PD 2 orë dhunë, molotovë drejt Kryeministrisë dhe Kuvendit, nuk kursehet as xhamia! Berisha i quan të vetët ‘kryengritës të armatosur’! 41 të shoqëruar

Kreu i grupit të PD, Gazment Bardhi deklaroi se 41 protestues janë shoqëruar nga policia, mes tyre të mitur.

Bardhi hodhi poshtë akuzat se të miturit po përdoren në protestat e dhunshme të PD dhe shtoi se ata nuk kanë kryer shkelje.

"I shoqëruar është edhe një invalid i kategorisë së tretë. Asnjë shoqërim apo arrestim i bërë nga policia nuk është legjitimuar nga gjykata. Sa i takon reagimit skandaloz të Edi Ramës, një njeri i kapur në hajdutëri nuk mund të quhet kryeministër, do kuptoni që ka mllef, urrejtje, që i drejtojnë gishtin si hajduti më i madh në Republikën e Shqipërisë. Është në hall, e ka shkaktuar vetë duke gllabëruar pasuritë e shqiptarëve. 41 në të gjitha komisariatet e Tiranës. Ka një numër të konsiderueshëm të miturish që janë arrestuar, në një pjesë të komisariateve janë liruar. Asnjë prej të miturve të shoqëruar, nuk ka kryer asnjë shkelje të ligjit, kanë qenë të shoqëruar në protestë nga prindër, shokë dhe duke u kthyer në banesë, janë rrëmbyer nga police pa uniformë. Çfarë mund të presësh nga një regjim, që ka legjitimuar vjedhjen", tha Bardhi.

Disa deputetë të Partisë Demokratike, mes të cilëve Gazment Bardhi dhe Agron Gjekmarkaj, janë nisur drejt komisariateve të Policisë, ku janë shoqëruar militantët e ndaluar gjatë protestës së dhunshme të PD-së.

Kujtojmë se Policia ka shoqëruar deri më tani 41 militantë, që dyshohet se kryen akte dhune duke sulmuar me gurë, fishekzjarrë e molotovë efektivët dhe godinat e institucioneve.

Nga pamjet e siguruara nga Report TV, shihet teksa zyrtarët e lartë të PD-së i hipin makinave luksoze dhe nisen drejt komisariateve.

Aktet e dhunës të ushtruara nga militantët, Berisha ‘nuk i sheh’ dhe sipas tij, shkak për ndërprerjen e lutjes së besimtarëve myslimanë, është bërë Edi Rama. Berisha thotë se hedhja e gazit lotsjellës në xhami, ka bërë që besimtarët të ndërpresin lutjen.

"Kanë hedhur bomba tymuese dhe gazi në kate të ndryshme të xhamisë, kur besimtarët po faleshin. E mbushën Xhaminë me gaz lotsjellës. Zoti i vraftë. Për këtë krim të shëmtuar janë pasardhës të etërve të tyre barbarë", tha Berisha.

Deklarata ka ngjallur reagime të shumta, pasi përdorimi i gjuhës së tillë, sidomos në një kontekst fetar, është cilësuar si i papërshtatshëm për një figurë politike. Kritika ka pasur edhe për përfshirjen e çështjeve të besimit në retorikën politike të momentit.

Ilir Meta

Ish-presidenti Ilir Meta ka reaguar nga qelia për protestën e zhvilluar nga PD.

Përmes një reagimi në rrjetet sociale, Meta shprehet se shqiptarët janë të vendosur për të shembur regjimin e kalbur të Edi Ramës.

Sipas tij, plumbat e gomës, dhuna kriminale dhe rrëmbimet mafioze të protestuesve nuk e ndalin dot uraganin e Lirisë.

“20 Shkurti i rrëzimit të diktaturave konfirmoi vendosmërinë e shqiptarëve për të shembur regjimin e kalbur të Edi Ramës. As plumbat e gomës, as dhuna kriminale dhe as rrëmbimet mafioze të protestuesve nuk e ndalin dot uraganin e Lirisë. Mirënjohje për guximin, qëndresën dhe vendosmërinë për t’i rikthyer Shqipërisë me çdo çmim Lirinë. FITORE!”, thotë Meta.

Deputetët satelitë të Sali Berishës, Flamur Noka dhe Belind Këlliçi dhunuan e shanë efektivët civilë të Policisë së Shtetit që ndodheshin pranë xhamisë së Namazgjasë në Tiranë, ku po bënin shoqërimin e militantëve të dhunshëm, që hodhën molotovë, fishekzjarre dhe gurë drejt bluve dhe institucioneve shtetërore gjatë protestës.

