5 orë debat pa dakordësi për listat në Këshilli Politik! Rama nuk tërhiqet, PD kundër: Kur do votohet 5 Qershori? Hajdari thirrje Bashës: Hajde vetë, mos dërgo Bardhin

Kryeministri Rama tha se nuk e ka aspak problem se kë ka përballë nga opozita jashtëparlamentare për të diskutuar në Këshillin Politik, pasi për të e rëndësishme është përmbajtja e çështjes dhe jo e delegacioneve.

"Unë personalisht shoh se në këtë rast është shumë më e rëndësishme përmbajtja e çështjes se sa  përmbajtja e delegacioneve. Është zgjedhje e opozitës jashtëparlamentare të përfaqësohet me këdo që dëshiron, mjafton që kush vjen këtu ka një mandat përfaqësimi të opozitës jashtëparlamentare, për mua nuk ka problem, është njësoj. S'ka asnjë dallim se është Bardhi apo Basha", tha Rama

Sekretari i përgjithshëm i PD-së Gazment Bardhi deklaroi se PS-ja është kthyer pas për të rihapur edhe njëherë marrëveshjen e 5 Qershorit. Numri dy i PD-së, e cilësoi si të papranueshme nismën për hapjen e listave dhe ndalimin e koalicioneve. Bardhi tha se i kërkoi Edi Ramës dhe pret informacion zyrtar kur do ta votojnë paktin e 5 qershorit. Ndryshe nga deklaratat e mëparshme Bardhi tha se PD-ja i qëndron marrëveshjes së Qershorit.

"Sikur jeni në dijeni prej 6 muajsh, këshilli politik ka qenë në punë të vijueshme, në 5 qershor palët nënshkruan marrëveshjen dhe ne sot i kërkuam informacion kryetarit të PS-së për angazhimin e tij për miratimin pa ndryshime të paktit në Kuvend, nuk morëm përgjigje, se kur votohet pa ndryshime. Së dyti konfirmoj se i qëndrojmë marrëveshjes së 5 qershorit, nga ajo jo të gjitha palët morën gjithcka që kërkuan, por ishte konsensuale. Sot na u konfirmua se duhet të rihapim cështje që kemi rënë dakord në 5 qershor, por nuk mund të hedhim në kosh punën 6 mujore.

Ndërkombëtarët harxhuan orë dhe ditë të tëra pune për produktin, por na u pohua nga PS-ja që të rihapë cështje me të cilat kemi rënë dakord. U rikthyem prapë te administrimi i zgjedhjeve. Kërkojmë nga palët që kanë firmosur të jenë serioz. Cështja e respektimit të marrëveshjes nuk është më e brendshme, por kusht për nisjen e bisedimeve me BE-në. Ne i qëndrojmë 5 qershorit, duhet ti qëndrojnë edhe palët e tjera. Për ne është e papranueshme që të ndryshohet.

Një parti që firmos një marrëveshje duhet ti qëndrojë. Ne nuk kemi kërkuar kohë, ne i kemi dhënë kohë kryeministrit, që të na informojë zyrtarisht se kur do të kalojë për miratim pa ndryshime kodi që ne kemi bërë. Besoj që edhe ju e dini se nuk ka ende një datë. Ndryshimet e njëanshme minojnë dakordësinë e parë" tha ai.

Kryeministri Edi Rama vlerësoi formatin e Këshillit Politik që është ngritur dhe ku po diskutohen cështjet zgjedhore. Duke 'thumbuar' opozitën jashtë parlamentit, Edi Rama tha se nga do që të rrotullohesh, rrugët në demokraci të çojnë në tryezë.

"Nuk jam për të komentuar se cfarë keni dëgjuar nga brenda për këtë arsye diskutimi në këtë tryezë ishte pa media, që të gjitha palët të diskutojnë lirisht, gjë që ka ndodhur, shumë mirë që ka ndodhur, është një format i mirë, që duhet ta ruajmë dhe mbajmë, se jeta politike nuk mbaron në fund të korrikut dhe nga do që të rrotullohesh, rrugët në demokraci të çojnë në tryezë, sado ti marrësh malet fundi është në tryezë. Kjo tryezë ka potencial të rëndësishëm që do të përpiqemi ta shfrytëzojmë. Nuk e di cfarë duhet të lëshojë më PS-ja, pasi në të gjitha kemi mbajtur pozicion të ekuilibruar dhe me shqetësimin që produkti të jetë gjithëpërfshirës. Po të shikonim interesin tonë do të kishim kërkuar tjetër gjë, jo këto në tryezë" tha ai.

