Drejtorja e Turizmit për Report TV: Hapja e kufijve me marrëveshje bilaterale! Nuk do ketë rritje të çmimeve

Në 1 qershor do të hapen kufijtë tokësor me vendet fqinje dhe kjo do të bëhet me anë të një marrëveshje bilaterale mes vendeve përkatës. Drejtorja e Agjencisë Kombëtare të Turizmit Kornelia Ferizaj në një intervistë për Report TV sqaroi të gjitha procedurat, që sipas janë të detajuara në protokoll. Ferizaj u shpreh  se edhe pse ky është një vit i vështirë, nga bizneset private të turizmit nuk do të ketë rritje të çmimit.

Sipas Ferizaj, karantina për turistët që vijnë për plazh në Shqipëri nuk do të jetë si karantina që jemi mësuar deri tani. Drejtorja e Agjencisë Kombëtare e Turizmit tha se çdo hotel do të këtë një koordinator covid që do të mbajë regjistër të turistëve që hyjnë dhe dalin në hotel, do t'u matet temperatura dhe nëse do të këtë dyshime, në protokoll është përcaktuar procedura si do të ndiqet ky rast.

"Në 1 qershor ne synojmë të hapim kufijtë tokësore me vendet e rajonit, Kosovën, Maqedoninë e Veriut dhe Malin e Zi. Ka patur diskutime, sepse 70% e turistëve vijnë me anë të kufirit tokësor. Operatorët  privatë kanë kërkuar në fillim hapjen e kufijve me vendet fqinje. Kjo do të ndihmojë ekonominë dhe sektorin e turizmit derisa të vijnë charterat e parë. Është disktuar me institucionet përkatëse dhe kemi një dakordësi për hapjen e kufijve, në mënyrë që mos të hapen kufijtë nga njëra anë, por të hapen me një marrëveshje bilaterale. Në 1 qershor do të hapen hotelet në plazhe dhe në 10 qershor do të hapen plazhet për qytetarët.

Edhe kur të hapen kufijtë tokësor dhe kur të hapen ato me chartera, në një moment të dytë me turistë besnikë të Shqipërisë, do të kenë një marrëveshje me tur operatorët shqiptarët dhe do të kenë edhe kontrollet përkatëse. Momenti i karantinës nuk do të jetë karantina që jemi mësuar deri tani, por do të jetë një procedurë tjetër që është parashikuar në protokoll. Protokolli është një dokument që i ka të parashikuar në detaj. Çdo hotel këtë vit do të ketë një koordinator covid që do të mbajë regjistër të turistëve që hyjnë dhe dalin në hotel, do t'u matet temperatura dhe nëse do të këtë dyshime, në protokoll është përcaktuar procedura si do të ndiqet ky rast. Ka elementë të shtuar sigurie sa i përket përdorimit të ashensorëve, shërbimi i vakteve, pastrimi, distanca nga shezlongu në shezlong, por edhe transporti etj"-u shpreh Ferizaj.

E pyetur nëse a do të ketë rritje të çmimeve, duke qenë se do të ketë rritje të kostove, Ferizaj tha se nga sektori privat i hotelerisë kanë marrë garanci se nuk do të ketë rritje çmimesh. 

"Hotelierët janë të ndërgjegjshëm për këtë situatë. Janë të ndërgjegjshëm që ky vit do të jetë vit mbijetese dhe një vit që mund të ketë një mbajtje të mirë të sezonit. Ata për të ruajtur imazhin e tyre dhe një numër të kënaqshëm klientët do të jenë të parët që nuk do të kenë interes të rrisin çmimet. Kjo është një garanci që ne e kemi marrë nga biznesi privat", u shpreh drejtoresha e Agjencisë Kombëtare të Turizmit.

Rendit zhvillimet sipas orarit:

Të Fundit Të Parat

/r.k./Shqiptarja.com

TAG:
• turizmi
• kornelia ferizaj