Berisha akuza për manipulimin e zgjedhjeve të 14 majit: U përdorën ‘zgjedhës shëtitës’ pa adresë që votonin më shumë se në një qendër votimi

Kreu i Rithemelimit, Sali Berisha ka vijuar me akuzat ndaj qeverisë gjatë ditës së sotme duke pretenduar sërish se për rezultatin e humbjes së thellë të koalicionit ‘Bashkë Fitojmë’, shkak është bërë manipulimi i zgjedhjeve vendore të 14 majit.

Sipas Berishës, janë përdorur për të votuar persona të cilët rezultonin se nuk kishin asnjë adresë dhe se votonin në më shumë se një qendër votimi. Ai i quajti këta persona ‘zgjedhës shëtitës’ të cilët PS i ka përdorur disa herë për të manipuluar rezultatin e zgjedhjeve.

"U gjetën votues të regjistruar në garazhe, në kontejnerë në port deri tek shatërvani në qendër të qytetit si adresë. Në 25 prill të 2021 në rrethin e Durrësit votuan 110 mijë zgjedhës, u konstatuan se 5404 zjgedhës nuk ishin të identifikuar nga makina e identifikimit të zgjedhësve. Ajo që dëshmon në përdorimin e fortë të këtij kontingjenti votues shëtitës ishte 6 marsi i vitit 2022. Me 6 mars në bashkinë e Durrësit votuan 67 mijë, pra numri i votuesve u përgjysmua. Por ajo që ndodhi në Durrës është se numri i votuesve të paidentifikuar u dyfishua, nga 5 mijë shkoi në 9600. Po në këtë qytet 3900 emigrantë që rezultonin se kishin votuar, asnjë prej tyre nuk kishte ardhur në Shqipëri, por ishin përdorur kartat e tyre të identitetit"- u shpreh kreu i Rithemelimit. 

LEXO EDHE:
Aktori Mirush Kabashi ‘Qytetar Nderi’ i Durrësit pas vdekjes! E bija, Mendi Kabashi: Është i vonuar, do doja ta merrte sa ishte gjallë!

Berisha shkoi më tej me shifrat duke thënë se numri i zgjedhësve siç i quajti ai ‘potencialisht shëtitës’ pra të paidentifikuar në të gjithë vendin ishte në shifrën e 547 mijë votuesve.

Ish kryeministri shtoi se të gjitha pretendimet janë dorëzuar në prokurori dhe se ndërkohë po vijon puna voluminoze për identifikimin e të gjithë atyre që sipas tij janë persona pa adresë të cilët kanë votuar në më shumë se një qendër votimi.

Që pas humbjes në zgjedhjet vendore të 14 majit ku në koalicion me Ilir Metën arriti të fitonte vetëm 7 bashki, Berisha nuk ka pranuar rezultatin dhe ka vijuar me akuzat ndaj qeverisë dhe pretendimet për manipulimin e zgjedhjeve. Njëjtë ka vepruar edhe aleati i tij, Ilir Meta i cili tha se për manipulimin e zgjedhjeve dhe rezultatit janë investuar dhjetëra miliona euro para kriminale nga qeveria.

B.V/Shqiptarja.com

TAG:
• sali berisha
• zgjedhjet vendore 2023
• koalicioni berisha meta
• Durres