Sulmoi turistët, mbetet në burg/ Mihal Kokëdhima: Më morën zvarrë me makinë, u mbajta tek xhami (VIDEO)

Pas daljes para gjykatës të Mihal Kokëdhimës, një nga avokatët e tij është shprehur se shoferi që drejtonte makinen me turistet spanjolle ka qenë i dehur.

"Turistët kanë shkuar në lokal dhe pasi kanë qëndruar pesë minuta ata kanë ikur. Kokëdhima ju ka dal përpara dhe ju ka thënë mos ikni pa bërë pagesën. Ka marr policinë,  129. Kjo është e verifikueshme ka fol 16 sekonda dhe ju ka thënë situatën se turistët kanë ikur pa paguar. Ju dërgoi dhe targën. Shoferi ishte i dehur. Turistët kanë qenë në efektin e kanabis sativa dhe e kanë marrë përpara zotin Kokëdhima.  Duket edhe në video që  ai thotë aman ndaloje se po vdes. Por njëri nga ata gangsterrat e Edi Ramës thonte vrite. Domethënë kjo gjë nuk përbën vepër penale për prokurorinë. Kemi bërë kallëzim për  turistët dhe ndaj të tjerëve. Nuk ka asnjë element dhune ndaj turistëve. Dhuna është bërë vetëm ndaj Kokëdhimës. I ka duart gjak. Presim dhe analizat. Pasi është mjekuar Kokëdhima ka shkuar vetë në polici dhe nuk ka shkuar policia tek ai", shprehet avokati Erion Besimaj.

Gjatë seancës gjyqësore, MIhal Kokëdhima dëgjohet të thotë se e ka mik kryeministrin, por avokati Besimaj është shprehur: "Kokëdhima tha se e kishte mik kryeministrin se ndoshta i ka shkuar për t'i kërkuar votat Rama. Po ka thënë ky do të ta japim sepse votën në të gjithë jugun votën  Ramës ja japin.

Avokati akuzon për gjyq politik dhe thotë se do ta apelojë masën e sigurisë dhënë sot nga gjykata.

"Dua të theksoj vetëm një fakt që ky ishte është një gjyq popullor  që u bë tre dit më parë. U bë nga kryeministri Edi Rama sepse e kishte gjykuar, hetuar dhe kishte vendosur masën arrest me burf.

Prokurora dhe gjykata e lanë në burg pa asnjë shkak apo bazë ligjore.  Prokurori erdhi në gjyq me veprën penale shkatërrim prone. Për këtë vepër maksimumi jepet tre vjet burg. Këto 10 vite nuk është dhënë ndonjë masë e tillë për këtë vepër. Normalisht ne para botës jemi gati të japim çdo gjë.   Problemi qëndron se për të dhënë masën arrest me burg nuk plotësohen asnjëra nga kriteret. Rrezikshmëria e veprës, personit, prishja e pronave dhe rreziku për tu larguar nga vendi.  Duke mos u plotësuar asnjë nga këto prova prapë gjykata jep këtë masë. Gjykata ka zbatuar urdhrin e kryeministrit Rama . Ka dal kryeministri e ka folur, ky është problemi.  Prokurori e gjyqtari thonë nuk bëjmë dot gjë se ka folur Kryeministri Rama. Është gjykata që vendos dhe jo kryeministri. Kryeministri vendos në një vend vetëm si Shqipëria.  Unë nuk po mbroj faktin.  Normalisht e gjykoj vetëm përsa i përket veprës morale por nuk është vepër penale që të  të lëre në burg. 

Masa e sigurisë më e sakta duke u ndodhur në këto kushte ishte me garanci pasurore. Kur është shkatërrim prone, meqë prokuroria e mendon kështu ne po e paguajmë, të mbetet garancia e pastaj si të vendose gjykata.

Do ta apelojmë masën. Mendojmë se gjykata e Apelit do të japë masën e merituar. Jo si gjykata e shkallës së parë që nuk kanë guximin të shprehen kundër kryeministrit. Dhe jo më të japë një vendim që nuk ka asnjë lidhje më politikën", tha avokati.

Por çfarë deklaroi kryeministri Edi Rama pas incidentit të pronarit me turistët? (LEXO KETU)

Nuk ka pranuar t'i ketë sulmuar turistët spanjollë. Mihal Kokëdhima ka deklaruar në seancën gjyqësore për masë sigurie, se vetëm donte t'i ndalonte ata, por është ndjerë i rrezikuar pasi ata kanë dashur ta shtypin, dhe për këtë arsye, sipas 51-vjeçarit ai është detyruar të hidhet mbi furgon.

"Nuk kam bërë asnjë gjë t'i sulmoja ata. U mundova t'i ndaloja. Ata nisën makinën dhe desh më shtypën. Ju luta gjithë rrugës të ndalonin, por ata nuk ndaluan. Kur ndaluan zbrita nga makina dhe shkova vetë lajmërova policinë dhe shkova në polici.

Më morën zvarrë me makinë. Ç'është kjo punë, nuk kam prekur njeri me dorë. Ku janë faktet që i preka me dorë? Më rrëzuan në Qeparo nga makina. Si ka mundësi, unë nuk e theva xhamin për t'i dëmtuar, por për tu mbajtur. Unë u mora targën, telefonova policinë. Ata futën marshin të më shtypnin dhe unë u hodha në kroskot. Kam dy fëmijë në shkollë në Gjermani. Ne vetëm dy muaj punojmë. Më lini të punoj", - tha Kokëdhima teksa u dakordësua me kërkesën e avokatit për tu hetuar në liri me garanci pasurore.

Por nga video që Report tv transmetoi ekskluzivisht një ditë më parë, Mihal Kokëdhima shfaqet mbi kofanon e furgonit në ecje, nga Porto Palermo deri në Qeparo ku gjithë kohës qëllon me grushte xhamin e përparmë të cilin e theu. Janë shoferi dhe pasagjeri shqiptar që dëgjohen gjatë gjithë kohës t'i kërkojnë Kokëdhimë të zbresë, por ai nuk ka zbritur edhe pse makina u ndal dy herë për t'i dhënë mundësi atij të iki. Vetëm në fund, 51-vjeçari vërtet u kërkon turistëve dhe shqiptarëve që ishin në makinë që ta ndalin furgonin kur situata për të bëhet e vështirë, por edhe kur zbret nga kofano në ndalesën e tretë të makinës, ai tenton të hapë derën e shoferit dhe teksa furgoni largohet me shpejtësi, ai godet sërish me grushte automjetin. 

Mihal Kokëdhima ka pasur një bisedë me avokatët e tij para nisjes së seancës gjyqësore, ndërsa ishte ulur në vendin e të paditurit. Avokatët Kujtim Cakrani dhe Erjon Vezimaj i kanë thënë se për rastin e tij ka folur dhe vetë kryeministri, por ndërkohë i qeshur Mihal Kokëdhima dëgjohet të thotë se kryeministrin e ka mik.

Avokatët: Për ty ka folur vetë kryeministri
Mihal Kokëdhima: Si ka thënë?
Avokatët: Dhe po foli vet kryeministri...
Mihal Kokëdhima: E kam mik
Avokatët: Kryeministri është i gjithëfuqishëm dhe harron që korrupsioni i tij ka marrë dhenë në të gjithë botën

Dje kryeministri Edi Rama foli për rastin e Mihal Kokëdhimës por duke e sulmuar ashpër veprimet e tij e duke e quajtur atë ''barbar''.