Militantët e PD hodhën molotovë, Rama: Kur mortja e shtyn qenërinë tek dera e xhamisë! Koçiu: S'është opozitarizëm, por sabotim kombëtar

Ministrja e Brendshme, Albana Koçiu ka reaguar sërish për protestën e dhunshme të PD.

Përmes një postimi në rrjetet sociale, Koçiu ka ndarë pamje, ku besimtarët falen tek Xhamia e Namazgjasë, ndërsa militantët e PD hedhin molotov.

Sipas Koçiut, teksa dëgjoheshin lutjet e besimtarëve, ulërijnë britmat për shkatërrim.

“Sot kryeqyteti u nda në dy realitete që nuk kanë asgjë të përbashkët. Nga njëra anë, përulësia e besimtarëve që kërkojnë paqe; nga ana tjetër, banda e çadrave dhe e molotovit që me maska në fytyrë nxisin dhunë. Ndërkohë që dëgjohet lutja, ulërijnë britmat për shkatërrim.

Është një kontrast që të lë pa fjalë: Lutja përballë mallkimit. Qytetaria përballë vandalizmit. Përballë kësaj marrëzie që djeg qytetin për hallin e karriges së një njeriu, duke u kërkuar ndjesë besimtarëve që ishin aty në ritualin e lutjeve e u përballën me situatën e gazit lotsjellës, mbetet të themi vetëm një fjali: Fali Zot, se nuk dinë ç’bëjnë!”, shkruan Koçiu.

Ministrja e Punëve të Brendshme, Albana Koçiu, ka reaguar për së dyti mbrëmjen e sotme lidhur me vandalizmin karakteristik të militantëve të Sali Berishës, nëpër rrugët e Tiranës.

Reagimi i plotë:

Po e shohim përsëri. E njëjta shfaqje e shëmtuar, e njëjta skenografi e vjetër me tym e me flakë, që vjen nga bodrumet e një politike në agoni. Një tjetër “revolucion” me pagesë, ku molotovi zëvendëson fjalën dhe maska fsheh turpin.

Le ta themi troç, pa asnjë dorashkë: Një kauzë e drejtë nuk ka nevojë për maska dhe as për molotovë. 
Kush ka të drejtë, ka mbështetjen e popullit, jo bandën e huliganëve me pagesë. Kush ka ide, ka votën. Por kur kutia e votës të është kthyer në në makthin tënd më të madh që prej dy dekadash, atëherë e vetmja rrugë është dhuna si streha e fundit e paaftësisë. 

Të thërrasësh shqiptarët të bëhen mish për top për marrëzinë tënde personale, ndërkohë që ata ta kanë dhënë përgjigjen me votë rresht për 20 vite, është kulmi i pafytyrësisë politike.

Ata thonë se kjo është një protestë qytetare? Cili qytetar i këtij vendi do të shihte qytetin e tij të digjej? Të djegësh institucionet nuk është politikë, është vandalizëm. Të godasësh Policinë e Shtetit nuk është trimëri, është krim. 

Kjo nuk është një protestë kundër qeverisë. Kjo është një protestë kundër Shqipërisë që punon, kundër stabilitetit, kundër sigurisë së çdo familjeje dhe kundër imazhit të një vendi që sot respektohet në çdo tryezë ndërkombëtare. 

Ky nuk është opozitarizëm, ky është sabotim kombëtar nga ata që Shqipërinë e duan vetëm nëse mund ta kenë si pronë private, përndryshe duan ta shohin në flakë.

Dhe nesër, kur të dilni për të përgënjeshtruar turpin tuaj të sotëm e për t’ua shitur shqiptarëve dhunën si “ndjenjë lirie”, mendohuni mirë. Mendohuni dy herë, sepse Shqipëria nuk është më as ajo e 97-ës dhe as ajo e rrëmujës suaj mendore.

Taulant Balla

Kreu i grupit të PS, Taulant Balla thotë se Sali Berisha është i mbaruar jo vetëm politikisht, por dhe mendërisht e fizikisht.

Përmes një postimi në rrjetet sociale, Balla tha se në protestën e dhunshme të PD, u cënuan institucionet dhe simbolet e shtetit.

“Vetëm një i mbaruar politikisht, mendërisht dhe fizikisht si bufi i shqupit mund të godasë flamurin kombëtar, flamurin e BE, policinë e shtetit dhe institucionet e vendit. Turpi nuk është i këtij matufi, por i atyre pak që kanë mbetur dhe i shkojnë mbrapa”, shkruan Balla.

Ministri Toni Gogu

Ministri i Shtetit për Marrëdhëniet me Parlamentin, Toni Gogu ka reaguar për protestën e dhunshme të PD.

Përmes një postimi në rrjetet sociale, Gogu u shpreh se ata që pretendojnë të jenë zëri i qytetarëve, në fakt nuk përfaqësojnë aspiratat reale të tyre.

Gogu shtoi se qytetarët shqiptarë nuk duan zjarr e flakë, por kërkojnë stabilitet, punë të përditshme dhe zgjidhje konkrete për problemet.

“Këta pretendojnë të jenë zëri i qytetarëve a thua se qytetarët duan zjarr e flakë! Por ndaj dalin në zgjedhje ashtu siç dalin. Qytetarët duan Shqipërinë europiane që vështirësitë dhe problemet që ka i zgjidh me punë të përditshme! Dhe Shqipëria nuk ndalet!”, shkruan Gogu.

Kreu i grupit parlamentar të Partisë Socialiste Taulant Balla, reagoi pas protestës së opozitës, ku u hodhën molotovë në drejtim të godinës së Kryeministrisë.

Duke postuar video të ‘grupi i zjarrit’ të rekrutuar nga Partia Demokratike që ecin të mbuluar me çadra edhe pse nuk bie shi, Balla ironizoi organizatorët e tubimit dhe aktet e dhunës, duke i cilësuar ata një “grup kriminal”.

“Ja sheshi, ja mejdani ja dhe grupi kriminal që mbulohet me çadra (edhe pse nuk bie shi) gati për molotovët e një plaku të rrjedhur”, shkroi ai.