Çekia nxit punëtorët publikë për vaksinim me një “dhuratë” tejet të veçantë

Në përpjekje për të nxitur vaksinimin në masë, Çekia ka premtuar dy ditë pushim shtesë për punëtorët e sektorit publik në Çeki.

“Qëllimi është që të kemi vaksinim maksimal, që ta mbrojmë veten kundër infektimit nga jashtë”, tha Kryeministri i Çekisë, Andrej Babis.

Kryeministri Babis tha se punëtorët qeveritarë do të mund t’i shfrytëzojnë dy ditët e pushimit në çfarëdo periudhe para fundit të këtij viti, duke i siguruar qytetarët se kjo masë nuk do të jetë barrë për buxhetin e shtetit.

Ai u bëri thirrje edhe autoriteteve rajonale që ta ndjekin shembullin e qeverisë qendrore dhe të marrin vendim për pushim shtesë për ata që vaksinohen për ta nxitur marrjen e vaksinës nga sa më shumë njerëz.

Çekia, me popullsi 10.7 milionë banorësh,  deri më tani ka vaksinuar plotësisht 4.74 milionë njerëz. Një shifër e tillë nuk konsiderohet e mjaftueshme, pasi vendi ka pasur 1.7 milionë infektime dhe mbi 30.000 viktima deri më tani që nga fillimi i pandemisë.

TAG:
• cekia
• Andrej Babisit
• Koronavirus
• Vaksina Covid