Analiza/ Eduard Zaloshnja: Derbi gjithnjë përtej futbollit…

Gjatë një derbi Tirana-Partizani

Para ca kohësh, zhvillova një sondazh me tifozë e dashamirës të Tironës në lidhje me ndryshimin e emrit zyrtar të klubit (nga “KF Tirana”, në emrin origjinal të klubit, “KF Tirona”). Nga ai sondazh rezultoi se 99% e tifozëve/dashamirësve të Tironës duan që klubi i tyre të quhet zyrtarisht “KF Tirona”, siç quhet “AC Milan” bazuar në dialektin milanez, e jo “AC Milano”  (https://realstory.al/sondazhi-i-zaloshnjes-99-1-e-tifozeve-duan-emrin-kf-tirona/ ).

Por një pyetje tjetër në sondazh (që nuk e publikova atëherë) ishte se për kë votonin rregullisht të anketuarit. Nga ajo pyetje rezultoi se 91% e tifozëve/dashamirësve të Tironës kanë votuar rregullisht për PD-në. Edhe Lazio, që njihet si klubi me tifozerinë më të djathtë në Europë, nuk mund të ketë një përqindje kaq të lartë përkrahësish të djathtë…

Po pse kaq e djathtë tifozeria e Tironës? Rrënjët e këtij fenomeni duhen kërkuar tek derbi Tirona-Partizani…

Deri në mesin e shekullit të kaluar, nuk mund të flitej për derbi në kryeqytet. Para Luftës së Dytë Botërore, Partizani nuk ekzistonte, dhe Tirona ishte klubi absolut në kryeqytet e pothuaj në të gjithë vendin. Pas luftës, Partizani u krijua (nën shembullin e Partizanit të Beogradit) si klub i Ushtrisë Popullore të asaj kohe. Dhe çdo talent i klubeve të tjera thirrej në shërbim të detyruar ushtarak, e detyrohej të luante për Partizanin. Në ato kushte, Tirona (që qeveria komuniste ia kishte vënë emrin “Puna”) nuk kishte shans të krijonte një ekip me talentet e saj (që ia rrëmbente Partizani, e më vonë Dinamo e Ministrisë së Brendshme).

Por në fillim të viteve ’60, një grup i talentuar futbollistësh të rinj u rikthyen tek Tirona pas shërbimit të detyruar ushtarak, dhe rivaliteti i derbit filloi (Panajot Pano ishte i vetmi ndër ata talente, që nuk u kthye tek Tirona). Për futbollistët dhe tifozët e Tironës, derbi nuk ishte më thjesht një sfidë futbollistike, por edhe një sfidë e heshtur politike… Djemtë e talentuar të Tironës, që nuk i kishin pranuar favoret afatgjata që ofronte një klub ushtarak si Partizani, e sfiduan me sukses atë (si edhe Dinamon e Ministrisë së Brendshme), duke u shpallur kampionë absolutë për 5 vjet rresht (një vit ia hoqi kampionatin FSHF-ja dhe ia dha Dinamos së vendit të tretë…).

Qysh atëherë, sado kanë ndryshuar situatat në Shqipëri, derbi ka mbetur një sfidë jo vetëm fubollistike, por edhe politike. Siç e ilustron edhe sondazhi i sipërcituar…

K.T./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Sipas jush pas zhvillimit të dy Kuvendeve PD do të jetë?



×

Lajmi i fundit

John

E rëndë në Pogradec/ 46-vjeçarja del nga spitali, sapo shkon në shtëpi ndërron jetë