'Lëvizja 5 Yjet', Luigi Di Maio njofton dorëheqjen e tij si drejtues politik. Conte: Respektoj zgjedhjen tuaj

Ministri i Jashtëm italian Luigi Di Maio ka njoftuar dorëheqjen e tij si drejtues politik i Lëvizjes 5 Yjet.

Di Maio e ka bërë të ditur vendimin e tij sot në mëngjes në takimin me ministrat e Lëvizjes e zhvilluar në ‘Palazzo Chigi’.

Ekziston mundësia që Vito Crimi-t, anëtar i vjetër i Lëvizjes, t’i besohet posti i lënë bosh nga Di Maio.

Gjithsesi Di maio do të vazhdojë të mbetet Ministër i Punëve të Jashtme në qeverinë italiane.

Lajmi i dorëheqjes u konfirmua edhe nga Vincenzo Spadafora, Ministri për Mundësi të Barabarta, në qeverinë ‘Conte 2’, i cili në fund të takimit në ndërtesën qeveritare tha se "Ne duhet të vazhdojmë të bashkuar”.

Kryeministri italian Giuseppe Conte tha sot në mëngjes se ai do të respektonte vendimin e Di Maio dhe se personalisht i vinte keq pë dorëheqjen.

Thashethemet për dorëheqjen e mundshme të Di Maio-s ishin përhapur ditë pas dite dhe u komentua edhe nga drejtuesit e partive të tjera. Sekretari i Përgjithshëm i Partisë Demokratike, Nicola Zingaretti tha dje në mbrëmje në ‘Porta a Porta’ duke iu përgjigjur një pyetjeje të Bruno Vespës se ai nuk ndihej komod dhe tha se “ Ne kemi bërë një angazhim mes njerëzve që i respektojmë".

TAG:
• itali
• 5 Yjet
• luigi di maio
• Giuseppe Conte
• Nicola Zingaretti
• bruno vespa
• Vincenzo Spadafor