Meta e mban podiumin për vete më 2 mars, nuk i jep fjalë as Bashës, as Kryemadhit: Jo politikanë në tubim, qytetarët të vijnë me mimoza e flamuj

Ndryshe nga kërkesat që dërgohen në Policinë e Shtetit, për marrje leje për organizim tubimesh, protestash e manifestime në vend, presidenti Meta nuk e ka bërë një gjë të tillë, por në vend të saj ka vendosur të dërgojë një njoftim për drejtorin e Policisë Ardi Veliu. Meta informon policinë të marrë masa për garantimin e rendit dhe sigurisë publike më 2 mars në orën 17:00, ku do të zhvillohet 'besëlidhja' mes tij dhe popullit shqiptar dhe ku u pritet që kreu i shtetit të firmose 'dekretin e parë për çmontimin e grushtit të shtetit' siç Meta e cilëson. Atë që paralajmëroi më parë për nisjen e një lëvizje si 'pranvera arabe', më 2 mars Meta shprehet se do të nis pranvera kuqezi, ndërsa fton qytetarët të mbajnë në duar lule mimoza të freskëta dhe flamuj kombëtarë.

Në letrën e tij drejtuar policisë, Meta shprehet se efektivët blu nuk janë të ftuar të marrin pjesë në këtë manifestim. Meta njofton se ''në këtë organizim do të mbajë fjalën e tij Presidenti i Republikës, Sh.T.Z. Ilir Meta dhe personalitete të spikatura publike që dëshirojnë të përcjellin mesazhe, frymëzuar nga motoja e këtij manifestimi, por jo politikan, dhe as ushtarakë aktivë''. Duket se as Basha dhe as Kryemadhi nuk do të lejohen të flasin në tubim, ndërsa podiumi do të jetë vetëm i presidentit për të përcjellë mesazhet e tij për mbrojtjen e Kushtetutës.

Sipas Metës qëllimi i këtij manifestimi paqësor është ndërgjegjësimi dhe zgjimi i qytetarëve shqiptarë për të mbrojtur dhe rivendosur sovranitetin e tyre mbi të gjitha institucionet e Republikës.

Të kontaktuar nga Shqiptarja.com, burime nga Policia e Tiranës se leja për tubim nuk do të jepet, në kushtet kur vendi është ende në gjendje emergjente deri më 31 mars 2020 për shkak të tërmetit fatkeq të 26 nëntorit 2019. Megjithatë, siç historia e tubimeve ka treguar, edhe kjo protestë pritet të zhvillohet pa e pasur lejen nga autoritetet dhe policia pritet sërish të jetë në krye të detyrës për të garantuar mbarëvajtjen dhe sigurinë e qytetarëve. Meta me njoftimin e tij vërtetoi se ai nuk ka nevojë për leje nga autoritetet për zhvillimin e këtij tubim, duke thyer hapur ligjet, edhe pse në bulevard po del pikërisht për të mbrojtur ligjet dhe Kushtetutën, që sipas tij janë kapur nga mazhoranca. Dokumenti i dërguar policisë së shteti mban firmën e sekretares së përgjithshme të Presidencës, Ornela Zonja.

Letra i Presidencës:

Në mbështetjë të nenit 47, 86 pika 1, 88 pika 3, 93, të Kushtetutës së Republikës së Shqipërisë, si dhe referuar procedurave të ligjit nr. 8773, datë 23.04.2001 “Për tubimet”, ju informojmë zyrtarisht se, SH.T.Z. Ilir Meta, në ushtrim të përgjegjësive dhe kompetencave të Tij kushtetuese si President i Republikës, do të organizojë një manifestim paqësor me qytetarët shqiptarë ditën e hënë në datë 2 mars 2020, ora 17:00, në Bulevardin “Dëshmorët e Kombit” Tiranë.

Qëllimi i këtij manifestimi paqësor është ndërgjegjësimi dhe zgjimi i qytetarëve shqiptarë për të mbrojtur dhe rivendosur sovranitetin e tyre mbi të gjitha institucionet e Republikës, të drejta këto, të garantuara nga Kushtetuta e Republikës së Shqipërisë dhe parimeve themelore të njohura prej saj.

Një prej qëllimeve të këtij manifestimi është nënshkrimi nga Presidenti i Republikës përpara sovranit (popullit), të dekretit të parë kundër grushtit të shtetit që kërkon të realizojë Kuvendi njëpartiak në dhunim të Kushtetutës me qëllim kapjen në mënyrë antikushtetuese të institucionit më të rëndësishëm të Republikës, Gjykatës Kushtetuese.

I gjithë ky ndërgjegjësim do të realizohet përmes mesazheve paqësore publike që Presidenti i Republikës do të japë në këtë manifestim. 

Motoja e këtij manifestimi me qytetarët do të jetë: “Për Republikën; Për Kushtetutën; Për Kombin; Për unitetin e popullit”.

Sa më sipër, në zbatim të nenit 5 të ligjit të sipërcituar, ju bëjmë me dije se:

Drejtues i këtij manifestimi paqësor është SH.T.Z. Ilir Meta, me adresë Institucioni i Presidentit të Republikës, Bulevardi “Dëshmorët e Kombit”, nr. 1, Tiranë. Organizator dhe persona kryesor ndihmës të këtij manifestimi, do të jenë zoti 1. Zoti Bahri Shaqiri, Këshilltar i Presidentit, 2. Zoti Dedë Prenga, Këshilltar i Presidentit, 3. Zoti Shemsi Premçi, Këshilltar i Presidentit, me adresë Institucioni i Presidentit të Republikës, Bulevardi “Dëshmorët e Kombit”.

Aktiviteti do mbahet më datë 2 mars 2020, ora 17:00 në Bulevardin “Dëshmorët e Kombit” dhe është i hapur.

Numri i pjesëmarrësve është jashtë çdo parashikimi.

Numri i personave të tjerë ndihmës në këtë manifestim është në varësi të kontributit të secilit qytetar që do të shprehë dëshirën dhe angazhimin për të marrë pjesë.

Qytetarët janë ftuar të kenë me vehte Flamuj Kombëtar dhe buqeta me lule mimoze të frekëta që paralajmërojnë ardhjen e pranverës Kuq e Zi për të gjithë shqiptarët e bashkuar kudo janë.

Në këtë organizim do të mbajë fjalën e tij Presidenti i Republikës, Sh.T.Z. Ilir Meta dhe personalitete të spikatura publike që dëshirojnë të përcjellin mesazhe, frymëzuar nga motoja e këtij manifestimi, por jo politikan, dhe as ushtarakë aktivë.

Punonjësit e Policisë së Shtetit, nuk janë të ftuar të marrin pjesë në këtë manifestim, ndërkohë që Presidenti i Republikës, kërkon nga ana juaj që të merrni masat respektive për garantimin  e rendit dhe sigurisë publike në datën dhe orarin e njoftuar.

Njoftimi i Presidentit Meta për Policinë e Shtetit, për tubimin e 2 Marsit

TAG:
• Ilir Meta