INVESTIGIMI/ Historiku i 10 pallateve të mallkuara që u shembën dhe zunë nën rrënoja banorët në Durrës dhe Thumanë (VIDEO)

Janë shtatë ndërtesat në Durrës dhe tre ato në Thumanë krejtësisht të shembura për shkak të tërmetit të 26 nëntorit. Në pritje që institucionet të përfundojnë monitorimin e qindra pallateve dhe banesave të tjera që u dëmtuan, por që, duke qenë se nuk u shembën krejtësisht, nuk shkaktuan viktima, emisioni investigativ “Pa Gjurmë” i cili do të transmetohet sonte në Report TV, ka hedhur dritë mbi historinë e këtyre 10 ndërtesave të mallkuara, shumë prej të cilave të ndërtuara në mënyrë abuzive dhe në shkelje të ligjit. Pallatet e ndërtuara sipas rregullave, në fakt, janë projektuar për të përballuar tërmete deri në 7-8 ballë, një rregull ky, që është respektuar në përgjithësi në Shqipëri dhe kjo shpjegon përse tërmeti i 26 nëntorit, si dhe ai i shtatorit, nuk sollën një bilanc edhe më dramatik.

1)    Hotel Miramare Durrës: Sikurse ka zbuluar gazetari i Shqiptarja.com Elton Qyno, hoteli krejtësisht i shembur ishte ndërtuar në vitet 1998-1999 në zonën e plazhit. Në fillim u ndërtua me dy kate, pastaj, me një seri ndërhyrjesh abuzive, nisi të merrte lartësi. Në vitin 2001 policia ndërhyri për të bllokuar një kat shtesë pa leje, por pastaj shteti e harroi problemin dhe në momentin e shembjes hoteli ishte bërë me 6 kate. Por themelet ishin parashikuar për vetëm dy kate dhe nuk mundën të mbajnë peshën kur erdhi lëkundja, që shembi gjithshka. Në këtë godinë humbën jetën dy persona, balerina dhe baristi.

2)    Pallati 5 kate + 1 papafingo Lagja 16 (stadiumi) - Durrës: ndërtesa u bë vetëm për familjen e Perikli Konomit në vitet 1994-1996. Në të banonte familja Konomi dhe tri familje që kishin marrë me qira tre apartamente. Por ka dyshime se ndërtesa ishte projektuar pa konsulencën e ekspertëve dhe pa respektuar normat e kërkuara teknike e për këtë arsye nuk e përballoi lëkundjen. U shuan dy familje, 7 persona.

3)    Pallati 6 kate "2 Gjelat"- Lagja 5 Durrës : pallati u ndërtua në vitin 1986 me punë vullnetare nga Ndërmarrja e Ujrave, në kohën e regjimit komunist. Ka mundësi që ndërtesa të ketë patur difekte strukturore, siç ndodhte shpesh në zbatimin e punimeve “vullnetare”, në të cilat detyroheshin të punonin studentë e punëtorë: përdorimi i fuqisë punëtore pa përvojë shpesh prodhonte “pallate” të ndërtuara keq dhe për këtë arsye u mungonte edhe siguria e duhur. Kollonat mbajtëse nuk e kanë përballuar lëkundjen dhe një kat i pallatit u fundos, prej çfarë e pësoi vetëm kush banonte në katin e parë. Sipas gazetarit Arsen Rusta, një nga kolonat e pallatit është hequr nga disa persona për të krijuar hapësirë për një lokal. Në këtë pallat vdiqën 2 gra

4)   Hotel Villa Palma - Durrës: hoteli u ndërtua në 2000-2001, fillimisht me një leje për tre kate. Më pas edhe ky hotel filloi të ngrihej në lartësi dhe, në sajë të një lejeje të re, iu shtuan edhe tre kate. Tani arriti në shtatë kate. Por, si dhe në rastin e Hotelit Miramare, kollonat e themeleve ishin projektuar për të mbajtur vetëm tre kate dhe katër katet shtesë e kishin dobësuar gjithë strukturën, duke shkaktuar më në fund shembjen.

5)   Hotel Tropikal - Durrës: Hoteli Tropikal u ndërtua në vitin 1998 pa leje. Në vitet më pas i kishin shtuar kate të tjerë. Edhe në këtë rast, themelet nuk e mbajtën peshën e shtuar dhe nuk e përballuan lëkundjen. Vdiqën 2 persona, vëllezërit kosovarë

6)   Pa leje ishin edhe Hotel Apollonia e Hotel Lubjana, të ndërtuar gjithnjë në zonën e plazhit në Durrës në të njejtën kohë me Hotel Tropikalin, të cilët u shembën pjesërisht, por pa shkaktuar viktima.

