Mjetet e Inspektoriatit të Mbrojtjes së Territorit po vijojnë me shembjen e godinave pa leje tek zona e “Astirit”, për t’i hapur rrugë projektit të “Unazës së Madhe”. Bashkia e Tiranës ka bërë me dije se prishjet e objekteve përgjatë lotit 2 dhe 3 të "Unazës së Madhe" kanë ardhur pas lirimit vullnetar dhe largimit të orendive. Mjetet e IMT-së kanë vijuar gjithashtu edhe me evadimin e mbetjeve inerte.
Bashkia e Tiranës ka ofruar për të gjithë ata që kanë ndërtuar pa leje në zonën ku do të kalojë gjurma e “Unazës së Madhe”, banesa sociale komode, të mobiluara dhe me të gjitha pajisjet e nevojshme shtëpiake. Ndërkohë, për të gjitha familjet e tjera që parapëlqejnë një zgjidhje tjetër, Bashkia e Tiranës ka vënë në dispozicion edhe bonusin e qirasë për 3 vite. Ata mund ta zgjedhin vetë shtëpinë ku duan të banojnë dhe qiraja u paguhet nga Bashkia.
ARRSH, ALUIZNI, Zyra e Regjistrimit të Pasurive të Paluajtshme, IKMT dhe Bashkia Tiranë përmbyllën mëngjesin e sotëm fazën finale të konstatimit në terren të objekteve që preken nga projekti i rehabilitimit të "Unazës së Madhe" të Tiranës (segmenti Pallati me Shigjeta - Sheshi Shqiponja) dhe statusit të tyre ligjor nga ana e dokumentacionit. Në përfundimit të vlerësimit, rezultoi se numri total i objekteve që do të preken nga projekti është 195, ku 71 prej tyre rezultojnë me dokumente pronësie ndërsa 124 objekte pa dokumente e kërkuara.(Lexo këtu)
