Drafti i PS fut Arta Vorpsin në Gjykatën Kushtetuese, në pikëpyetje statusi i Marsida Xhaferllarit 

TIRANË- Drafti i Partisë Socialiste, i cili ndryshon mënyrën e betimit të magjistratëve, duke evituar kësisoj bllokadën e Presidentit, nëse miratohet nga Kuvendi, passjell automatikisht ndryshime në përbërjen e Gjykatës Kushtetuese. Konretisht, neni 2 i draftit të mazhorancës mundëson që Arta Vorpsi të fillojë detyrën si anëtare e Gjykatës Kushtetuese, duke vënë në të njëjtën kohë në pikëpyetje statusin e anëtares Marsida Xhaferllari. Sipas nenit 2, “gjyqtarët e zgjedhur, të emëruar ose të shpallur të emëruar, por që nuk kanë bërë betimin, me hyrjen në fuqi të këtij ligji betohen sipas rregullave të këtij ligji”, konkretisht të bëjë betimin në formë të shkruar dhe t’ia dërgoojë atë Presidentit të Republikës. Statusi ligjor aktual i zonjës Arta Vorpi përkon me nenin 2 të këtij ligji. 

Arta Vorpi është shpallur e emëruar si anëtare e Gjykatës Kushtetuese, në bazë të pikës 4, të nenit 7/b të ligjit për Gjykatën Kushtetuese, në kushtet kur Presidenti Ilir Meta nuk ushtroi të drejtën e tij për të emëruar brenda afatit 30-ditësh një nga tre kandidatët e listuar nga Këshilli për Emërimet në Drejtësi. Sipas kësaj pike, Presidenti emëron brenda 30 ditëve njërin nga tre kandidatët, në të kundërt, pas këtij afati, kandidati i renditur i pari konsiderohet i emëruar. Me përfundimin e këtij afati, në Fletoren Zyrtare, u botua lista me kandidatët e KED për vendin vakant në Gjykatën Kushtetuese, duke zyrtarizuar emërimin e Arta Vorpsit, e renditur e para. Por, që niste detyrën, Arta Vorpsi duhej të bënte betimin para Metës. 

Në kushtet kur Meta nuk e ftoi për të bërë betimin, Arta Vorpsi u betua tek noteri, veprim i cili nuk parashikohet shprehimisht në ligjet shqiptare, ndonëse është legjitimuar si precedent nga Komisioni i Venecias. Për këtë arsye, edhe anëtarja e Gjykatës Kushtetuese, Vitore Tusha, e cila ushtron kompetencat e kryetares, nuk e njohu Arta Voprsin si anëtare. Por, me hyrjen në fuqi të nismës së re ligjore, Arta Voprsi mund të bëjë betimin në formën e shkrua dhe t’ia nisë Presidentit Meta. Ky veprim i thjeshtë e bën Arta Vorpsin automatikisht anëtare të ligjshme të Gjykatës Kushtetuese, duke e detyruar Vitore Tushën t’i hapë derën e gjykatës.  

Nga ana tjetër, betimi i shkruar i Arta Vorpsit, në bazë të ligjit të ri, detyron Vitoren Tushën të largojë Marsida Xhaferllarin nga Gjykata Kushtetuese, e emëruar nga Presidenti Ilir Meta në vendin vakant që është plotësuar automatikisht nga Arta Vorpsi. Pas përfundimit të afatit 30 ditor, afat i cili bëri automatikisht Arta Vorpsin anëtare të Gjykatës Kushtetuese, Presidenti Ilir Meta emëroi në të njëjtin pozicion Marsida Xhaferllarin, e renditura e katërta nga Këshilli për Emërimet në Drejtësi. Kuvendi ka miratuar një rezolutë, përmes të cilës njeh vetëm Arta Vorpsin anëtare të Gjykatës Kushtetuese, por ana tjetër në këtë karrige ulet Marsida Xhaferllari.

B.K./Shqiptarja.com

TAG:
• gjykata kushtetuese
• Ilir Meta
• marsida xhaferrllari
• Arta Vorpsi