Covid/ Në Itali 1907 raste të reja dhe 10 viktima! Në botë regjistrohen 30 milionë infeksione…12 milionë britanikë futen në izolim (VIDEO)

Koronavirusi po vazhdon të përhapet me shpejtësi në Francë.

Gjatë 24 orëve të fundit u regjistruan 13 215 raste të reja të identifikuar me infeksionin e koronavirusit dhe 123 viktima.

Pikërisht për shkak të këtij bumi, administratat lokale po miratojnë masa kufizuese. Ile-de-France - rajoni i Parisit - "nuk rekomandon" bashkime familjare ose miqsh mbi 10 persona. Rritja e rasteve në kryeqytet ka bërë gjithashtu një "viktimë" të shquar: shkolla e famshme ‘Science Po’, ku formohet klasa sunduese e vendit, ka vendosur të mbyllë dyert e saj deri në 4 Tetor. Në

Nisë, janë të ndaluara konsumimi i aperitivëve në plazh pas orës 20:00 dhe piknikët me mbi 10 pjesëmarrës

Sipas autoriteteve, numri i përgjithshëm i të prekurve që prej fillimit të pandemisë është rritur në 428 696 kurse viktimat numërohen në 31218

Kryeministri britanik, Boris Johnson ka thënë se në Mbretërinë e Bashkuar, vala e dytë e koronavirusit “është në ardhje”.

Duku folur në Oxfordshire, Johnson ka thënë se rritja e numrit të të infektuarve ka qenë “e pashmangshme”.

“Nuk dua që të kemi masa më të rrepta të izolimit”, ka thënë ai, mirëpo ka shtuar se “kur shohim se çfarë është duke ndodhur tani, po mendojmë nëse duhet të shkojmë përtej rregullit të lejimit të gjashtë personave nëpër ambiente publike”.

Johnson ka thënë se izolimi i dytë është “gjëja e fundit që e dëshiron”, mirëpo ka vlerësuar se masat aktuale duhet të vëzhgohen.

Komentet e tij kanë ardhur pasi këshilltarët qeveritarë kanë thënë po rritet shkalla e përhapjes së koronavirusit në Mbretërinë e Bashkuar.

Autoritetet britanike kanë regjistruar të premten 4,322 raste të konfirmuara me koronavirus, një rritje për gati 1,000 më shumë të infektuarve në krahasim me një ditë më parë.

Sipas të dhënave të Universitetit Johns Hopkins, Mbretëria e Bashkuar ka raportuar për 388,412 të infektuar me këtë virus, prej shpërthimit të pandemisë.

Prej tyre 41,821 pacientë kanë vdekur.

Sipas të dhënave nga Ministria e Shëndetësisë Italiane, gjatë 24 orëve të fundit në vend janë regjistruar 10 viktima nga koronavirusi (dje ishin 13)

Totali i vdekjeve që nga fillimi i emergjencës shëndetësore është rritur në 35.668
                                                                                                                              
Autoritetet e shëndetësisë raportuan gjithashtu se sot u regjistruan edhe 1907 raste të reja pozitiv, (dje ishin 1585) për një total prej 294 932 të prekurish nga Covid. 

Gjithashtu pati edhe 853 të shëruar, për një total prej 216.807 raste pacientësh.

Në Rajonin e Lombardisë gjatë 24 orëve të fundit u raportua për 2 viktima dhe 224 raste të reja pozitiv. 

Numri i përgjithshëm i vdekjeve në Rajon ka shkuar në 16.908 kurse totali i rasteve pozitive, që prej fillimit të pandemisë, është rritur në 104304

Coronavirus, fondacioni Gimbe: Shtrimet në spital në rritje javën e fundit

Sipas të dhënave të fundit në Itali, në vetëm një javë numri i pacientëve Covid të shtruarve në spital është rritur me 26% kurse i atyre në kujdesin intensive me 41 %

Nga të dhënat e siguaruara prej Fondacionit të pavarur Gimbe, ka patur një stabilizim në rritjen e rasteve të reja krahasuar me javën e kaluar (9,837 kundrejt 9,964) dhe një zvogëlimi të rasteve të testuara (370,012 krahasuar me 421,897).

