Fluks në Portin e Durrësit, tragetet vijojnë me lundrimet e dyfishta! Turistët mbushin plazhet plot (VIDEO + FOTO)

DURRËS- Sezoni turistik vazhdon të sjellë turistë të shumtë, ndërsa Porti i Durrësit është porta kryesore e hyrjeve nga brigjet italiane, Bari dhe Ankona. Fluksi në portin e Durrësit vijon, ndërsa vetëm paraditen e ditën e sotme, sipas të dhënave që disponon Shqiptarja.com, kanë mbërritur 2 tragete nga Bari dhe 1 nga Ankona.

Në total 3 tragetet kanë sjellë 4203 pasagjerë dhe 1330 automjete, ndërsa në mbrëmje pritet të mbërrijnë edhe 2 tragete të tjerë nga Bari. Tragetet vazhdojnë të bëjnë 2 lundrime brenda ditës. Sportelet për përpunimin e trageteve në port funksionojnë me kapacitet të plotë, ku sot 28 sportele janë në punë.

Një situatë e tillë ka rënduar rrugët e qytetit sepse është rritur ndjeshëm numri i mjeteve që qarkullojnë në to. E njëjta situatë do të jetë edhe në ditët në vazhdim bëjnë të ditur në Autoritetin Portual të Durrësit.

Ndërkohë, kryeministri Rama ka ndarë në Facebook pamje nga turistët që kanë mbushur plot plazhet e Durrësit. Kreu i qeverisë prej ditës së djeshme po publikon pamje nga plazhet e mbushura me pushues, pas zërave të shumta që qarkullojnë se në Shqipëri nuk ka turistë.

Qyteti bregdetar i Durrësit mbetet një nga destinacionet kryesore të turistëve vendas e të huaj për të kaluar pushimet verore. Falë rërës së butë e detit të ngrohtë që zgjat nga muaji maj deri në shtator, si dhe aktiviteteve të shumta apo restoranteve që janë të hapura përgjatë gjithë vitit, plazhet e Durrësit janë nga më të frekuentuarat në Shqipëri.

Afërsia me Tiranën ka ndihmuar gjithashtu që banorët e kryeqytetit të kenë shkëputjen perfekte gjatë fundjavës më pak se një orë larg.

Disa nga plazhet më të frekuentuara janë; plazhi në Gjirin e Lalzit, Kepi i Rodonit, plazhi i Currilave, Kallmi, Plazhi i Karpenit në Spille, Golemi deri tek Shkëmbi i Kavajës, apo edhe Qerreti.

SI.E./Shqiptarja.com

TAG:
• porti i durresit
• sezoni turistik
• plazhe
• Durres