Reforma Zgjedhore me ndërkombëtarët? Tërhiqet Lulzim Basha: Të huajt, jo si drejtues, i duam të japin ekspertizë

16 ditë pas prezantimit të platformës për reformën zgjedhore me 5 kushte, Lulzim Basha u tërhoq nga kërkesa që ndërkombëtarët të drejtojnë procesin. "Opozita e Bashkuar propozon që procesi të drejtohet nga një strukturë e përbërë nga përfaqësues të organizmave ndërkombëtar (OSBE/ODIHR, BE, SHBA, etj.), një përfaqësues i Parlamentit monopartiak dhe një përfaqësues i Opozitës së Bashkuar.

Produkti i dakordësuar nga kjo strukturë, pasi i nënshtrohet konsultimit me publikun, nëpërmjet formave dhe metodave që mundësojnë marrjen e mendimit të qytetarëve, miratohet pa ndryshime" thuhet në platformën e opozitës që iu drejtua kryeministrit Rama në datë 2 tetor.

Por sot Lulzim Basha ndryshoi qëndrim, ai u shpreh se mekanizmi i propozuar nga PD-ja është që ndërkombëtarët të mos jenë drejtues, por të japin ekspertizën e tyre për procesin.

"Nuk mund të pranojmë një proces farsë për reformën zgjedhore. Mekanizmi të përfshijë tre faktorë, opozitën e bashkuar, ata që kanë çelësat e qeverisjes dhe faktorin ndërkombëtar jo si drejtues por me ekspertizën për të dëshmuar vullnetin e palëve për të çuar para procesin.

Nuk ka negociata me shumicën për reformën zgjedhore, pasi nuk ka mekanizëm, pasi është pa përgjigje dhe pula pa kokë. Jo thjeshtë reformë zgjedhore me dy pika të tjerë, merr Oerdin dhe atë tjetrin që është një nga kushtet e Bundestagut. Prandaj reforma zgjedhore është më shumë se ndryshimet ligjore. Pjesa e parë thotë miratoni sipas rekomandimeve sipas OSBE-së, pjesa e dytë është zbatimi" tha Basha.

Lulzim Basha tha se opozita është gati që nesër për zgjedhje të parakohshme, por me një parakusht.

"Opozita ka një vit që lufton për zgjedhje të parakohshme, padyshim që lufton dhe është e gatshme që të shkojë që nesër, por parakushti është që të kenë standardet minimale, që të jenë për njerëzit dhe jo zgjedhjet e Vangjushit, Tomës dhe Kajmakut' tha Basha.

Por a do të ketë protesta tani që u mor vendimi për negociatat? "Mundohuni të dilni mbi këtë pyetje dembele, protesta ka pasur, ka edhe do të ketë. Protestat nuk janë tregues i prapambetjes së një shoqërie, është mungesa e protestës një gjë e tillë" tha ai.

I pyetur nëse është i hapur për një dialog pa parakushte me Ramën, Basha u përgjigj "Kësaj i kemi dhënë përgjigje prej më shumë se prej një viti dhe me dokumentin gjerman për negociatat është e qartë se cila është përgjegjësia e cdo kujt, ne si opozitë e përqafojmë si dokument, si udhërrëfyesin e daljes nga kriza, pa lojëra pa hile dhe mashtrime.

Ne kemi propozuar dhe nuk kemi pritur sikur tha kryeministri italian. Atë që u tha prokurorëve kap cfarë të kapësh e ka në shpirtin e vet. Nuk presim propozim nga ata, e ka bërë Bundestagu. Tani ka dy zgjedhje; ta zbatojnë ti binden verdiktit të sovranit dhe kërkesave të Europës ose të hapin krahun" tha ai.

"Reforma zgjedhore është urgjencë kombëtare, por jo për t'u hedhur hi syve shqiptarëve. Dua të deklaroj mbështetjen tonë të plotë për objektivat e shpallura nga Bundestagu, krijimi i Kushtetueses, SPAK-ut dhe dhënien fund të kulturës së pandëshkueshmërisë.

BE ka pasur dhe do të ketë probleme, por kjo nuk lidhet me negociatat shqiptare. Ne si opozitë sot kemi një mision; të dalim nga kjo gjendje duke marrë përgjegjësi. Përgjegjësi është akoma në krye të qeverisë. Ndaj detyra jonë fillon me propozimin e hapave konkretë si rasti i reformës zgjedhore, por është detyra e cdo shqiptari, të bashkohemi për të marrë në dorë fatin tonë për të vendosur standardin e zgjedhjeve të lira' tha Basha.

