Hotelet në informalitet/ 2.3 milionë turistë në 4 muajt e parë të vitit, vetëm 13% të deklaruar

Më shumë të huaj që vizitojnë vendin tonë po flenë në strukturat akomoduese. Të dhënat e fundit të INSTAT, tregojnë se vetëm në muajin prill 129.732 shtetas jo rezident u akomoduan në strukturat, me rritje prej 91.9% në raport me prillin e vitit të kaluar. Gjatë muajit prill një i huaj ka fjetur mesatarisht në Shqipëri 2.1 net, duke u rritur në raport me vitin e kaluar.

Rritja e numrit të turistëve dhe i netëve të qëndrimit në strukturat akomoduese lidhet edhe me masat e marra nga shtetit, i cili rishikoi ligjin dhe ashpërsoi gjobat për bizneset që nuk deklarojnë numrin real të pushuesve.

Ndërkohë sa i takon periudhës janar-prill në hotele, bujtina, agroturizma janë akomoduar në total 302.365 të huaj. Shifër kjo shumë më e ulët se numri total i të huajve që kanë hyrë në vend përgjatë katër muajve. Sipas INSTAT, nga janari në prill në vend kanë hyrë 2,329,242 të huaj. Pra rezulton se vetëm 1 nga 7 turistë të huaj që vizituan vendin ka qëndruar në strukturat akomoduese.

Sipas ekspertëve të fushës, shkaqet për këto diferenca ku ngrihet pikëpyetja se ku janë akomoduar 2 milionë turistët e tjerë, janë disa. Së pari, është informaliteti i lartë në sektor ku edhe struktura të paregjistruara japin dhoma, apartamente apo bujtina me qira, dhe një pjesë e turistëve qëndrojnë në këto ambiente. Së dyti edhe strukturat e regjistruara mund të mos deklarojnë numrin real të shtetasve që kanë akomoduar. Së treti, një pjesë e këtyre shtetasve jo rezident mund të jenë shqiptar me nënshtetësi dhe qëndrojnë tek të afërmit e tyre dhe së fundmi, një pjesë e madhe e turistëve janë kalimtar, pra qëndrojnë disa orë e largohen siç ndodh me qytetarët nga Kosova apo Maqedonia e Veriut.

Përtej këtyre diferencave në shifra, ekonomia vijon të përfitojë miliona euro nga industria e turizmit. Vetëm në tre muajit e parë të vitit turistët e huaj kanë shpenzuar në Shqipëri 788 milionë euro, nga 624 milionë euro që ishte vlera në janar-mars 2023. Ndërkohë shqiptarët që kanë dalë jashtë vendit në këtë tremujor harxhuan 521 milionë euro, nga 435 milionë euro që ishte vlera e shpenzimeve vjet.

Pritshmëritë janë që këtë vit vendi të vizitohet nga 14 milionë të huaj, dhe të ardhurat të kapërcejnë shifrat e vitit të kaluar. Ndërsa Ministria e Turizmit raporton se ecuria pozitive ka vijuar edhe në maj, pasi për 5 muaj janë 3.3 milionë të huaj të ardhur në Shqipëri.

TURIZMI NË SHQIPËRI

Turistë             2,329,242 të huaj

Regjistruar          302.365 të huaj

Pa-regjistruar     2,026,877 të huaj

SHPENZIMET E TË HUAJVE

Janar-Mars 2023          624 mln euro

Janar-Mars 2024          788 mln euro

Rritja                          +164 mln euro

SHPENZIMET E SHQIPTARËVE

Janar-Mars 2023              435 mln euro

Janar-Mars 2024              521 mln euro

Rritja                               +86 mln euro

M.Q./E.H/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Kuvendi kërkon që Greqia të heqë ligjin e luftës, si e vlerësoni?



×

Lajmi i fundit

Bien sistemet e Microsoft, Aeroporti i Tiranës: Të paprekur nga kriza globale e sistemeve kompjuterike

Bien sistemet e Microsoft, Aeroporti i Tiranës: Të paprekur nga kriza globale e sistemeve kompjuterike