Forcat RENEA kanë arrestuar në Bulqizë të shumëkërkuarin Fadil Tërnova. Policia thotë se 32- vjeçari është person me rrezikshmëri të lartë shoqërore dhe ishte i shpallur në kërkim për disa vepra penale.
Tërnova u arrestua në kuadër të operacionit "Fundi i arratisë", i cili në momentin e ndërhyrjes u gjend i fshehur në ambientet e një bodrumi.
Në fshatin Vajkal të Bulqizës, pas rrethimit të banesës dhe ndërhyrjes profesionale u bë e mundur kapja dhe prangosja e shtetasit të kërkuar Fadil Tërnova, 32 vjeç, i cili në momentin e ndërhyrjes u gjend i fshehur në ambientet e bodrumit të hapur enkas në një prej dhomave, që ishte i mbuluar me pllakat e dyshemesë", thuhet në njoftimin e policisë.
Gjatë operacionit, forcat speciale RENEA gjetën dhe sekuestruan një armë zjarri pistoletë tip "Glock" që e mbante pa leje dhe fishekë luftarak.
Ky shtetas ishte person i shpallur në kërkim që prej vitit 2018, për veprat penale “Heqja e paligjshme e lirisë”, “Kanosje për të mos kallëzuar krimin” dhe "Armëmbajtja pa leje". Për këto vepra penale, Gjykata e Shkalles së Parë Dibër i ka caktuar këtij shtetasi masën e sigurisë “Arrest në burg”.