Haradinaj: Kosova e Shqipëria të bashkëpunojnë për të dalë e vërteta e luftës së UÇK! Nëse s'pranojnë kandidaturën time për President, shkojmë në zgjedhje (VIDEO)

Ramush Haradinaj tha se në lidhje me projektin e Minishengenit do të donte që aspektet e saj të bashkëpunimit ekonomik dhe në drejtime të tjera të ndodhin fillimisht mes Kosovës dhe Shqipërisë dhe më pas me rajonin.

"Edhe këtu është aspekti kohe i rëndësishme, nuk është se do të ndodh njëkohësisht në të gjitha aspektet e veta dhe në të gjitha drejtimet. Ata aspekte të Minishengenit duhet të ndodhin fillimisht Kosovë-Shqipëri që ekonomitë dhe sistemet tona të unifikohen në mënyrë që kur të hapemi në rajon të hapemi si një treg më i madh. Shqipëria le ta hapet për të gjithë rajonin, kjo nuk e shqetëson Kosovën, se i bie dhe me ne. Kosova ka dinamikat e veta dhe do kohë të hapet me Maqedoninë apo Malin e Zi", tha Haradinaj.

Duke folur për ndarjen e Kosovës, ish-kryeministri Ramush Haradinaj deklaroi në emisionin "5 pyetjet" nga Babaramo se ai ishte një projekt rajonal dhe jo i SHBA-së. Por tashmë ai beson se përderisa më parë kanë dështuar për ta realizuar, tani do jetë akoma më e vështirë.

"Bashkëpunimi Kosovë-ShBA. 2 administratat republikane dhe demokrate kanë pasur komunikim të vazhdueshëm me Kosovën. Administrata Trump na dha një mbështetje të mirë. Shpresoj që dhe me Presidentin Biden të kemi të njëjtën marrëdhënie. Ndarja e Kosovës ka qenë një projekt ballkanik. Nuk mund t'i vendosim faj SHBA-së duke kërkuar ndarjen e Kosovës. Mundet që lider të ndryshëm të kërkojnë përpjekje të tilla. Do ta kenë më të vështirë jashtë rajonit për një formulë të tillë. Ata që donin ta bënin këtë e humbën rastin e tyre" - tha Haradinaj.

Për ish-kryeministrin Ramush Haradinaj, rrëzimi i qeverisë Kurti ishte vetë faji i kreut të Lëvizjes Vetëvendosjes. Ai thotë se Kurti humbi besimin tek aleati i tij, çka bëri që të humbë dhe shumicën në Parlament.

"Marrëdhëniet mes palëve politike janë kontrata dhe janë të vullnetshme. të gjithë mendonin se Kurti do ishte i fuqishëm por ai e humbi shpejt besimin e aleatit të vet. Mendoj që qeverinë Kurti e rrëzoi vetë ai. Është përgjegjësia e kryeministrit që të mbajë shumicën e vetë. Ai ka negociuar në kohën e Grenell dhe Thaçit dhe ka krijuar një shumicë. Nëse Grenell dhe Thaçi nuk donin që të bëhej Kurti nuk do e kishin lejuar që në fillim. Por është vetë faji i Kurtit" - tha Haradinaj.

Ramush Haradinaj tha se AAK i ka paraqitur partive të tjera kandidaturën e tij për President në mënyrë që të gjendjet një zgjidhje dhe vendi të mos shkojë në zgjedhje të parakohshme për shkak të dorëheqjes së Hashim Thaçit pas akuzave për krime lufte nga gjykata speciale në Hagë. Haradinaj thotë se nëse nuk ka marrëveshje për kandidaturën e tij, do të shkojnë në zgjedhje.

"Zgjedhjet janë zgjidhje politike, nuk mund të precizojë se si do të shkojnë diskutimet mes partive politike. Ne si AAK kemi ofruar një opsion dhe kemi ofruar një kandidaturë që është e imja. Do të kemi diskutime të ndërsjellat dhe nëse nuk arrihet të ketë një dakordim rreth kësaj formule do kemi zgjedhje. Kjo është çështje negocimi mes partive dhe nëse kanë interesim, nëse jo ne i kemi të rregulluar këto procese do të kemi zgjedhje. Ne kemi zgjedhjet po qe se nuk ka marrëveshje, por me ndihmuar arritjen e një marrëveshje kemi nxjerrë një propozim dhe një opsion dhe kemi nxjerrë kandidatin dhe argumente pse. Nëse nuk ka marrëveshje me opsion që kemi dhënë, mbetet opsioni legjitim dhe i barabartë për të gjithëve që janë zgjedhjet", tha Haradinaj.

Ish-kryeministri Ramush Haradinaj tha se Gjykata Speciale e Hagës duhet të funksiononte në Kosovë ashtu siç kërkonin më parë. Tani është në dorën e avokatëve, shprehet Haradinaj. Ai shprehet i bindur se përsa kohë prokuroria nuk paraqet fakte në Gjykatë nuk mund të vërtetohen akuzat.

Haradinaj i bën thirrje Shqipërisë dhe Kosovës që të jenë në mbështetje të palës kosovare për të dëshmuar të vërtetën mbi luftën. Ndër të tjera ai thotë se vetë Haradinaj nuk është më subjekt hetimi dhe se nuk ka pasur më komunikim nga Haga.

"Ka pasur një lëvizje në Parlament prej deputetëve për kalimin në një formulë të re të kësaj gjykate me seli në Kosovë. Ishte vonë ai veprim, ishte jo mirë i përgatitur dhe i ndërtuar dhe krijoi mesazhe të gabuara sikur Kosova donte t'i ikte drejtësisë. Aleatët, ShBA ka shprehur mendimet e tyre. Ata thanë se Kosova kishte diçka për të fshehur. Na kanë treguar që kjo nuk është një punë e mirë. Aleatët na kanë thënë merre ose lëre. Ne e kemi votuar. Kam kërkuar që të bëhej një gjykatë në Kosovë dhe të mos jetë një etnike. Edhe ne duhet të kryenim hetimet këtu në Kosovë. Tani është çështja e ekipit mbrojtës se si dëshmojnë. Nga salla e gjyqit duhet të bëjmë kujdes. Nuk është teatër. Duhet të fokusohemi tek ekspertiza. Kosova dhe Shqipëria duhet të mbështesë këtë Gjykatë për të dëshmuar të vërtetën e luftës së Kosovës.

Mendoj që këto procese nuk janë të lehta. Do e ketë të vështirë mbrojtja. Barra për të dëshmuar fajësinë është e prokurorisë të cilët përveç akuzave duhet të paraqesin fakte. Fokusimi duhet të jetë tek ndihma e këtyre gjykatësve dhe njerëzve që të kuptojnë zhvillimin e luftës. Ne kemi qenë një palë të dalë nga një shtet i paarmatosur. Kemi filluar mobilizimin për të mbrojtur veten tonë. Aktualisht nuk jam subjekt i hetimeve të mëtejshme. Nuk jam palë me këtë gjykatë. Nga të gjithë atë që komunikojmë nuk ka një dyshim. Nuk ekzistoj më në vëmendjen e tyre" - tha Haradinaj.