POP 5

Lajmet më të lexuara të 5 minutave të fundit

Të gatuajmë me Zonjën Vjollca/ Byrek me mish, qepë e domate dhe Supë me qiqra e perime

Receta e parë : Byrek me mish dhe qepë

Përbërësit :

1 pako peta

3 qepë të mëdha

500 gr mish i grirë

3 domatë (rreth 400 gr)

2 thelpinj hudhër

2 lugë gjelle oriz

1 lugë gjelle nenexhik i thatë

Vaj ulliri

Kripë dhe piper i zi

Përgatitja

Fillimisht qërojmë dhe presim qepën në kubikë dhe e kaurdisim atë me pak kripë deri sa qepa të mos ketë lagështirë. Shtojmë gjysëm luge gjelle vaj dhe e kaurdisim përsëri deri sa qepa të zverdhet. Shtojmë mishin , e kaurdisim së bashku me qepën deri sa mishi të marrë ngjyrë. Shtojmë domatet , orizin, piperin e zi, nenexhikun si dhe pak ujë dhe i lëmë deri sa të ziejë orizi.

Nëse duam që petët të mbeten të buta, rrahim një kokërr vezë me kripë dhe 2 filxhan kafeje vaj duke shtuar një gotë qumësht.

Lyejmë tepsinë me vaj dhe  vendosim petët duke i spërkatur ato në çdo dy petë.

Mbushjen mund ta vendosim në një shtresë të vetme në mes, por mund edhe ta shpërndajmë në çdo 4 petë nga pak, sipas preferencës tuaj.

Në fund kthejmë anët, i spërkatim mirë dhe i vendosim në furrë në temperaturën 200 gradë për 25 – 30 minuta.

E lëmë të ftohet dhe e servirim të shoqëruar me një supë, kos ose dhallë.

Receta e dytë : Supë me qiqra dhe perime

Përbërësit:

200 gr qiqra

300 gr pure domate

1 patate

2 karrota

2 speca të kuq

4 qepë të njoma

1 qepë e vogël

1 lugë çaji sheqer

Kripë dhe piper i zi

Përgatitja :

Në një tenxhere ngrohim 2 lugë gjelle vaj ulliri dhe 1 lugë gjelle gjalp. Kaurdisim mirë 1 qepë të vogël deri sa të zverdhet. Shtojmë një thelp hudhër  bashkë me purenë e domates dhe e lëmë të ziejë ( mund ë përdorim edhe domate të grirë në rende)

E lëmë domaten të ziejë duke shtuar 1 lugë çaji sheqer, kripë , lëng perimesh (ose lëng pule, ose ujë)

Sapo supa të ziejë shtojmë fillimisht perimet që duan më shumë kohë të ziejnë (patatet dhe karrotat). I lëmë të ziejnë 5 minuta dhe i përziejmë me qepët e njoma, specin, majdanozin, lengun e limonit. Provojmë për shije duke rregulluar me kripë dhe piper të zi. Shtojmë qiqrat dhe e lëmë supën të ziejë edhe 5 minuta dhe gjithçka është gati për tu sevirur.

Shënim : në një ditë të ftohtë kjo supë mund të përgatitet edhe me 300 gr fileto pule të prerë në kubik, duke e kaurdisur në fillim me qepë.

Ju bëftë mirë!

 

a.ko./b.ha.
Komento