Itali/ Aksidenti tragjik i mori jetën 8-vjeçarit shqiptar për Krishtlindje, prindërit: U shua drita e jetës sonë! Ishte buzë rrugës me ne kur u përplas nga makina

Një aksident tragjik i mori jetën 8-vjeçarit me origjinë shqiptare, Oriel Skura ditën e Krishtlindjes pasi bashkë me familjen kishte shkuar për të festuar me disa të afërm. Pas drekës, rreth orës 15:00, të gjithë dolën nga shtëpia dhe teksa po përshëndeteshin buzë rrugës, i mituri u përplas për vdekje.

Ai kishte hipur në makinën e të atit, por doli sërish pasi e thirri kushëriri. Ai ishte takimi i tyre i fundit pasi makina tip Peugeot me shpejtësi përplasi 8-vjecarin duke i marrë jetën. Fëmija u dërgua me urgjencë në spital teksa shoqërohej me thirrjet plot dëshpërim të prindërve. Prindërit kanë rrëfyer ngjarjen duke thënë se u shua drita e jetës së tyre.

“Orieli nuk luante futboll në rrugë, ai ishte në anë të rrugës me ne dhe të afërmit tanë. Si ka mundësi që shoferja nuk arriti të frenonte në orën 3 pasdite kur nuk duhet të ecim më shumë se 50 km/h? Ajo shoi dritën e jetës tonë përgjithmonë. Orieli ishte dielli i shtëpisë dhe i familjes sonë, ai kishte një energji pozitive me të gjithë, përqafoi këdo që e trajtonte me përzemërsi dhe dashuri. I pëlqente të festonte, vallëzonte dhe të shijonte çdo moment të jetës së tij”, ishin fjalët e prindërve për djalin e vogël që jetonte në Noicattaro. Orieli la pas motrën e tij më të vogël 5 vjeçe, prindërit dhe gjyshërit.

LEXO EDHE:
VIDEO/ Rrëzim dramatik për çiklistin, përplas kokën me shtyllën! Kaska i shpëton jetën

Prindërit shtuan se shkojnë çdo ditë në varreza, ku gjejnë gjithmonë njerëz që e vizitojnë.

Gruaja që drejtonte makinën e përfshirë po hetohet për vrasje me automjet. Kamerat e sigurisë nga vendi i ngjarjes janë sekuestruar nga policia që do të ndërtojë dinamikën e aksidentit tragjik.

A.M./Shqiptarja.com

TAG:
• krishtlindje
• aksident me vdekje
• itali
• oriel skura