Rudina Hajdari tha se në mbledhje diskutimet ishin të gjata por që nuk kishte asnjë reflektim nga ana e opozitës jashtëparlamentare për ndryshimet kushtetuese. Ajo i bëri thirrje Bashës të rreshtohet në anë e duhur të historisë dhe të vijë në këshillë pasi demokratët nuk mund të përfaqësohen nga një person që ka marrë zero vota duke iu drejtuar Gazment Bardhit.

"Sot erdhëm për të diskutuar mbi ndryshime kushtetuese dhe opozita jashtëparlamentare  të kishte ardhur me një axhendë reflektuese. Listat e hapur i kërkojnë 85 % e shqiptarëve, por ajo që ndodhi ishte diskutimi mbi marrëveshjen e 5 qershorit dhe asnjë reflektim  për listat e hapura. Thirrje Bashës që të mos i rreshtojë demokratët në rresht me ata njerëz që duan listat të mbyllura, por në atë rresht që duan lista të hapura. Përndryshe do të kenë në anën e keqe të historisë , pasi kjo është një ndryshim thelbësor për shoqërinë dhe do të ndihmojnë opozitën për ndryshime thelbësore. Ke bërë premtime pas premtimi që do mbështesë listat e hapura, ky është shansi ytë dhe rreshto opozitën në këtë kauz, mos u rreshto me Rudina Hajdarin apo Myslim Murrizin, por me qytetarët që duan këtë ndryshim thelbësor. Marrëveshja e 5 qershorit është një hap pozitiv por jo fundi i reformës zgjedhore. Nuk mund që demokratët të lënë negociator një person që nuk tagrin e një vote.  Sot erdhi një person me zero vota për të mbrojtur zgjedhoren. Basha të vij të mbroje demokratët dhe të mos humbim më kohë dhe të mbyllim këtë marrëveshje më 30 korrik pasi e ardhja e Shqipërisë nuk pret.  Kjo marrëveshje nuk është e plotë nëse nuk ka gëzimin e  shqiptarë dhe mos i fshihni pas deklaratave se ka mbështetjen e ndërkombëtarëve. Rreshtohuni në anën e duhur të historisë" , tha Hajdari

Nga takimi i sotëm palët nuk dolën me një marrëveshje duke mbetur në të njëjtat qëndrime, por kryeministri Edi Rama e vlerësoi tryezën si pozitive.  "Diskutimi ishte i gjatë interesant, ne nuk është se thamë ndonjë gjë të re, që opinioni i di, kemi një qëndrim të qartë sipas nesh, dhe ka një realitet politik, i cili imponon një qasje që për ne është e diktuar si forca më e madhe, por kemi edhe detyrimin që të krijojmë një proces dhe të arrijmë në një rezultat, ku nëse të gjitha palët nuk janë 100% dakord me të gjitha së paku secila të ketë pjesën e vet.

Dhe në këtë aspekt është e rëndësishme që të diskutojmë, të vijojmë që të diskutojmë, ne ishim gati të vijonim diskutimin pa ndërprerje, që nesër, përfaqësuesit e opozitës jashtë parlamentare kërkuan kohë, por në ndërkohë kemi një kalendar, i cili ka një kufi të përcaktuar, që është fundi i këtij sesioni parlamentar, fundi i korrikut. Do të shikojmë në proces, por besoj që diskutimi ishte pozitiv.

Është cështja se koha ka kufizimet e vet për shkak se hapja e listave tanimë për ne nuk është një variant, por një angazhim dhe ne si partia më e madhe dëshirojmë që ti përfshijmë qytetarët në procesin e përcaktimit të atij që do të jetë grupi i nesërm parlamentar. Ne na takon që të mbrojmë atë që është një arritje të madhe të përbashkët, të rrijes së përfaqësimit të grave në parlament dhe nga ana tjetër sigurisht që duhet të cojmë deri në fund edhe angazhimin e nënshkruar në 5 qershor. Është një proces me dy korsi, ku stacioni është 30 korriku" tha ai.

