Ballkani i Hapur/Hapet pika e përbashkët kufitare me Malin e Zi në Malësi të Madhe, Rama: Njerëzit të jenë të lirë si në BE! Kjo është e ardhmja e Rajonit, herët ose vonë do e kuptojnë të gjithë

Është hapur sot në Grabom të Malësisë së Madhe pika e përbashkët kufitare me Malin e Zi, duke shënuar kështu edhe hapat e parë drejt lehtësimit të lëvizjes së re në kuadër të nismës së Ballkanit të Hapur. I pranishëm në ceremoninë e hapjes së pikës kufitare, kryeministri Edi Rama u shpreh se në këtë pikë të re kufitare me Malin e Zi, qëllimi është që njerëzit e rajonit të ndjehen dhe të jenë të lirë si në BE.

Sipas Ramës, nisma ‘Ballkani i Hapur’ është e ardhmja e përbashkët europiane e Rajonit dhe se “më herët se vonë, këtë do ta kuptojnë e do ta mbështesin të gjithë”, duke iu referuar kështu Kosovës, që ka refuzuar t’i bashkohet.  Rama deklaroi po ashtu se së shpejti do të ndërtohet edhe ura që lidh Velipojën ne Malin e Zi ndërsa shtoi se kjo duhet të shërbejë si një urë lidhëse mes Ballkanit. Ai theksoi se këto nisma po i afrojnë më shumë vendet e rajonit dhe shtoi se 'Ballkani i Hapur' nuk është përjashtues për Malin e Zi, Kosovën dhe Bosnjë Hercegovinën.

" Qëllimi ynë që njerëzit tanë të ndjehen dhe të jenë të lirë si në BE. Kjo është ajo që ndodh brenda Bashkimit Europian. Ku ka 2 pika bashkimit mes 2 vendeve nuk ka barriera, nuk ka pika kontrolli dokumentesh.  Edhe në këtë synojmë këtu. Që të realizojmë 4 liritë e BE-së, lëvizje e lirë e mallrave, njerëzve, kapitaleve dhe shërbimeve.  Ky është dhe qëllimi i nismës që ne kemi ndërmarrë me Serbinë dhe Maqedoninë e Veriut, që synon pikërisht që njerëzit të ndjehen të lirë, të lëvizin të lirë", ka thënë Rama.

LEXO EDHE:
Durrës/ Brenda vitit hapet parkimi me energji të vetëprodhuar nga dielli, 400 vende! Godina do ketë zyra e hapësira për evente

I pranishëm në ceremoninë e hapjes së pikës së përbashkët kufitare ishte edhe kryeministri i Malit të Zi, Zdravko Krivokapiq i cili e vuri theksin te bashkëpunimi, ndërsa tha se vendet nuk mund të bëjnë pa njëri-tjetrin, por se bashkë mund të bëjnë shumë.

Kujtojmë se më 29 korrik në Shkup u takuan kryeministri i Shqipërisë, Edi Rama, presidenti i Serbisë, Aleksandar Vuçiç dhe kryeministri i Maqedonisë së Veriut, Zoran Zaev, por mungoi ai i Malit të Zi. Të tre liderët ftuan vendet e rajonit që t’i bashkohen nismës së “minishengenit”, që u pagëzua me emërtimin e ri “Ballkani i Hapur” dhe ka si qëllim të krijojë një treg të përbashkët për vendet e rajonit të Ballkanit Perëndimor. Në takim përveç emrit të ri të ‘minishengenit’ u firmosën edhe 3 marrëveshje lidhur me qarkullim e lirë në tregun e punës, eliminimi i barrierave për importin dhe eksportin e mallrave si dhe mobilizimin e të tria vendeve në rast të katastrofave natyrore.

3 marrëveshjet e firmosura

1. Marrëveshja për mobilizimin e të tre vendeve për sa u përket përballimit të katastrofave natyrore. Nëse një katastrofë natyrore godet një vend, do të mobilizohen të tre për të ndihmuar.

2. Marrëveshje mirëkuptimi për të lehtësuar importin dhe eksportin e mallrave. Kjo do të eliminojë barrierat dhe do të ndihmojë në rritjen e ekonomisë së vendeve.|

3. Marrëveshje për qarkullim e lirë në tregun e punës. Mundësimin e qasjes së lehtë në tregun e punës dhe marrjen e lejeve të qëndrimit.

 

Rendit zhvillimet sipas orarit:

Të Fundit Të Parat

//Shqiptarja.com

TAG:
• edi rama
• mali i zi
• ballkani perendimor
• malesi e madhe
• ballkani i hapur
• grabom
• Zdravko Krivokapiq