"Isha i qartë kur u thashë që opozita dhe Europa flasin me një gjuhë; e sotmja nuk është ajo që dëshironim, por nuk ishte e papritur, minimumi ishin kushtet e Gjermanisë. Prandaj kushtet janë rruga, plani për cdo shqiptar që duhet të thotë cfarë duhet të ndryshojmë. Reformë zgjedhore, zgjedhje të lira, zbatimi i reformës në drejtësi, para drejtësisë cdo kush që ka abuzuar.  9 kushtet e Bundestagut janë rruga e PD-së" tha Basha i pyetur nga Report Tv.

Lulzim Basha kërkoi nga Edi Rama që të japë dorëheqjen pasi sipas tij është fajtori kryesor për dështimin me negociatat. "Për fat të mirë me ndihmën e Zotit dhe Perëndimit piketat janë hedhur. Reforma në drejtësi dhe zbatimi i saj ka një qëllim ti trajtojë të gjithë njëlloj. Pavarësisht se do të rikthimi në një tjetër mbledhje të BEsë apo do të kemi një tjetër mënyrë kontrolli dhe që drogën mos ta shohë fare.

Rruga për hapjen e negociatave shkruhet në 9 kushtet e Bundestagut. Përsëritja e zgjedhjeve të 30 Qershorit sipas një kodi të ri. Dua të konfirmoj edhe njëherë se jemi të vendosur për të bërë gjithcka për të mos e pranuar gjendjen e sotme, tërësisht dhe kryekëput përgjegjësi e një njeriu që sot po të kishte pasur një fije patriotizmi, duhet të kishte dhënë dorëheqjen dhe asgjë më pak, por as unë dhe as ju nuk e prisnim, ndoshta ndonjë socialist idealist" tha ai.

Për Lulzim Bashën i vetmi fajtor për mos hapjen e negociatave është Edi Rama, të cilin e ka 'thumbuar' edhe për mjekrën. "Por Macron kërkon të reformojë verifikimin e së vërtetës për Ballkanin. Nuk shkohet në Europë me 'Toyota Yaris' dhe as me paratë e tyre. Macron po kërkon reformë për kontrollin e atyre që duan të hyjnë në klubin e vendeve më të pasura të botës.

Shqiptarët ikin në Francë, se të drejtat janë njëlloj, trajtimi para ligjit është i njëjtë. Macron po kërkon të reformojë mënyrën si vendet e ardhshme do të kontrollohen që të mos kenë dështime si në rastin e Bullgarisë dhe Rumanisë. Në Francë prej 2013 po shkonin nga një mijë në javë. Ata thonë prit, prit mos e hap derën akoma se nuk është gati. Këta që na lënë mjekrën si Ismail Qemali dhe na shiten si patriotë të mëdhenj, këtej marrin policë të FRONTEX në kufi" tha ai.

Lulzim Basha ka sulmuar Komisionin Europian që sipas tij ka zbukuruar raportet për Shqipërinë duke mos treguar të vërtetën e asaj që po ndodhte në Shqipëri.  "Në orën 13:00 erdha nga Berlini me informacionet më të freskëta. Është e vërtetë që mbizotëron mosbesim me vendet anëtare në raport me raportet e KE për zgjerimin, konsiderohen të zbukuruara, nuk paraqesin realitetin.

Këtë tha edhe Holanda kur u shpreh se në rast e Maqedonisë ishin dakord, për Shqipërinë, krimi, korrupsioni dhe ndarja e pushtetit i ndalonin për hapjen e negociatave, në raport të qartë me raportin e zbukuruar të KE-së. Franca shikon cdo ditë problemin e azilkërkuesve.

Këto të vërteta nuk kanë gjetur pasqyrtimin në raportin e KE-së dhe kjo e shtyu Bundestagun të bënte vlerësimin e vet, e bënë edhe për Serbinë para ca vitesh, i njëjti person Krishbaun. Në vend që të bënin detyrat këta përqafoheshin dhe putheshin me komisionerin për zgjerimin dhe Mogerinin" tha Basha.