Fshehu provat për korrupsionin e gjyqtarit, dosja 'Thanza' rrezikon prokurorin Beluri

Pas seancës së Vettingut për gjyqtarin Admir Thanza, i cili rezultoi se kishte fshehur një dënim dhe kishte dyshime se ishte përfshirë në një vepër penale të korrupsionit në sitë kaloi dhe prokurori Kosta Beluri nga Prokuroria e Përgjithshme.

Beluri rezulton se në 2016 ka hetuar pikërisht një procedim, ku i përfshirë ishte dhe gjyqtari Thanza, i cili dyshohej se kishte marrë para nga bashkëshortja e një kreu hipoteke në Shkodër, i cili ishte në hetim.

Beluri, i cili kaloi pa problem testin e pasurisë dhe të pastërtisë së figurës, u përball me komisionin e Vettingut pikërisht me dosjen hetimore që ai kishte pushuar, ku i përfshirë ishte dhe gjyqtari Thanza.

Sipas hetimit të KPK-s, çështja që kishte pushuar Beluri nisi me hetimin dhe vendosjen nën masë sigurie për veprat penale të “shpërdorimit të detyrës” dhe “kallëzimit të rremë” të drejtorit të Zyrës së Regjistrimit të Pasurive të Paluajtshme në Shkodër. Bashkëshortja e këtij të fundit, noterja me inicialet L.H. shfrytëzoi lidhjet e saj me njerëz të sistemit të drejtësisë për të shmangur arrestimin e të shoqit.

Duke iu referuar materialeve të dosjes, relatorja Bekteshi shpjegoi se noterja L.H ishte mbajtur nën vëzhgim dhe filmuar nga Forca Operacionale e Policisë së Shtetit, teksa takohej me shtetasin G.B dhe gjyqtarin Admir Thanza. Në të dyja rastet, noterja është parë të shkëmbejë para. Prokuroria ka përgjuar gjithashtu një bisedë të dyshimtë telefonike pas takimit të noteres me gjyqtarin Thanza.

Biseda e kryer mes një personi të vetëquajtur Maurizio dhe një numri telefonik me 11 në fund, që u la të kuptohej se i përkiste ish-drejtorit nën akuzë të Hipotekës, rrotullohej rreth shprehjes: Pallati bënte 50 mijë euro!

Në kushtet kur një anëtar i Gjykatës së Lartë dyshohej për korrupsion, Prokuroria e Shkodrës shpalli moskompetencën dhe ia kaloi dosjen për hetime të mëtejshme Prokurorisë së Përgjithshme. Prokurori Beluri e regjistroi procedimin nr.3 më 3 mars 2016 dhe pas disa veprimesh hetimore vendosi pushimin e çështjes.

Por paçka këtyre fakteve, sipas KPK-s Beluri vendosi të pushojë hetimet dhe pse “nuk kishte kryer asnjë ballafaqim mes deklarimeve të noteres me inicialet L.H me personat e tjerë. Në këto kushte, biseda telefonike se vlera e pallatit ishte 50 mijë euro del e pakuptueshme”, shtoi realtorja Bekteshi.

I pranishëm në seancë dhe pa një avokat, prokurori Kostaq Beluri shpjegoi se dosjen e kishte marrë dy muaj pas ndjekjes së të dyshuarve në terren dhe se hetimet ishin kryer në shumicën e tyre nga Prokuroria e Shkodrës. Ai shtoi se në kushtet e pamundësisë së hetimeve proaktive, ai vlerësoi provat që ndodheshin në dosje.

“Elementi kryesor për sigurimin e provës në rastet e korrupsionit është hetimi proaktiv. Prokuroria e Shkodrës është përpjekur të bëjë hetim proaktiv, por në fund ajo dhe Policia kanë vendosur të mos ndërhyjnë në kushtet e flagrancës”, tha Beluri.

Shpjegimet e Belurit nuk e bindën anëtarin Lulzim Hamitaj, i cili adresoi tre pyetje që lidheshin me hetimet proaktive, me dyshimet që binin mbi gjyqtarin Thanza dhe me mosadministrimin e një CD-je për këqyrje.

I pyetur indirekt nëse shprehja “Pallati bën 50 mijë euro” kishte lidhje me Thanzën, Beluri u përgjigj se: “Ajo telefonatë është përgjuar si pjesë e procedimit penal ndaj Sh.B [ish-kreu i Hipotekës Shkodër], kishte lidhje me atë shtetas dhe kam gjykuar se ishte pjesë e procedimit që prokuroria e Shkodrës po kryente kundër tij”.

Një tjetër çështje e ngritur nga Hamitaj lidhej me CD-në me pamjet e takimit mes noteres dhe shtetasit G.B, si dhe shumën e parave të shkëmbyera mes tyre. Sipas gjyqtarit, subjekti ishte mjaftuar vetëm me fotot e nxjerra nga CD-ja për të arritur në përfundime, ndërkohë që Beluri u përgjigj se kjo kishte qenë e panevojshme në kushtet kur të dy personazhet e kishin pranuar takimin dhe shkëmbimin e parave.

Gjykatësi Hamitaj e shoqëroi këtë përgjigje me komentin: “Mosmarrja e filmimit nga ana juaj lë për të dëshiruar”.

Beluri u pyet edhe nga vëzhguesi ndërkombëtar se pse nuk kishte ndërmarrë përgjime telefonike apo vëzhgime në terren për rastin. Ai u përgjigj se dy muaj pas episodit kjo ishte gjykuar e panevojshme, pasi nuk kishte më pritshmëri për korrupsion.

Vendimi për Belurin do të jepet të enjten më 12 korrik, ndërsa në përfundim të seancës, ai kërkoi rikonfirmim në detyrë.

/b.ha./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Mendoni se komisionet hetimore për Shëndetësinë e TIMS do kenë rezultat?



×

Lajmi i fundit

Shpërthen bombola e gazit, digjet apartamenti në Patos

Shpërthen bombola e gazit, digjet apartamenti në Patos