Nis gjyqi për vrasjen e gazetarit Jamal Khashoggi, prokuroria kërkon 5 dënime me vdekje

Ka nisur gjyqi i 11 individëve të dyshuar për vrasjen e gazetarit saudit Jamal Khashoggi. Sipas CNN, lajmi u bë i ditur nga vetë media shtetërore saudite. Prokurorët kanë kërkuar dënimin me vdekje për pesë nga të pandehurit.  Khashoggi, një kritik i njohur i qeverisë saudite, u vra pasi hyri në konsullatën saudite në Stamboll të Turqisë më 2 Tetor të vitit të kaluar.

Arabia Saudite refuzoi më herët kërkesën e Turqisë për ekstradimin e 18 të dyshuarve, duke përfshirë dhe 15 agjentë të dyshuar se fluturuan për në Stamboll për të kryer vrasjen. Mediat shtetërore nuk dhanë informacione të tjera, përveçse njoftuan për nisjen e seancës duke thënë se 11 të pandehurit shoqëroheshin edhe nga avokatët e tyre.

Në nëntor, zëvendës Prokurori Shalaan bin Rajih Shalaan tha se hetuesit kishin arritur në përfundimin se një oficer i inteligjencës urdhëroi vrasjen e Khashoggit duke aplikuar një injeksion vdekjeprurës brenda konsullatës. Ai shtoi se “trupi i Khashoggi u copëtua brenda në ndërtesë dhe pjesët e tij u dorëzuan tek një bashkëpunëtor që priste jashtë saj.”

TAG:
• Jamal Khashoggi