Nis punën Gjykata e Posaçme për Korrupsionin dhe Krimin e Organizuar! Ndryshojnë tabelat, vulat e uniformat, por jo ndërtesa

TIRANE- Me 16 gjyqtarë dhe në të njëjtën godinë ku u dhanë vendimet për Krimet e Rënda për 15 vite me radhë, nis sot punën Gjykata e Posaçme për Korrupsionin dhe Krimin e Organizuar.

Drejtimin e saj e merr gjyqtari Sandër Simoni i cili më herët ka drejtuar pikërisht Krimet e Rënda, po ashtu i pandryshuar ka mbetur edhe posti i kancelarit të cilin do të vijojë ta mbajë Saimir Shyti, deri në emërimin e kancelarit të ri të kësaj gjykate.

Ndërkohë tashmë drejt përfundimit janë edhe përgatitja e vulës së institucionit, emërtesat, tabelat orientuese për publikun, togat e gjyqtarëve, uniformat e nëpunësve deri tek serverat e sistemi i kamerave të vëzhgimit të cilat do t'i japin një tjetër fytyrë institucionit që do të marrë vendimet për çështjet më të rëndësishme me drejtësinë.

Kamerat e sigurisë janë një element i ri në këtë godinë, të cilat do të mbajnë në monitorim audio dhe video të gjithë ambientet e përbashkëta të saj.

GJKKO do marrë në dorë dosjet e bujshme të gjykuara më herët me nga Gjykata e Krimeve të Rënda. Me ngritjen e SPAK e cila 'shkrin' Prokuorinë e Krimeve të Rënda, është pikërisht Gjykata e Posaçme për Korrupsionin dhe Krimin e Organizuar që do të jepë vendim fajësie apo pafajësie për çështjet e hetuara prej saj.

 

TAG:
• gjykata e krimeve te renda
• spak
• GJKKO
• Gjykata e Posaçme për Korrupsionin dhe Krimin e Organizuar