Protesta tek Unaza e Re, banorët djegin goma e kazanë, vënë flakën edhe flamurit të 'Rilindjes', 20 të shoqëruar (VIDEO)

TIRANË- Banorët e "Astirit" po vijojnë protestën ndaj projektit të zgjerimit të “Unazës së Madhe". Ata janë shfaqur pasditen e kësaj të marte në zonën e "Astirit" me pankarta në duar, në të cilat lexohet "Kryeministër ku je fshehur?”, “Dy duar për një kokë”, “Duam pronat tona", e të revoltuar  për urdhrin e shembjes së shtëpive të tyre dhe duke brohoritur njëherazi, kanë djegur disa goma dhe kazanë si dhe i kanë vënë flakën edhe flamurit të 'Rilindjes'. 

Në mbështetje të banorëve kanë shkuar edhe deputetët demokratë Albana Vokshi, Klevis Balliu dhe Gent Strazimiri. Në përfundim të protestës, policia shoqëroi në komisariatin nr.6 në kryeqytet 20 banorë për bllokimin e rrugës dhe djegien e gomave.

Protestuesit janë shfaqur paraditen e sotme edhe përpara Bashkisë së Tiranës, në tentativa e sipër për të hyrë me forcë brenda saj. Të mbështetur edhe nga deputetët e opozitës, banorët e "Astirit" protestuan për rreth një orë. Banorët kërkojnë një takim me kryetarin e Bashkisë, Erion Veliaj që t'i presë për të diskutuar dhe për të gjetur një zgjidhje për banesat e tyre. Ndërkohë që kryetari i Bashkisë, Erion Veliaj, në mbledhjen e ditës së sotme të Këshillit Bashkiak ka thënë se projekti do të vazhdojë si edhe shtoi se kjo protestë është e sponsorizuar nga Partia Demokratike.

Veliaj sqaroi se shtëpitë që do të prishen pasi në masën më të madhe të tyre janë të palegalizuara, ndërsa shtoi se për këta banorë do të paguhet qiraja për 3 vite. 

Banorët e Astirit protestojnë prej 11 ditësh ndërtimin e Unazës së Madhe të Tiranës, pasi sipas tyre, shtëpitë e tyre po shemben padrejtësisht. Ata thonë se nuk janë njoftuar dhe kërkojnë dëmshpërblim.

Rendit zhvillimet sipas orarit:

Të Fundit Të Parat

//Shqiptarja.com

TAG:
• proteste
• unaza e re
• banoret e astirit