Paketa, Rama: Në 25 vende të BE shpifja dënohet me burg, në Shqipëri vetëm gjobë

TIRANE-Kryeministri Edi Rama ka postuar sërish një status në rrjetet sociale për paketën antishpifje. Shefi i qeverisë shprehet se në 25 vende të BE shpifja dënohet me burg, ndërsa në Shqipëri, thotë ai, do të dënohet vetëm me gjobë.

Shpifja dënohet me burg në 25 vende të BE!Gjysmagjelat tanë të majmur nga xhepat e nga trutë,që kanë bërë karriera politike e mediatike duke sharë e akuzuar pa prova,s'meritojnë as 1 supë burgu!Ata thjesht do të paguajnë gjobën e ndotjes për çdo fëlliqësi që u jashtënxjerr goja

Edi Rama

Përpara se të sjellë në Kuvend ndryshimet ligjore për paketën Anti-Shpifje, Edi Rama e ka nisur punën. Të hënën, në mbledhjen e zgjeruar të Grupit Parlamentar do të prezantohet nisma “ÇDO SHPIFJE NË FONDIN E EDUKIMIT”.

Paratë që socialistët do të fitojnë nga gjyqet e shpifjes, do të grumbullohen në Partinë Socialiste ku do të ngrihet menjëherë Departamenti Antishpifje, i cili do të koordinojë dhe ndjekë ecurinë e betejës ligjore kundër Shpifjes.

Sipas idesë paraprake të Ramës, Fondi i Edukimit do të ketë një bord drejtues, i cili do të trajtojë propozimet e lartpërmendura si dhe do të jetë e vetmja instancë që mund të vendosë tërheqjen nga një proces gjyqësor për shpifje.

Për opozitën kjo është një strategji e Ramës për të larguar vëmendjen nga aktualiteti, pasi i pari që sipas tyre duhet të dënohet është vetë kryeministri.

TAG:
• edi rama
• paketa antishpifje