Biberaj në Report Tv: PD po përgatitet për 2 palë zgjedhje! 'Garda e vjetër' u largua kur ramë në opozitë, mosmirënjohës

TIRANË- Anëtari i Këshillit Kombëtar të PD-së, Aleksandër Biberaj ka deklaruar se demokratët po përgatiten për 2 palë zgjedhje brenda 1 viti, ato lokale dhe të përgjithshme, teksa është i bindur se do fitojnë. Në emisionin "Pa Protokoll" në Report Tv me gazetaren Anduela Ndreu, Biberaj tha se kryedemokrati Lulzim Basha ka gabuar me listat me deputet në 2017, që solli si rezultat opozitën që është sot në parlament, duke premtuar se në 2020 do të jetë ndryshe.

"Do ketë dy palë zgjedhje, nëse janë në një datë le të ia lëmë kohës, do përsëriten zgjedhjet vendore dhe për zgjedhjet e përgjithshme. Maksimumi për 1 vit do të bëhen të dyja zgjedhjet. Ai moment ka qenë një gabim dhe Basha ka kërkuar falje, ato nuk duhet të ishin pjesë e listave, një parti serioze duhet të punojë 4 vjet për të bërë një listë, por ndodhi në kushtet e një emergjence kohore. Nuk bëhet fjalë që lista për zgjedhjet e 2020 të jetë ashtu", tha Biberaj.

Ai ka pasur edhe një koment për të larguarit nga PD-ja. Teksa në selinë blu ka zëra që kërkojnë rikthimin e të ashtuquajturës "garda e vjetër", për Biberajn partia është e hapur, por i quan "si mosmirënjohës", të cilët ikën nga partia kur ajo ra në opozitë.

"Ato u larguan në momentin që PD iku nga pushteti, e braktisën kur doli në opozitë. Mungesë mirënjohje, partia të ka bërë, ministër, deputet, kryetar kuvendi... minimalisht duhet të tregosh mirënjohje. Nuk është dinjitoze që kur je në pushtet je pjesë e qeverisjes dhe kur nuk je në pushtet, largohesh", u shpreh ai në Report Tv.  

Çfarë do të ndodh nëse humbasin zgjedhjet? Për Biberajn, shanset janë zero. "Nuk ka shanse që të humbasim zgjedhjet, është 0% probabiliteti", përfundoi Biberaj.

B.K./r.k./Shqiptarja.com

TAG:
• PD
• aleksander biberaj
• pa protokoll