Ndahet nga jeta ikona e portës shqiptare

Ndahet nga jeta ikona e portës shqiptare

Sulejman Maliqati

Ndahet nga jeta Sulejman Maliqati, ikona e portës shqiptare! Ditën e nesërme do t’i jepet lamtumira për në banesën e fundit, Sulejman Maliqatit, portierit legjendar të kombëtares shqiptare.

Pak përpara se të ndërronte jetë, Maliqati është rrëzuar dhe është dëmtuar rëndë. Pavarësisht përkujdesjes së mjekëve, ai nuk mundi t’i përballonte dëmtimet dhe nuk mbijetoi. Maliqati është mbiquajtur 'Macja e Zezë' në turneun ndërkombëtar të 'Lajpcigut' në vitin 1958.

Homazhet për 94-vjeçarin që mbylli sytë pasditen e kësaj të mërkure do të zhvillohen në hollin e Pallatit të Kulturës në Durrës në orën 13.00-15.00. Kortezhi mortor do të niset në orën 15.00 drejt varrezave të qytetit.

I nderuar dy vite më parë nga presidenti Meta me titullin e lartë “Nderi i kombit”, ndërkohë që për kontributin e dhënë ndër vite në sportin e futbollit portieri i mirënjohur është nderuar edhe me titullin “Qytetar nderi” i Kavajës dhe “Mjeshtër i merituar i sportit”.

Rendit zhvillimet sipas orarit:
Ora 21:10
Vdekja e legjendës së portës kuqezi, Duka dhe Meta mesazh ngushëllimi: Nuk luajti me doreza, shembull frymëzimi

Legjenda e portës së Kombëtares shqiptare, Sulejman Maliqati është ndarë nga jeta këtë mbrëmje në moshën 94 vjeçare. Pjesë e Partizanit dhe Shqipërisë në vitet 1950-1964, Maliqati njihet me nofkën "Macja e Zezë" për paraqitjet në portë. Në lidhje me këtë humbje, kreu i Federatës Shqiptare të Futbollit, Armand Duka dhe kryetari i Partisë së Lirisë, Ilir Meta kanë shprehur mesazhe ngushëlluese.

"Me pikëllim të thellë mora lajmin për ndarjen nga jeta të legjendës së "Partizanit" dhe Ekipit Kuq e Zi, "Nderit të Kombit" Sulejman Maliqati, njërit nga portierët më të famshëm të të gjithë kohërave të futbollit shqiptar, i cili hyri në historinë e sportit tonë si mburoja e pakalueshme e portës që nuk luajti kurrë me doreza, pasi e ndiente topin jo vetëm me duar e gishta por e njësonte me vetë qenien e tij. Shtatë herë Kampion Kombëtar dhe Nënkampion i Lojrave të Leipzigut të vitit 1958, ai përfaqësoi denjësisht fanelën e "Partizanit" dhe ngriti lart emrin e Shqipërisë në arenat ndërkombëtare sportive, për t'u përjetësuar si shembull frymëzimi për fëmijët dhe brezat e ardhshëm të sportistëve drejt rrugës së suksesit. Do ta kujtojmë gjithmonë Profesor Sulën, njeriun me vlera dhe integritet të lartë qytetar, edukatorin shembullor për brezat më të rinj, këtë model të mjeshtërisë sportive dhe atdhedashurisë! Ngushëllimet më të sinqerta familjes, të gjithë sportdashësve dhe në veçanti tifozëve të "Partizanit"! Të prehet në paqen e merituar!", shkruan Meta.

Edhe kreu i FSHF-së, Armand Duka ka shprehur ngushëllimet për këtë humbje.

"Futbolli shqiptar humbi sot një nga legjendat më të mëdha të historisë së tij. I madhi Sulejman Maliqati është ndarë sot nga jeta në moshën 94-vjeçare duke lënë pas një trashëgimi të pasur e të çmuar për të gjithë futbolldashësit. Ish-portieri i famshëm i Kombëtares në vitet 1950-1964, Maliqati ishte një ikonë e padiskutueshme dhe një shembull frymëzimi për gjenerata të tërë sportistësh. Përveçse i dekoruar me titujt më të lartë shtetëror dhe me shumë trofe të fituar në fushë, Maliqati ka qenë edhe njeri i shkëlqyer, një mik i mirë dhe një personalitet i rrallë e me shumë vlera në jetën shoqërore me kontribute të mëdha veçanërisht në botën e futbollit. U shpreh ngushëllimet më të sinqerta familjarëve e miqve të tij. Emri i tij ka zënë vend tashmë në panteonin e më të mëdhenjve të historisë së futbollit shqiptar. U prehsh në paqe Sul Maliqati!", shkruan Duka në kanalet e komunikimit.

SI.E./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Quo vadis: 07/10/2022 14:58

    Me i miri i te gjitha koherave-Sul Maliqati, I ndritte shpirti me parajsen e Zotit!

    Përgjigju
  • Sifi: 06/10/2022 16:00

    Maliqati ikona e portes shqiptare u largua per te mberur i oaharruar nga mihera simpatizant te tij Njerezut e mire vdesin dhe kujtohen ,dhe i tille ishte profesor Sul Maliqati .Te qofte dheu i lehte

    Përgjigju
  • njeri: 06/10/2022 11:01

    iku dhe nje tjeter legjende e sportit shqiptare :( ngushellime familjareve

    Përgjigju
  • Sondazhi i ditës:

    A mendoni se Berisha e Meta do e arrijnë qëllimin me protestën e 6 dhjetorit



×

Lajmi i fundit

Sekretarja e Brendshme britanike quajti shqiptarët 'kriminelë', Rama pritet të zhvillojë një bisedë telefonike me homologun Rishi Sunak

Sekretarja e Brendshme britanike quajti shqiptarët 'kriminelë', Rama pritet të zhvillojë një bisedë telefonike me homologun Rishi Sunak