Faktin se Myslim Murrizi shprehet se nuk do e votojë marrëveshjen e 5 qershorit, Rama tha se ky është dhe problemi, ku partitë e vogla i duan të gjitha për vete dhe nuk i hapin rrugë njëra-tjetrës. Rama tha se opozita parlamentare duhet të tregohet më fleksibël dhe shpreson që në votimin e marrëveshjes të merren votat e duhur për ta kaluar marrëveshjen.

"Ky është problemi im më i madh se ne jemi më të mëdhenjtë dhe janë dy palë më të vogla që i duan të gjitha për veten e  tyre dhe nuk i hapen rrugë njëra tjetrës. do mundohemi të punojmë dhe të bindim opozitën parlamentare janë ,më fleksibël në këtë proces, mbase ia arrijmë të kemi një mbështetje që të jetë e mjaftueshme. Problemi këtu është se opozita parlamentare nuk është vetëm një parti politike, por shumë parti e individë dhe shumica e tyre ka një qëllim të përbashkët që janë ndryshimet në kushtetutë, por në fund shpresoj që të prevalojë arsyeja', tha Rama.

Myslim Murrizi u shpreh në përfundim të mbledhjes së Këshillit Politik, se shumica e përfaqësuar nga Edi Rama dhe Gjiknuri dhe opozita jashtë parlamentare u futën sërish në tryezë duke akuzuar për pazar, por i paralajmëroi se deputetët e opozitës në Kuvend nuk do të japin votën për 5 Qershorin pa hapjen e listave.

"Opozita parlamentare ishte sot aty në një tryezë më të gjithë faktorët për hapjen e listave, të rishikojmë Kodin Zgjedhor, që të mos ketë militantë te kutia e votimit. Mbledhja ka mbaruar, por u futën prapë, se dashuria e vjetër është gjë e madhe. Unë jam aty si përfaqësues i 28 deputetëve që kërkojnë ndryshimet kushtetuese. Erdha të jem dëshmitar i kopilllëqeve të tyre, avzhdoni te bodrumi i pallatit të Kongreseve nuk do të merreni asnjë votë nga opozita parlamentare" tha ai.

Përfundon pas 5 orësh mbledhja e Këshillit Politik ku u diskutua për hapjen e listave dhe koalicionet

Rama ka kërkuar në mbledhje që opozita parlamentare të përkrahë hapjen e listave pasi ajo nuk cenon as bërjen e koalicioneve dhe aq ndryshimin e marrëveshjes së 5 qershorit por vetëm një korrigjim në kod. Burime për Report Tv tregojnë se Rama është shprehur se nuk do të ndryshojë as sistem zgjedhor dhe as zona zgjedhore, por vetëm do të hapen listat.

Rama është shprehur se nuk i ka votat në Kuvend për të miratuar marrëveshjen e 5 qershorit dhe se PD e LSI nuk ka pse kundërshton hapjen e listave pasoi nuk e ndalon atë të krijojë koalicione, jo si ato deri më tani, por koalicione siç krijohen në të gjithë Europën dhe të diskutojnë se si të garantohet kuota gjinore sa më mirë nga hapja e listave.

"I qëndrojmë marrëveshjes së 5 qershorit dhe ajo duhet miratuar, për t'u miratuar duhen votat në Kuvend që ne si mazhorancë nuk i kemi. Në bisedimet me opozitën parlamentare kemi dakordësuar për hapjen e listave. Ajo çka kërkojmë është, hajdeni ulemi dhe me sa më shumë dakordësi të reflektojmë në kod këtë sanksionim të hapjes së listave që vjen nga ndryshimi kushtetues. Ne nuk ndryshojmë as sistem, as zona zgjedhore. E vetmja gjë është që po hapim listat. Edhe për hapjen e listave hajdeni ulemi nëse keni ndonjë mendim se si të garantojmë kuotën gjinore sa më mirë. Nuk ndalojmë koalicionet por formë grupimi që të mundësojë hapjen e listave dhe të mos ndërlikojë administrimin. Korrektimi në kod i përket vetëm pjesës së hapjes se listave dhe nuk cenon përmbajtjen e dokumentit. Pra nuk u ndalon njeri të bëni aleancat tuaja. Por në një koalicion siç i bën gjithë Evropa dhe jo si modeli ynë i deritanishëm që se ka askush", është shprehur Rama.

