Vettingu: Thanza i ‘mbytur’ në prona, i lidhur me krimin dhe i dënuar në Itali. Gjyqtari përlotet para KPK

Gjyqtari Admir Thanza rrezikon të mbetet në 'rrjetën' e Vettingut, për një mori problemesh që nga mos justifikimi i pasurinë, lidhjet me elementë kriminalë dhe dënimi në Itali për vjedhje. Admir Thanza, gjyqtarë në Gjykatën e Lartë, është një figurë e rëndësishme e drejtësisë shqiptare, pasi ka pasur një karrierë në ngjitje në të gjitha shkallët e gjyqësorit.

Megjithëse atij Vettingu i zbuloi një mori me probleme, ato në asnjë rast nuk kanë përbërë problem për Kuvendin e Shqipërisë, i cili e ka votuar dy herë si gjyqtar në gjykatën Kushtetuese dhe atë të Lartë.

Mosjustifikimi i pasurisë, lidhje me elementë kriminalë dhe dënimi në Itali janë tre elementët kryesorë të raportit të thelluar të KPK, që pritet të 'djegin' gjyqtarin Thanza, i cili ka qenë i pranishëm në seancën dëgjimore së bashku me avokatin e tij, Theodhori Sollaku. 

Komisioni i Pavarur i Kualifikimit tha se për gjyqtarin Thanza është bërë Vetting në tre kollona, për pasurinë, për pastërtinë e figurës dhe për aftësitë profesionale. Ashtu si ILDKP, edhe hetimi i thelluar i KPK ka 'fundosur' Admir Thanzën, i cili rezulton pronar i disa apartamenteve, për të cilët nuk justifikon pasurinë, i proceduar penalisht për korrupsion, i dënuar në Itali me 40 ditë burg dhe 100 mijë lireta për vjedhje, dënim të cilin e ka fshehur në formularin e dekriminalizimit.

Në konkluzionet e ILDKP për gjyqtarin Admir Thanza rezultonte se:

LEXO EDHE:
KPA lë në fuqi shkarkimin e prokurorit të Beratit Tasim Puci, Vetingu lë jashtë dhe ndihmësin ligjor të gjykatës Administrative

1.     Deklarimi nuk është i saktë në përputhje me ligjin
2.     Nuk ka burime financiare të ligjshme për të justifikuar pasuritë
3.     Ka kryer fshehje të pasurisë
4.     Ka kryer deklarim të rremë
5.     Subjekti nuk gjendet në situatën e konfliktit të interesave


Gjyqtari i Gjykatës së Lartë, Admir Thanza sot para Vettingut

Vetë gjyqtari ishte i pranishëm në seancë, ku pranoi dënimin në Itali, duke thënë se ishte përfshirë në vjedhje për raporte humanizmi dhe për shkak të marrëdhënieve familjare. Ai deklaroi para trupës së KPK se ka pranuar dënimin për të shpëtuar jetën e nipit të tij. Thanza sqaroi se ka marrë përsipër një dënim të kunatës, vetëm që nipi i tij 9-vjeçar të kurohej në Itali, ndërsa ka shpërthyer në lot para trupës gjykuese. 

Ajo që më shqetëson është fakti që lidhet me pikën 17, që ka të bëjë me ekzistencën e procedimit penal. Pranova dënimin e djalit të vëllait tim. Mbrojta gjakun tim, një të mitur.  Nuk kuptova gjë, më thanë që do të ishte një gjobë. Fjala ime e fundit para gjyqtarit italian ishte ‘falenderoj gjykatën’. Kur doli ligji i dekriminalizimit shkova në Itali, mora një çertifikatë dhe më thanë që nuk ka asnjë problem me ty. Nipi im ishte 9-vjeçar dhe ju se imagjinoni që e bëra falë humanizmit. Nipi u kurua në Itali, nëse kunata ime do të ndalohej, ai rrezikonte. Nipi më thoshte ‘xhaxha të lutem më shpëto, a do të jetoj?’. Mora dënimin jo për të shpëtuar nënën e tij, por për të shpëtuar jetën e 9-vjeçari. Zoti i madh, mjekësia italiane, dhe ai fëmijë sot është 28 vjeç, është jurist dhe ka një vajzë. Mos më paragjykoni, më gjykoni njëlloj para Zotit, para ligjit.

Admir Thanza, gjyqtar i Gjykatës së Lartë

Sa i takon pronës në Shkodër, Thanza deklaroi se është djersa e tij dhe buka e fëmijëve të tij, ndërsa do të njihet me vendimin final të KPK më 17 korrik 2018, në orën 10:00.

Po, kisha dijeni për dënimin, e kam pranuar, për shkak të marrëdhënieve familjare dhe raporte humanizmi. Lidhur me pasurinë për pronën e blerë në vitin 2000 në Shkodër është djersa jonë, buka e fëmijëve të mi, e ardhmja e fëmijëve të mi. Kam humbur fëmijërinë e fëmijëve të mi, për shkak të punës, i jam përkushtuar punës. Ligji tenton ato pasuri, të cilat janë të pambuluara dhe burime jo të ligjshme. Në rastin konkret, që në kontratë ka vlerë të vogël, lidhet me gjendjen e pallatit. Unë asnjëherë nuk kam deklaruar 1.2 milionë lekë të atij pallati. Ju nuk do të deklaroni një pronë të dhuruar, kur e keni prej 2000. Edhe tani nuk e shes dot se si duket si pëlqeu blerësit. Mund të deklaroja unë një pronë të bërë si të dhuruar. Ajo kontrata ishte thjesht formalizim. Disa miq të mi më thanë që të sillja foto në KPK, por s’e gjykova të arsyeshme. Si mundet një garazh të bëhet kaq problem për jetën time. Ishte kontratë për të mundësuar një shitje. Ju them me sinqeritet se erdha personalisht, pasi ju vlerësoj.

