“Korrupsioni në drejtësi dhe masat për ta çmontuar atë nuk mund të trajtohet si një çështje e brendshme e KLD. Kjo është një çështje e të gjithë shqiptarëve.”-thuhet në deklaratën e INFOÇIP.
Reagimi i INFOÇIP lidhet edhe me çështjet e diskutuara në mbledhjen e djeshme të cilat ishin me interes të jashtëzakonshëm publik, e megjithatë shqiptarët u lanë në terr informativ nga KLD.
“Interesi i trupës gjyqësore dhe i gjithë qytetarëve shqiptarë nuk mund “të kënaqet” me deklarata për shtyp, por duke i lejuar ata të jenë vetë dëshmitarë okularë të diskutimeve në KLD.”-theksohet në deklaratë.
Sipas INFOÇIP hapja e mbledhjeve ndaj publikut është në interesin më të mirë edhe të vetë KLD, pasi nëse debatet do të zhvillohen në sytë e publikut ato nuk lënë shteg për teori konspiracioni.
“Hapja e vendimmarrjes, sidomos kur ajo është kritike ndaj vetvetes është kusht që publiku të prodhojë besim ndaj KLD, kurse vetë kjo e fundit të vuajë më pak paranojën për komplote, fushata denigrimi, agjitacion dhe propagandë që “inskenohen” kundër saj. Paranoja ndaj “rrezikut të jashtëm” është tipar i strukturave të mbyllura. KLD duhet të zgjedhë njëherë e mirë të jetë një strukture e hapur, pasi vetëm kështu ajo mund të kërkojë dhe të pretendojë mbështetjen e publikut në realizimin e misionit të saj ligjor.”- thuhet më tej në deklaratën për mediat.
Gjithashtu në reagimin e Qendrës për Çështje të Informimit Publik thuhet se hermetizmi e dëmton KLD-në edhe në raportet e saj me faktorin ndërkombëtar, i cili, ndoshta për këtë arsye, në vlerësimet që harton manifeston paqartësi serioze si në kuptimin e rolit ligjor të KLD ashtu edhe të përgjegjësisë së kesaj të fundit lidhur me korrupsionin shumë të shprehur në radhët e gjyqësorit.
INFOÇIP konstaton se ligji nuk detyron në asnjë rrethanë KLD të zhvillojë mbledhje të mbyllura, edhe praktika e derisotme ofrojnë modele të suksesshme të hapjes së vendimmarrjes nga KLD.
INFOÇIP fton KLD ta zhvillojë të hapur për median dhe për publikun mbledhjen e saj të radhës, prania e vëzhguesve të akredituar në çdo mbledhje të KLD nga aktorë të shoqërisë civile të konsiderohet si një opsion alternative.
"Në të kundërt, pozitat e saj në sytë e publikut do të rëndoheshin edhe më shumë. Shqiptarët e kanë mësuar në këto vjet se aty ku nuk futen rrezet e transparencës, mbin myku i korrupsionit."-përfundon deklarata e INFOÇIP.
Redaksia Online
(a.h/shqiptarja.com)