Ka rinisur mbledhja e Këshillit Politik ku po diskutohet për hapjen e listave dhe koalicionet. Fjalën e ka marrë sërish Edi Rama që nuk tërhiqet nga ideja që të hapen listat në zgjedhjet e ardhshme, por PD-ja është kundër.

Report Tv mëson se mbledhja e Këshillit Politik është ndërprerë për disa minuta me kërkesë të kryeministrit Edi Rama. Mbledhja filloi në orën 11:00 dhe pushimi po zhvillohet pas tre orëve debate për listat dhe koalicionet.

Gazment Bardhi, sekretar i Përgjithshëm I Partisë Demokratike është shprehur në mbledhjen e këshillit politik se hapja e listave nuk mund të diskutohet tani. "Kuptuam nga diskutimi i Kryetarit të Partisë Socialiste që qëllimi është të rihapim edhe njëherë diskutimin për përmbajtjen e marrëveshjes së 5 Qershorit dhe të bëjnë ndryshime të saj. Drafti i marrëveshjes së 5 Qershorit është produkt i një pune të përbashkët 6 mujore, është miratuar dhe nënshkruar me konsensusin e të gjitha palëve, me mbështetjen e partnerëve ndërkombëtarë.

Ne i qëndrojmë firmës sonë dhe deklarojmë që nuk mund të rishihet apo rishkruhet asnjë fjalë ndryshe nga ajo që palët kanë dakordësuar dhe nënshkruar bashkërisht. Çështjet që ju shtruat bien në kundërshtim dhe ndryshojnë Marrëveshjen e 5 Qershorit dhe prishin dakordësinë që ne kemi arritur aty. (nenet 19 dhe 36 të draftit të nënshtruar në zbatim të marrëveshjes së 5 Qershorit).

Gjithashtu, në mbledhjet e Këshillit Politik, por edhe gjatë diskutimeve në Rezidencën e Ambasadores së SHBA-së, përfaqësuesi zyrtar i Partisë Socialiste nuk ka dhënë konsensusin për ndryshimin e sistemit zgjedhor dhe ka dakordësuar se kjo çështje nuk mund të diskutohet tani, por në një fazë më të vonshme.

Ky fakt konfirmohet edhe nga përmbajtja e marrëveshjes së 5 Qershorit, ku specifikohet në shënimin nr. 2 që “nuk ka konsensus për ndryshimin e sistemit”. Sipas pikës 12 të marrëveshjes së firmosur më 5 Qershor “12. Hyrja në fuqi”: “ky shënim është i zbatueshëm për zgjedhjet e rradhës” u shpreh Bardhi, sipas selisë blu.

Vijon mbledhja e Këshillit Politik që nisi prej orës 11:00. Kryeministri Edi Rama, Gjiknuri dhe përfaqësuesit e opozitës parlamentare dhe jashtë parlamentit kanë shprehur qëndrimet e tyre për cështjen e listave dhe koalicioneve. Report Tv mëson se shumica është e vendosur dhe nuk tërhiqet duke këmbëngulur për listat e hapura të përbashkëta.

Palët politike kanë nisur mbledhjen e Këshillit Politik ku po diskutohet për hapjen e listave dhe koalicionet, që kundërshtohen nga opozita jashtë parlamentit, ndërsa opozita tjetër brenda parlamentit i kërkon 100% të hapura.

Kryeministri Edi Rama mbërrin te Pallati i Kongreseve. Kreu i qeverisë nuk pranoi që të prononcohej për mediat. Ai kishte vendosur maskën me logon e Kryeministrisë. 

Maska me logon e Kryeministrisë që kishte vendosur Edi Rama

I pari në Këshillin Politik ka arritur Damian Gjiknuri. Shkallët e Pallatit të Kongreseve i kanë ngjitur pas tij grupi opozitar jashtë parlamentit me Gazment Bardhin, Petrit Vasilin, Ivi Kason dhe Oerd Bylykbashin. Po ashtu në mbledhje janë edhe Rudina Hajdari me Myslim Murrizin nga opozita brenda parlamentit.