Admir Thanza, gjyqtar i Gjykatës së Lartë

Gjyqtari i Gjykatës së Lartë, Admir Thanza sot para Vettingut

Ka qenë DSIK (Drejtoria e Sigurimit të Informacionit të Klasifikuar), që ka konkluduar se Thanza ka fshehur procedimin penal për korrupsion dhe se ka kontakte të papërshtatshme me krimin e organizuar. Trupa gjykuese që po vlerëson gjyqtarin e Gjykatës së Lartë përbëhet nga Brunilda Bekteshi, Lulzim Hamitaj dhe Olsi Komici. 

Gjyqtari ka një apartament banimi me sipërfaqe 136 m2 në rrugën ‘Zogu i Parë’, në Shkodër. Për këtë apartament ka një anomali, njëherë është shkruar 1.2 milionë lekë blerja dhe 1.8 milionë lekë rikonstruksioni. Pastaj është shënuar +18 m2. Ky formular është ndryshuar dhe pse ka qenë i dorëzuar në ILDKP. Vlera e apartamentit e deklaruar nga Thanza nuk përputhet me çmimin e kontratës së shit-blerjes që është 1.2 milionë lekë. Në deklarimin e vitit 2004 mungon deklarimi i një garazhi, që e ka deklaruar në deklaratën e Vettingut.

Gjyqtari Thanza nuk ka justifikuar burimet për blerjen e këtij apartamenti. Çmimi mesatar në vitin 2000, sipas Hipotekës, ka qenë më i ulët nga ç’thotë gjyqtari. Gjithashtu, Thanza ka dhe një apartament me sipërfaqe 113 m2 te Komuna e Parisit, në Tiranë. Ky apartament është deklaruar nga z. Alibali, e cila bashkëjeton me gjyqtarin. Edhe në këtë apartament ka diferenca, njëherë është deklaruar 1.9 milionë lekë, njëherë 4 milionë lekë.

Apartament dubleks në Gjirin e Lalzit. Ka dhe një garazh te Komuna e Parisit. Këtë pasuri gjyqtari nuk e ka deklaruar asnjëherë më parë. Këtë e deklaroi vetëm për Vettingun. Për garazhin Thanza ka thënë thjesht se e ka harruar. Thanza dhe bashkëshortja kanë mungesë të burimeve të ligjshme financiare. Ka diferencë të madhe të të ardhurave e shumave të shpenzuara. Për vitet 1992-2003 ka minus mbi 2 milionë lekë. Në vitin 2003 ka minus 3 milionë lekë. Ka shumë prona dhe nuk i justifikon me rrogën. E ka falsifikuar formularin e deklarimit të shtëpisë në Shkodër. Familja Thanza nuk ka pasur para të blejë këto prona që ka.

DSIK ka thënë se gjyqtari Thanza nuk ka deklaruar procedimin penal në ngarkim të tij, pra ka fshehur procedimin penal për korrupsion. Sipas DSIK, Thanza ka kontakte të papërshtatshme me krimin e organizuar.

Thanza na është përgjigjur se as ai dhe as familja e tij nuk kanë marrë dhurata mbi 500 euro. Nga kontrata e dhurimit të datës 22 prill 2017 rezulton se Shoqëria ‘Curri sh.p.k’ i ka dhuruar gjyqtarit një garazh për 18 m2. ‘Curri sh.p.k’ ka qenë palë në Gjykatën e Lartë në vitin 2017, kur Thanza ishte relator i dosjes. Kjo çështje është mbyllur më 6 mars 2018. Thanza ka gënjyer pas informacionet e marra nga Gjykata e Lartë. Gjyqtari Thanza ka gënjyer edhe në formularin e dekriminalizimit. Nga një informacion jashtë vendit, Thanza ka qenë i dënuar në Itali në vitin 1999 për vjedhje me 40 ditë burg dhe 100 mijë lireta.

Raporti i KPK

Admir Thanza është anëtari i dytë i Gjykatës së Lartë që i nënshtrohet procesit të Vettingut, pas gjyqtarit Edmond Islamaj, i cili kaloi me sukses filtrat e Vettingut, duke u konfirmuar në detyrë.

TAG:
• vettingu
• KPK
• admir thanza

Sondazhi i ditës:

Rithemelimi propozon rikthimin e koalicioneve të vjetra, a jeni dakord?

• Po

  19.2%

• Jo

  72.2%

• Nuk e di

  8.6%

Vota total: 3102

• Sondazhi i ditës:

  Rithemelimi propozon rikthimin e koalicioneve të vjetra, a jeni dakord?

  Po Jo Nuk e di