Nga pikëpamja epidemiologjike, rastet pozitive aktualisht janë rritur (39,712 kundrejt 33,789), pacientët e shtruar në spital me simptoma janë (2,222 nga 1,760) dhe në kujdes intensiv (201 nga 143). 

Duke filluar nga mesnata e kaluar, gati 12 milionë njerëz në Britaninë e Madhe (nga një popullsi totale prej 66 milionë) janë vënë përsëri në bllokim. 

Masat lokale, të cilat prekin kryesisht rajonet e Anglisë Verilindore dhe zonat metropolitane të Mançesterit dhe Birminghamit, janë përgjigja ndaj numrave në  rritje të infeksioneve që dje ishin mbi 4,000 në të gjithë vendin. 

Masat e reja kërkojnë mbylljen e pubeve dhe restoranteve në orën 22 në mbrëmje dhe ndalimin e shoqërimit me njerëz jashtë familjes, përveç rekomandimit për të përdorur transportin publik vetëm kur është e nevojshme. 

Por frika tani është se këto masa mund të shtrihen në pjesën tjetër të vendit, duke filluar me Londrën, ku rastet e koronavirusit janë dyfishuar në dy javët e fundit.

Të hënën e kaluar hyri në fuqi "rregulli i gjashtës", i cili ndalon grumbullimet, madje edhe në shtëpi me të afërmit, në grupe me më shumë se gjashtë vetë. 

Por qeveria e Londrës duket se është në panik të plotë dhe lajme të pakonfiruara thonë që nëse infeksionet nuk ulen brenda dy javësh, do të ketë bllokim i ri mbi  bazë kombëtare.

Shqetësimi i Downing Street është se situata do të dalë nga kontrolli dhe Britania do të jetë viktima e një vale të dytë, si ajo që ndodhi në Spanjë.

Por Johnson, pas kaq shumë pasigurish dhe rrëmujash në fillim në menaxhimin e pandemisë, këtë herë nuk dëshiron të marrë rreziqe

Sot në Izrael fillon zbatimi i vendimit për karantinë 3 javore për shkak të rritjes së rasteve me koronavirusin e ri (COVID-19).

Në kuadër të karantinës që do të zbatohet nga ora 14:00 sipas kohës lokale, do të jetë e ndaluar që qytetarët të largohen më shumë se 1.000 metra nga shtëpia.

Bizneset, përveç furrave, farmacive dhe marketeve do të jenë të mbyllura, ndërsa mund të jenë së bashku në një vend me kushtin e distancimit fizik jo më shumë se 10 persona në ambiente të mbyllura dhe jo më shumë se 20 në ambiente të hapura publike.

Në zbatimin e karantinës do të ketë kufizime edhe në udhëtimet ndërqytetase, gjë e cila është pritur me reagime për shkak se përkon me festën Rosh Hashanah (viti i ri sipas kalendarit hebraik).

Për zbatimin e karantinës janë mobilizuar 6.000 policë si dhe 1.000 ushtarë.

Kryeministri izraelit Benjamin Netanyahu në një deklaratë dje u bëri thirrje qytetarëve që të vendosin maska dhe të distancohen nga tubimet me pjesëmarrje të gjerë si dhe paralajmëroi se rregullat e karantinës do të ashpërsohen nëse rastet nuk do të mund të vihen nën kontroll.

Numri i rasteve mbi 5.000

Në një deklaratë me shkrim nga Ministria e Shëndetësisë thuhet se në 24 orët e fundit janë kryer 56.986 teste dhe se 5.238 prej tyre kanë rezultuar pozitivë.

Në këtë mënyrë numri i rasteve ka arritur në 176.933 ndërkohë që 577 prej të prekurve janë në gjendje të rëndë.

Në vendin në të cilin është efektive vala e dytë e pandemisë, numri i rasteve aktive i cili ra nën 2.000 në muajin maj, me një rritje të fortë në javët e fundit ka arritur në 46.370.