7)    Konvaleshenca e Ministrisë së Brendshme – Durrës: Godina fillestare ishte ndërtuar në vitet 1986-1991 nga Ndërmarrja e Ndërtimit të Durrësit, në vitet e fundit të regjimit komunist. Struktura mbeti e papërfunduar deri në fund të vitit 2006, kur Ministria e Brendshme vendosi të investonte për përfundimin e saj. Godina e re, pjesërisht e shembur më 26 nëntor, ishte përfunduar në vitin 2008. Vdiq 1 person, komisari, pedagog në Akademinë e Sigurisë

8)    Godina 4 katëshe – ish-Këneta Durrës: kati i parë i godinës u ndërtua pa leje në vitet 1997-1999. Në vitet më pas u shtuan edhe kate të tjerë për të strehuar anëtarët e tjerë të po asaj familjeje dhe arriti në katër kate. Por themelet edhe në këtë rast ishin projektuar vetëm për një kat dhe ndërtesa u shemb. U shua një familje me 8 veta

9)    Tre pallatet në Thumanë (Fushë Krujë): Sikurse zbuloi gazetari investigativ i Shqiptarja.com Elton Qyno, tre godinat, të cilat u ndërtuan në kohën e regjimit komunist me punë vullnetare, që nga viti 2010 ishin vlerësuar nga autoritetet në rrezik rënieje. Sipas burimeve ende të verifikuara, të tre pallatet ishin deklaruar edhe të pabanueshme, një pjesë e strukturës ishte vjedhur dhe dobësuar, por megjithëkëtë ndërtesat vazhdonin të ishin të banuara. Deri natën e tërmetit dhe të shembjes.  Në Thumanë humbën jetën më shumë se 20 persona

/b.ha./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Linda: 29/11/2019 21:39

    Pallati 6 katesh qe thoni ju eshte bere ne 92 dhe e kishte zili gjithe durrrsi, cfare flisni ....e njihni ju kete zoterine ?? Ngushellime familjes

    Përgjigju
  • Kavajsi: 28/11/2019 22:30

    Z.RAMA JE KRYEMINISTRI ME i PERGJEGJSHEM QE KEMI PATUR NDONJEHERE,,,PRANDAJ MERR MASA QE KETO SHKATARRIME NGA TERMETI TE MINIMIZOHEN,,;SE ATO NUK MUND TI MPOSHTIM 100%....SI MASA E PARE DUHEN TE SHEMBESH TE GJITHA PALLATET E NDERTUARA NE RERE NE PLAZHIN E DURRESIT NGA TEUTA E DERI NE QERRET QE KANE KRISJE DHE SHKATARRIM TE STRUKTURAVE,,DHE ATO SHTEPI NE KENETE ME PO KETE SHKATARRIM,,,MOS KI MESHIRE PER KETO PALLATE DHE SHTEPI ,,SEPSE E PARA ESHTE JETA E NJERIUT,,SI MASE E DYTE BLLOKIMIN E LEJEVE TE NDERTIMIT NE DURRES E PLAZHE PER 5 VJET,,BILES NE TOKE RANORE AFER PLAZHIT TE MOS JEPEN ME LEJE AS PER PALLAT,,AS PER HOTEL,,,DUHET TE RIKTHEJME SHTETIN NE FUKSIONIN E TIJ REAL,,,VETEM TEK TI EDI RAMA E KEMI KETE SHPRESE,,SEPSE I KE DHENE PROVAT,,,KURSE SI MASE E TRETE TE NXIRREN PARA PERGJEGJSISE PENALE TE GJITHE KRYEBASHKIAKET DHE ZYRAT URBANISTIKE TE BASHKIVE PER DHENIE LEJESH KRIMINALE DHE DERGIM I TYRE NE GJYGJ ME AKUZA NE BAZE TE EKSPERTIZES,,CDO GJE KA DATA DHE EMRA,,DUHET DENIM SHEMBULLOR PER KETA NDYRESIRA,,PO NE HETIM TE VIHEN SIZMIOLOGET DHE INXHINJERET ZBATUES....

    Përgjigju
    • Turi: 29/11/2019 00:11

      E sakte

  • Sondazhi i ditës:

    Si do jenë ndryshimet në Kodin Zgjedhor që do bëjnë PS-Rithemelimi?



×

Lajmi i fundit

Masakra në Moskë me 143 të vdekur, Ankaraja: Sulmi i ISIS i pamundur pa ndihmën e shërbimeve të huaja

Masakra në Moskë me 143 të vdekur, Ankaraja: Sulmi i ISIS i pamundur pa ndihmën e shërbimeve të huaja