Buxheti 2020/ Lleshaj zbulon rrogën: Roja në Kosovë merr 900‎€, sa rroga ime! Shtojmë kapacitetin e policisë shkencore e komisariatet

Në komisionin  e sigurisë, gjatë diskutimeve për Buxhetin 2020, është rikthyer në vëmendje edhe një herë, gazi lotsjellës, që është përdorur jo pak herë nga forcat e policisë për të shpërndarë protestuesit e ndryshe.  

Deputeti Lefter Maliqi pyeti ministrin Lleshaj për hedhjen e gazit lotsjellës ndërsa Lleshaj ka thënë se përdorimi i këtij gazi ka shmangur përdorimin e plumbave.

Maliqi: Për gazin lotsjellës që keni hedhur ndaj protestuesve...! Doja të pyesja edhe për orët shtesë të punonjësve të policisë. Po ashtu edhe bashkëpunimin mes jush dhe SHISH. Pyetja tjetër është nëse keni raport për shefa të policisë të përfshirë në çështjet e drogës.

Lleshaj: Bashkëpunimi me SHISH është ndër më të mirët. Orët shtesë për policinë janë paguar të gjitha, ndërsa për sa i përket gazit lotsjellës në konceptin buxhetor ne e kemi gjetur nuk e kemi blerë. Atë e hedh policia. Jam dakort me ju që është hedhur shumë, por ama janë shmangur plumbat.

Ministri i Brendshëm Sandër Lleshaj teksa diskutonte në Komisionin e Sigurisë për Buxhetin 2020, është shprehur se me buxhetin e parashikuar për ministrinë që ai drejton nuk është parashikuar rritje page për punonjësit e policisë.

Lleshja ka zbuluar edhe rrogën që merr në ministri duke e krahasuar atë me një rrogë të rojes së ministrit të Brendshëm në Kosovë.

"Me këtë buxhet nuk është parashikuar rritje page për punonjësit e policisë. Sigurisht që duhet rritje dhe do parashikohet në 6 mujorin e dytë. Gjatë një takimi që pata me ministrat e Ballkanit mora vesh se roja i ministrit të brendshëm të Kosovës tha se merrte 900 euro pagë. Roja atje merr aq pagë sa kam edhe unë" tha Lleshaj.

Ministri i Brendshëm Sandër Lleshaj gjatë prezantimit në Komisionin për Sigurinë, për Buxhetin 2020, është shprehur se Ministria e Mbrojtjes po parashikon që të zvogëlojë numrin e drejtorive vendore në mënyrë që të shtohet numri i komisariateve sipas shpërndarjes së popullsisë.

"Kemi një plan për rindërtimin e komisariateve, sidomos jashtë Tiranës. Kemi plan për rishpërndarjen e tyre, shpërndarja e popullësisë ka ndryshuar pas ‘90. Duam të shtojmë numrin e Komisariateve. Kemi dy alternativa, është duke u vendosur për përzgjedhjen e projektit. Është kosto e cila duhet marrë parasysh. Rikthime në polici nga të larguarit nuk ka patur. Nuk i kemi rikthyer sepse ligji na e ndalon një gjë të tillë. Duhet riparë nga viti i ardhshëm, pasi ka persona të aftë" tha Lleshaj ndër të tjera.