Kreu i Bashkisë Finiq: Më kanë çarë gomat dhe këputur frenat e dorës! Burimet hetimore: Dyshohet se ngjarja mund të jetë sajuar

Kryetari i Bashkisë së Finiq, Kristo Kiço denoncon se makinë së tij i janë çarë gomat dhe këputur frenat e dorës nga persona që nuk janë vënë ende përpara përgjegjësisë. Ndërsa burime nga grupi hetimor thonë se ngjarja ka hije dyshimi se mund të jetë sajuar dhe se po hetohet.

Kiço ka bërë publik rastin përmes një postimi në Facebook, ku denoncon se disa persona i kanë çarë gomën e makinës dhe i kanë prerë frenat e dorës. Goma e çarë u konstatua nga vetë Kiço, ndërsa prerja e kabllove të frenave u zbulua 4 ditë në vonë.

Makina ishte e parkuar jashtë shtëpisë së tij në qytetin e Sarandës, ndërsa mjeti ishte hapur pa e thyer atë. Kiço shkruan se në raportin e policisë thuhet se autorët duket se kanë patur qëllim kriminal dhe se kanë nisur hetimet për identifikimin dhe kapjen e tyre.

Megjithatë sipas burimeve nga grupi hetimor që po heton në lidhje me ngjarjen pasi ka hije dyshimi se këputja e frenave të dorës nga brenda makinës mund të jetë e sajuar.

Sipas kreut të Bashkisë së Finiqit ai nuk ka konflikte me askënd, ndërsa burimet thonë se në lidhje me ngjarjen nuk ka ende asnjë të dyshuar. Burimet thonë se 'Kiço pretendon se frenat e dorës ja kanë prerë brenda makinës, ndërkohë që ajo ka qenë e mbyllur dhe nuk ka shenja thyerje apo hapje të saj me forcë".

Gjithsesi është duke u hetuar pasi mënyra e veprimit duket dyshuese për grupin hetimor.

TAG:
• Bashkia Finiq
• kristo kico