtij viti për t'u përballur me dënimin çerekshekullor dhe akuzat e drejtësisë shqiptare për "vrasjen e shekullit".

Izet Haxhia u arrestua në vitin 2006 në Turqi, por drejtësia turke nuk ishte shprehur ende për ekstradimin e tij, ndonëse pala shqiptare kishte bërë kërkesa të vazhdueshme në kohën kur në pushtet ishte Sali Berisha. Për 12 vjet me radhë gjykata turke kishte urdhëruar thjesht që ai të mos largohej jashtë vendit, ndërsa në shkurt të këtij viti befas u mor vendimi që ai të ekstradohet.

Vetë ish-kryeministri Sali Berisha e ka cilësuar ish-njeriun e tij të besuar se është ai vrasësi i Azem Hajdarit, sëbashku me Fatmir Haklajn dhe Jaho Mulosmanin. Ndërsa nga ana tjetër, Izet Haxhia kërkon të zbulohet personi që nxori Azem Hajdarin nga selia e PD mbrëmjen e 12 shtator, duke hedhur dyshime të forta te ish-kryetari i PD, Sali Berisha.

/r.k./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sifi: 21/11/2018 15:42

    Kerkesa e Haxhise per ndryshim te trupit gjykues eshte e drejte . Te gjithe prokuriret dhd gjykatesit qe kalojne procesin e vetingut kane besushmeri te madhe per cdo te denuar si dhe per familjet e viktimave . Politizimi i sistemit te drejtesise ne keto 28 vjet eshte krimi me i nadh qe i eshte bere demokracise shqiptare

    Përgjigju
  • Sondazhi i ditës:

    Mendoni se komisionet hetimore për Shëndetësinë e TIMS do kenë rezultat?



×

Lajmi i fundit

Arsimi profesional, të ftuarit të ‘Përballje’: Të rinjtë e zgjedhin që të ikin nga Shqipëria, qeveria t’u garantojë punësim e paga dinjitoze

Arsimi profesional, të ftuarit të ‘Përballje’: Të rinjtë e zgjedhin që të ikin nga Shqipëria, qeveria t’u garantojë punësim e paga dinjitoze