Guvernatori Sejko: Dëmi prej pandemisë, fillimi i vaksinimit do të përmirësojë ekonominë

Guvernatori i Bankës së Shqipërisë Gent Sejko ka marrë pjesë në forumin për vendet e Evropës Qendrore dhe Lindore, të organizuar nga ”Euromoney”. Në fokus të diskutimeve mes homologëve të bankave qendrore ka qenë pandemia dhe masat e marra për të mbështetur financiarisht bizneset dhe qytetarët.

Në fjalën e tij guvernatori ka thënë se sektori bankar ka pasur një barrë të madhe në gjithë vitin 2020, dhe ka luajtur rol të rëndësishëm në kapërcimin e sfidave ekonomike.

Sejko ka thonë se ndikimet negative pritet të jenë afatshkurtra dhe kthimi duhet të jetë i shpejtë nëse situata me vaksinimin ndaj COVID-19 shkon drejt normalizimit.

Për guvernatorin, shtyrja e pagesave të kësteve të kredisë, ristrukturimi i tyre, heqja e tarifave të transaksioneve apo edhe ulja e normës bazë të interesit kanë ndikuar pozitivisht në kapërcimin sa më të shpejtë të situatës.

“Ky sektor iu përgjigj pozitivisht dhe në mënyrë aktive vendimit për shtyrjen e pagimit të kësteve të kredisë për kategori të caktuara huamarrësish dhe ristrukturimit të kredive për kategori të tjera, e cila ka zhvendosur një pjesë të barrës financiare të krizës në bilancet e këtij sektori. Ndërkohë, rritja e kreditimit ka vazhduar dhe ka ndihmuar me likuiditet bizneset dhe familjet në vështirësi të përkohshme, si dhe ka mbështetur vijimin e investimeve”, ka thënë guvernatori.

K.T./Shqiptarja.com

TAG:
• banka e Shqiperise
• ekonomia
• koronavirusi ne shqiperi
• Vaksina anti Covid