POP 5

Lajmet më të lexuara të 5 minutave të fundit

Koncepti i atdheut në diasporën post-komuniste në arte, piktori Vaqarri sjell gjurmët e vendit në imazhe

Investigimi i konceptit të “atdheut”, si një aspekt i identitetit në diasporën post-komuniste shqiptare, përmes hulumtimit të bazuar në art është tema e doktoraturës së kritikut të artit Dashamir Vaqarri. 

Për kamerën e “Report tv” piktori Dashamir Vaqarri rrëfen se një doktoraturë e tillë jo vetëm që aplikohet për herë të parë nga një shqiptar në Universitetin e Darbit në Angli, por nuk ekziston as në vendet e tjera të Komitetit Europian dhe pjesët e tjera të Europës. 

Një doktoraturë e tillë në arte të bukura nuk ekziston në vendet e Komitetit Europian, qoftë edhe në vendet e tjera të Europës. Aplikimi i parë i kësaj lloj doktorature është aplikuar në Australi në vitin 1982, në shkrimin kreativ nga Greim Harper. Më vonë Këshilli për arte edhe hulmutime në Britaninë e Madhe vendosi që të aplikojë gjithashtu në formë performance ose instalacioni, ose skulpturë ose pikturë, e ndau në dy grupe; hulumtime bazuar në praktikë edhe hulumtime bazuar në stilet e praktikës.

Dashamir Vaqarri, piktor edhe kritik arti

Për temën e trans-nacionalizmit dhe konceptin e shtëpisë është hulumtuar në literaturën teorike, por shpesh mungojnë emocionet dhe introspekti, prandaj artisti shqiptar Dashamir Vaqarri ka zgjedhur, që të hulumtojë këto aspekte në studimin e tij të doktoraturës, duke e interpretuar vizualisht ndërmjet artit.  Prandaj studimi i artistit ndalet tek Anglia dhe Gjermania, dy vende në të cilat shqiptarët kanë emigruar, por edhe për shkak të eksperiencës personale që ai ka. 

Intervista e plotë

Mendova që të fokusohem për doktoraturën në temën e emigracionit, sepse është akoma aktual. Unë kam një eksperiencë personale. Në vitin 2000 jam larguar në Gjermani. Edhe është një temë aktuale edhe sot, jo nga ana ime emocionale, por është një nevojë për të hulumtuar më tepër. Shqiptarët edhe në periudha historike kanë një lloj eksperience shumë të hidhur, sepse jemi i vetmi komb, duke u krahasuar me italianët, që nuk e kemi lënë vendin tonë me dëshirë tonë, por për shkaqe ekonomike apo edhe fetare, që në kohën e Skënderbeut. Por unë jam fokusuar pas rënies së komunizmit, ku luhej me shqiptarët edhe me çështjen e identitetit. Ne erdhëm pas një zhgënjimi ndaj kohës që jetuam. Si e konceptojnë këta njerëz shtëpinë? Ky emigrim të çon rreth humbjes së shtëpisë. E shohin si një aspekt transnacionalizmi, ku njeriu mban lidhjen edhe me vendin e origjinës edhe pritës, ose si një humbje e shtëpisë, se nuk i mban më lidhjet me vendin e origjinës, por edhe në vendin pritës ndihesh i huaj.

Dashamir Vaqarri, piktor edhe kritik arti

Dashamir Vaqarri ka ekspozuar në një sërë ekspozitash në vende të ndryshme të botës, si tali, Japoni,Francë, Gjermani, Ceki dhe Angli. Aktualisht jep mësim në Shkollën e Lartë Popullore të Regensburgut.

a.me./b.ha.
Komento