Përveç shtyrjes fizike të policëve civilë, Noka dhe Këlliçi ofenduan rëndë blutë. "Ik ore shk*rdhatë", u dëgjua Këlliçi të ofendonte një polic.

“Për çfarë jeni këtu?  Qentë i gjallë që keni shpërndarë, mos ti shohim vërdallë se po i pamë...”, dëgjohet Noka t’iu thotë efektivëve.

Më tej, sipas deputetëve ata kanë rrethuar perimetrin e selisë së PD dhe po terrorizojë e po shoqërojnë në komisariat edhe mbështetësit. Bardhi tha se deri më tani janë rreth 40 persona të shoqëruar, mes tyre dhe kryetarë të degëve të PD. 

“Punonjës pa uniformë që kanë rrethuar selinë. Kanë marrë me dhjetëra kryetarë të degëve të PD. Deri tani janë mbi 40 presona të ndaluar”, tha Bardhi për mediat. 

Sali Berisha prej kohësh deklaron se protestat e tij janë paqësore, ndonëse aktet e dhunës së militantëve të tij shihen hapur, me molotovët që hidhen në drejtim të institucioneve dhe efektivëve. Por, Berisha i ‘harroi’ aktet e dhunës dhe e pranoi që protestuesit e tij janë jo vetëm të dhunshëm, por i quajti edhe  ‘kryengritës të armatosur’.

“Përshkallëzimi i sotëm tejkalon çdolloj krimi. Sot besimtarët myslimanë, pas iftarit, janë kthyer në xhami për të falur namazin. Me qëllim që territori i xhamisë të mos përfshihet nga as njëlloj përballje, forcat e kryengritësve të armatosur, devijuan në krah të kundërt. Kjo nuk mjaftoi. Banditë me uniformë, i kemi filmuar. Kanë hedhur bombola gazi dhe tymuese në krah të ndryshëm të xhamisë në një kohë kur besimtarët po faleshin. E mbushën xhaminë me gaz lotsjellës. Zoti i vraftë për këtë krim të shëmtuar. Janë pasardhës të denjë të etërve të tyre barbarë. U bëj thirrje besimtarëve myslimanë, të dënojnë këtë akt të shëmtuar dhe garantoj se protesta jonë paqësore nuk do të dalët, por do të bëj gjithçka që në territorin në afërsi të përjashtoj çdo veprim me kundërshtarin vetëm që ata të mos prishin namazin. Sot i kanë nxjerrë me gaz nga xhamia”, tha Berisha.

Sipas Kodit Penal, marrja pjesë apo udhëheqja e një kryengritje të armatosur dënohet me burgim të përjetshëm. 

Gazi lotsjellës i hedhur nga Policia për të shpërndarë protestuesit e dhunshëm të Sali Berishës, ka rënë edhe në oborrin e selisë së PD-së, konkretisht në ambientet e jashtme të lokalit që ndodhet aty pranë.

Lidhur me këtë zhvillim, PD ka reaguar ashpër, duke e cilësuar si sulm ndaj selisë së partisë, me urdhër të vetë kryeministrit Edi Rama.

Hedhja e molotovëve nga militantët e PD

Nga protesta e dhunshme e PD, është lënduar edhe deputeti  i kësaj force politike, Luçiano Boçi.

Report Tv mëson se Boçi ka dëmtime në lëkurë dhe është dërguar në QSUT.

Ndërkaq, edhe një militant është shtruar në spital pasi ka qenë i intoksikuar. Gjendja e tij paraqitet e stabilizuar.

Të paktën 25 persona janë shoqëruar nga policia mbrëmjen e sotme pasi dyshohet si ishin ata disa prej militantëve të Sali Berishës që vandalizuan Tiranën dhe sulmuan blutë me molotovë, fishekzjarre dhe gurë.

Fjala e Sali Berishës nga selia e Partisë Demokratike shënoi dhe fundin e protestës së sotme. Si dhe herët e tjera, Berisha ia vuri fajin Policisë së Shtetit duke thënë se është sulmuar selia e partisë.

