Po kulloste bagëtitë, bariu sulmohet nga ariu! Pas tre orësh kuksiani sillet me helikopter te Trauma (Pamjet)

Ekrem Onuzi në spitalin e Traumes nen kujdesin e mjekeve

Gjendja e bariut kuksian Ekrem Onuzi që u sulmua nga ariu gjatë kohës që po kulloste bagëtitë është e stabilizuar. Shqiptarja.com ka siguruar foton brenda spitalit të Traumës, ku 45-vjeçari është shtruar në spital dhe ndodhet nën kujdesin e mjekëve. Onuzi ka plagë të shumta në fytyrë, krahë, këmbë dhe pjesë të tjera të trupit si pasojë e sulmit nga ariu.

Report Tv siguron pamjet e gjendjes së 45-vjeçarit që u sulmua nga ariu në Kukës. Ekrem Onuzi ka plagë në fytyrë, këmbë, duar dhe pjesë të tjera të trupit nga 'lufta' me ariun në mal. Bariu u transportua nga malet e Kukësit në spitalin e Traumës në Tiranë për ndihmë të specializuar pasi ka dëmtime të shumta në trup.

Bariu që u sulmua nga ariu në malet e Kukësit po transportohet  me helikopter në spitalin Ushtarak Tiranë, ndërsa familjarët kanë qenë mjaft të irrituar me vonesën e helikopterit. Ata janë shprehur se gjendja e Ekrem Onuzit është e rëndë.

Shqiptarja.com sjell pamjet e momentit kur helikopteri ulet në vendin e quajtur Sasat në Bjeshkët e Gjalicës për të marrë dhe transportuar bariun që u sulmua nga ariu Ekrem Onuzi. Helikopteri i ushtrisë fillimisht u ul në aeroportin e Kukësit për të marrë mjekët dhe familjarët dhe më pas u nis në Bjeshkët e Gjalicës për të marrë bariun.

Ekrem Onuzi,  45-vjeçari që u sulmua nga ariu mesditën e sotme është marrë me helikopter për transportuar drejt spitalit të Traumës në Tiranë. Mësohet se helikopteri është nisur nga Kukësi në orën 13:20 minuta. Helikopteri ka ndaluar fillimisht në aeroportin e Kukësit ku ka marrë fillimisht familjarët e tij dhe mjekët e spitalit të Kukësit për t'i dhënë ndihmën e parë.

Dy orë pasi u lajmërua nga çobani që u sulmua nga ariu, helikopteri ka arritur në Kukës për ta marrë dhe transportuar drejt Tiranës 45-vjeçarin  Ekrem Onuzi. Shqiptarja.com sjell pamjet e helikopterit që fluturoi mbi qytetin e Kukësit.

Çobani që u sulmua nga ariu në fshatin Nangë ishte duke kullotur bagëtitë. Nga një vëzhgim në profilin e tij, duket se ai kalon kohën më të madhe të ditës së tij me këtë punë. Ai ka postuar disa momente teksa kullot bagëtitë, në vendin ku dyshohet se u sulmua nga ariu mesditën e sotme.

Policia ka dhënë informacionin e parë për ngjarjen në Kukës ku u sulmua një bari nga një ari. "Jemi njoftuar në sallën operative se në vendin e quajtur Sasat, mali i Gjallices, Ekrem Onuzi rreth 45 vjeç, banues në fshatin Nangë, duke kullotur bagëtitë është sulmuar nga një ari, duke i shkaktuar plagë në kokë, shpatull dhe në  këmbë. Policia është nisur drejt vendit të ngjarjes. Nga Tirana është nisur dhe helikopteri në ndihmë, për shkak të terrenit të vështirë malor' thotë policia.

Kryebashkiaku i Kukësit Safet Gjici ka deklaruar në një lidhje për telefonike për Report Tv se një helikopter ushtarak i Ministrisë së Mbrojtjes është nisur drejt Kukësit dhe për pak minuta pritet të mbërrijë në vendngjarje.

"Është dëmtuar rëndë nga një arushë. Është një çoban. Për punë minutash pritet të ulet në Aeroportin e Kukësit dhe do të shoqërohet nga banorët e zonës drejt vendit ku është bllokuar personi. Ngjarja ka ndodhur rreth një orë e gjysmë më parë. Janë marrë të gjitha masat për ta sjellë të dëmtuarin drejt Tiranës. Ai ka marrë dëmtime të shumta dhe nuk lëviz dot. Është banor i zonës me mbiemër Onuzi. Gjalicia ka shumë kafshë të egra. Nuk është i vetëm. Ka dhe banorë të tjerë atje. Kanë shkuar edhe të tjerët për ta ndihmuar. Kemi bërë të mundur nisjen e helikopterit ushtarak", u shpreh Gjici.

Shqiptarja.com sjell fotot e bariu që u sulmua nga ariu në Kukës. Ekrem Onuzi u sulmua nga ariu teksa ishte duke kullotur bagëtitë.

Një banor i fshatit Nangë në Kukës në një lidhje telefonike për Report Tv deklaroi se personi që është sulmuar nga ariu është Ekrem Onuzi, i cili është bari. Ai tha se kanë kërkuar ndihmë, por prej katër orësh nuk ka pasur asnjë ndërhyrje nga strukturat e shtetit.

"Situata është katastrofë. Kemi katër orë  që kemi lajmëruar. Personi ka tetë orë që është sulmuar, por kemi 4 orë që kemi lajmëruar shtetin, por nuk është bërë asnjë gjë.

Ekrem Onuzi është personi që është sulmuar. Është banor i fshatit Nangë. Ka qenë me dhen në fshat, ka lëshuar qentë, i ka sulmuar arusha. Gjendja e tij është katastrofë. Ka persona të fshatit që kanë shkuar tani. Atje ka hapësirë për t'u ulur helikopteri, ndërsa në rrugë tokësore nuk mund të transportohet" tha ai.

Personi i cili është sulmuar nga ariu në Kukës ka arritur të njoftojë policinë dhe sallën e emergjencave. Ai ka mbetur i bllokuar prej dy orësh në zonën ku është sulmuar nga ariu së bashku me bashkëshorten dhe ka ndezur një zjarr që helikopteri të bëjë të mundur lokalizimin e tij.