Edhe pse kohë pandemie në fushatën e 25 prillit u harxhuan miliarda, PS ‘lëshoi dorën’ me 172 mln lekë, PD harxhoi 47! LSI mori 4 deputetë por shpenzoi thuajse sa demokratët

Rama dhe Basha gjatë fushatës elektorale

Edhe pse nën masa anti COVID dhe me aktivitetet të limituara fushata elektorale e zgjedhjeve të 25 prillit të kaluar i kushtoi partive politike qindra milionë lekë.  KQZ ka publikuar raportet për të gjitha partitë politike. Partia Socialiste është ajo që kryeson listën me një diferencë shumë të madhe krahasuar me forcën e tjera politike.

Edhe nëse i mbledhim shpenzimet e PD e LSI bashkë, Partia Socialiste ka shpenzuar plot 84 mln lekë më shumë se të dyja këto dy forca të tjera politike.  Socialistët kanë hedhur mbi 172 milionë lekë që u konvertuan në 74 mandate deputetësh. Nga raporti financiar i dorëzuar në Komisionin Qendror të Zgjedhjeve, rezulton se shuma më e madhe e parave është harxhuar nga vetë partia në vlerën e mbi 133 milionë lekëve dhe disa herë më pak nga vetë kandidatët për deputetë.

Ndërkohë Partia Demokratike rezulton me mbi 47 milionë lekë për fushatën e tyre elektorale që nga zgjedhjet e prillit nxori 59 deputetë, që do të thotë se ka shpenzuar thuajse 3 herë më pak se socialistët. Partia sigurisht që ka ‘pjesën e luanit’ te shpenzimet.

Thuajse në të njëjtën shifër me demokratët është edhe Lëvizja Socialiste për Integrim. Fushata elektorale që në fund nxori katër deputetë i kushtoi LSI-së mbi 43 milionë lekë.

Kur ende afati i dorëzimit nuk ka skaduar mes partive të mbetura është edhe ajo Social-Demokrate e Tom Doshit, që në parlament përfaqësohet me tre deputetë, një më pak se LSI.

Me deklarimin e të gjitha të ardhurave dhe shpenzimeve nga të gjitha subjektet pjesëmarrëse në zgjedhje, grupi i audituesve në KQZ nis verifikimin e të dhënave dhe në fund del me një raport nëse janë gjetur pasaktësi apo deklarime të rreme.

SI.E./K.T./Shqiptarja.com
  • Sondazhi i ditës:

    Rritje pagash për mjekët, infermierët e mësuesit me 6% në vitin 2022, a është e mjaftueshme?

Komento


×

Lajmi i fundit

John

Vodhën energjinë elektrike, arrestohen 11 persona, 26 nën hetim, 14 të tjerë shpallen në kërkim