Cakaj bisedë telefonike me ministrin gjerman: Të hapen negociatat një orë e më parë

Ministri në detyrë për Evropën dhe Punët e Jashtme, Gent Cakaj zhvilloi një bisedë telefonike me Ministrin gjerman të Shtetit për Europën, Michael Roth. Përmes një postimi në Facebook, Cakaj shprehet se Gjermania  ka mbështetur fort reformat në vendin tonë dhe rrugëtimin drejt BE duke e bërë rolin e saj të pazëvendësueshëm.

“E falënderova për mbështetjen e pakursyer për Shqipërinë dhe qasjen shumë largpamëse e për Ballkanin Perëndimor në përgjithësi. Roli i Gjermanisë në mbështetjen e reformave të brendshme dhe rrugëtimin evropian të Shqipërisë është i pazëvendësueshëm”, shkruan Cakaj.

Ministri i Jashtëm, Cakaj shkruan se bashkë me ministrin Roth ndajnë të njëjtat pikëpamje të hapen negociatat për Shqipërinë

“Po ashtu, ndamë krejtësisht të njëjtën pikëpamje lidhur me progresin përmbajtësor të Shqipërisë dhe domosdoshmërinë e çeljes së bisedimeve për anëtarësim në BE një orë e më parë. Shqipëria nuk ka asnjë alternativë tjetër veç përparimit të mëtejmë në drejtim të anëtarësimit në BE’, mbyll postimin Cakaj.

TAG:
• BE
• integrimi ne be
• Michael Roth
• Gent Cakaj