Autori i sulmit akuzohet për vrasjen e 10 personave dhe plagosjen e 15 të tjerëve. Me të i pranishëm në gjykatë ishte dhe babai i agresorit i cili u shpreh se ndihet shumë keq për veprimin e të birit që shkaktoi tmerr ne rrugët e Torontos.
Babai i shoferit vrasës, i cili la 10 të vdekur dhe 15 të plagosur, duke hyrë me automjet në një turmë këmbësorësh, kërkoi falje për djalin e tij pas daljes nga gjykata. Alek Minassian 25 vjeç, doli përpara gjykatës, ku u akuzua për vrasje të shkallës së parë dhe për 13 vrasje në tentativë.
Vahe Minassian, ishte ulur në rreshtin e parë, kur akuzat u lexuan kundër djalit të tij. Djali i tij u akuzua për këto vrasje makabëre ndërsa babai i autorit ishte i vetmi anëtar i familjes që erdhi në gjykatë, ndërsa nëna e të dyshuarit nuk ishte e pranishme. “Na vjen shumë keq” ishte fjala e tij para gazetarëve pas daljes nga gjykata.
Sipas nënës së tij Sona Minassian, ajo tregoi i biri kishte Sindromën e Aspergerit, një formë autizmi.
Ndërkohë, kryeministri kanadez Justin Trudeau u shpreh se autoritetet nuk shohin kërcënim të sigurisë kombëtare. Trudeau tha se Kanadaja do të bëjë gjithçka që mundet për t'i mbajtur qytetarët e saj të sigurt, duke qëndruar besnikë ndaj vlerave të saj.