Kreu i ILD në komisionin e Ligjeve: Nuk ndihem i presionuar nga politika! Denoncimet për gjyqtarët të mos bëhen në media, por në rrugë zyrtare

TIRANË- Kreu i Inspektoratit të Lartë të Drejtësisë, Artur Metani në raportimin e tij në Komisionin e Ligjeve është shprehur se si drejtues i një institucioni të ri të drejtësisë nuk ndihet i presionuar nga politika. Ai tha se nuk ka ndjerë presion të asnjë lloj forme.

"Nuk ndihem, sepse Kushtetuta dhe Ligji ma kanë dhënë garancinë që të mos intimidohem nga politika, apo kushdo tjetër që bën në presion, po kam presion brenda vetes, nga familja, shoqëria, nga ju, në kuptimin e mirë të fjalës për pritshmërisë, këto janë presione të forta që flemë në darkë dhe zgjohemi në mëngjes. Presionet nga politika këtu është bërë çështje debati, kam qenë aktiv në reagime dhe publike dhe me deklarata edhe ndaj ministrave dhe në konferenca publike, së fundmi para një jave", tha Metani.

Para deputetëve të parlamentit, Metani është ndalur edhe te denoncimet publike të magjistratëve, ku vuri theksin se denoncime të tilla nuk duhet të bëhen më në media, por në rrugë zyrtare, pasi kjo do ishte e vetmja mënyrë për të krijuar një sistem që do të jepte rezultate konkrete dhe efekte pozitive në shoqëri.

"Mendoj që bëhet një kakofoni midis sulmit, kritikës apo intimidimit, mendoj që duhet ta ndajmë në 3 nivele, intimidimet ligjore apo institucionale dhe këto nuk i shoh, niveli i dytë është denoncimet, denoncimet bëhen publikisht, sugjeroj që denoncimet të mos bëhen në media, por në institucione dhe të respektohen institucionet dhe standardet e sistemit, me institucione të pavarura, të ndalojë denoncimi publik i magjistratëve që shkelin ligjit, dhe niveli i tretë është kritika ndaj punës së magjistratëve, çdo kush mund të shprehë një mendim për punën e drejtësisë, unë s'jam i mendimit kur flet drejtësia të heshtë, jo të flasim, gjetja e kufijve nuk është një pikë e jona e fortë, nuk ka pak raste të bulizmit të punës e magjistratëve. Reforma në Drejtësi do kohën e vet sepse është për shkak të mjedisit demokratik do kohën e vet", tha Metani.

Kjo pyetje vjen pas deklaratave të shumta të kryeministrit Edi Rama lidhur me akuzat për gjyqtarë të ndryshëm "KÇK" (Kap ça të kapës), ku më i fundit ishte rasti i një gjyqtari në Laç ku tha se ai po pengon rindërtimin në këtë zonë.

Rendit zhvillimet sipas orarit:

Të Fundit Të Parat

B.K./Shqiptarja.com

TAG:
• edi rama
• spak
• ild
• artur metani