Franco Frattini, ish ministri italian i Punëve të Jashtme të Italisë, e kishte vizituar Tiranën për herë të fundit në vitin 2013. Ai është rikthyer në kryeqytetin shqiptar pas pesë vitesh, pa mundur ta fshehë entuziazmin për transformimin e madh që ka pësuar Tirana.
“Kam qenë këtu për herë të fundit në 2013-n dhe sot gjeta një qytet më të bukur, më të pastër, dhe mbi të gjitha, rrugë të mrekullueshme”, i tha Frattini kryebashkiakut Erion Veliaj, në një pritje të organizuar në Bashkinë e Tiranës.
Ish ministri italian i Punëve të Jashtme dhe ish-Komisioneri Europian për Drejtësinë, Lirinë dhe Sigurinë, Franco Frattini dhe kryebashkiaku Veliaj zhvilluan një takim, në të cilin vlerësuan marrëdhëniet e shkëlqyera që ekzistojnë mes dy vendeve e popujve, si dhe diskutuan mbi mundësinë e intensifikimit të tyre në sektorë të ndryshëm.