Rama ironizoi 'bardhezi' Berishën dhe Bashën, deputeti demokrat: Politika e kukullave, tendencë fshehje nga realiteti

Deputeti i Partisë Demokratike, Tritan Shehu ka reaguar në lidhje me videomontazhin që kryeministri Edi Rama postoi sot në rrjetin social “Instagram”, ku ironizohet marrëdhënia e ngushtë e ish-kryeministrit Sali Berisha me kreun e Partisë Demokratike Lulzim Basha.

Përmes një postimi në “Facebook”, Shehu i kundërvihet kreut të ekzekutivit duke i thënë që të bëhet serioz dhe të heqë dorë nga shfaqjet qesharake. Deputeti demokrat i bën thirrje që të prezantojë një strategji, qoftë dhe të vetme, si dhe t’i përgjigjet me seriozitet e përgjegjësi kritikave dhe alternativave.

Shehu e konsideron politikën e “kukullave” si një tendencë për t'u fshehur nga realiteti dhe gabim të rëndë të kryeministrit, që nuk bën asgjë tjetër përveçse “trondit në themel interesat më të rëndësishme të vendit e kombit”.

Politika e “kukullave” e Kryeministrit shpreh shterpësi argumentash e tendencë fshehje nga realiteti, si struci!
Z. Kryeminister, politika dhe ballafaqimi në atë nuk bëhen me video qesharake si kjo e sotmja, që në vazhdim po publikoni.
Në asnjë shoqëri të civilizuar nuk kam konstatuar një fenomen të tillë, jo vetëm jo etik ky, por dhe që transmeton mungesë të plotë në ide e vizione reale. 
Bëhuni serioz Z.Kryeminister, lërini shfaqjet qesharake, prezantoni qoftë dhe një strategji të vetme, përgjigjuni me seriozitet e përgjegjësi kritikave e alternativave!
Në fakt edhe kur tentoni ta bëni këtë vecse gaboni rëndë, shumë rëndë, aq rëndë sa trondisni që në themel edhe interesat më të rëndësishme të vendit e kombit.

Tritan Shehu, Deputet i Partisë Demokratike

TAG:
• edi rama
• lulzim basha
• sali berisha
• TRITAN SHEHU