“Mirënjohjen më të pakufishme ju qytetarëve, burrave dhe grave, të rinjve dhe të rejave që sot më 20 shkurt përsëritët në një formë apo në një tjetër 20 shkurtin e vitit ‘91. Natyrisht në qoftë se shtatorja e satanit ndodhej në piedestalin në sheshin Skënderbej, busti i pasardhësit të tij, busti i gjallë nuk ndodhej as në Shqipëri. Kjo nuk ju pengoi për të dëshmuar vendosmërinë më të madhe. Kjo nuk pengoi ju për tu bërë ballë dhëmbë për dhëmbë, me falanga krimi që përdorën mjetet e paligjshëm kundër kryengritësve paqësore. Projekti tyre, plani i tyre ogurzi për të krijuar gjakderdhje, përsëri sot u shpalos duke qëlluar në ballë kandidaten për deputete Senada Mehmetin. Ju patë të tjerë, u qëlluan pas koke me bombolat e gazit. Ju patë sesi u përdorën bombat tymuese me acid nitrit helmues, bombat shurdhuese vetëm për të akuzuar opozitën. U përdorën ato mjete që përdoren në pozicione luftarake me palë armike. Sot përshkallëzimi i Edi Ramës, kundër opozitës, ka qenë i paprecedentë. Sot kriminelë me unif9ormë kanë hedhur bomba tymuese dhe bombola gazi në territorin e PD. Sot Rama ka ndërmarrë një akt të pashembullt, ka sulmuar selinë e PD si një hakmarrje ndaj kryengritësve paqësore. I jap fjalën e nderit se në rast se guxon të sulmojë këtë seli, selitë e tij gjurmë nuk do t’iu gjejë. I them Ramës, është mundimi i madh për ne të përmbajmë qytetarët dhe sulmet e tre ndaj sulmeve të krimit. Urrejtjen atërore që ke mos e shpreh duke gjuajtur bombat tymi dhe bombola gazi në selinë e PD. Ne jemi kryengritës paqësore, por ne nuk të tolerojmë sulmin ndaj selisë. Hiq dorë nga sulmi në selinë e PD. Jemi të gatshëm nga mëngjesi në mesnatë të përgjigjemi siç e meriton”, tha Berisha.

Militantët e Sali Berishës nuk kursyen as xhaminë e Namazgjasë duke hedhur molotovë ndaj saj ndërsa besimtarët po luteshin. Por, pas këtyre akteve të dhunshme, dhëndri Jamarbër Malltezi dhe besniku tjetër i Berishës, Flamur Noka u shfaqën në xhami për të ‘inspektuar dëmet’.

Akte të tilla dhune janë kryer nga militantët e Berishës edhe në sheshin para Parlamentit dhe në bulevardin para Kryeministrisë.

Gazment Bardhi

Kreu i grupit të PD, Gazment Bardhi akuzon policinë se ka hedhur gaz lotsjellës brenda Xhamisë së Namazgjasë, teksa militantët hodhën molotov.

Bardhi, teksa ka ndarë një reagim në rrjetet sociale, thotë se ky akt i policisë është i rëndë dhe i papranueshëm.

Sipas Bardhit, ky është cenim i hapur i lirisë së besimit dhe një përpjekje brutale për të penguar besimtarët myslimanë të kryejnë ritet e tyre pas iftarit.

“Hedhja e gazit lotsjellës brenda xhamisë, në një moment kur nuk ka asnjë protestues, përbën një akt të rëndë dhe të papranueshëm. Është një cenim i hapur i lirisë së besimit dhe një përpjekje brutale për të penguar besimtarët myslimanë të kryejnë ritet e tyre pas iftarit.

E dënoj me forcën më të madhe këtë veprim, që i ngjan praktikave të një regjimi represiv dhe bie ndesh me çdo standard demokratik. Sot, 35 vite nga rrëzimi i bustit të diktatorit, është e papranueshme që në këtë vend të përdoren metodat diktatoriale të regjimit komunist. Bustin e rrëzuam 3 dekada më parë, prandaj frikën dhe dhunën nuk do t’i lejojmë të ngrihen sërish”, shkruan Bardhi.

Një prej protestuesve në protestën e Berishës është goditur në kokë nga një bombol gazi lotsjellës. Efektivët kanë hedhur gaz për të shpërndarë qytetarët që po kryenin akte dhune drejt policisë në rrugën e Elbasanit. Protestuesi është rrëzuar në tokë dhe më pas është ndihmuar nga persona të tjerë për tu ngritur dhe larguar.

Situatë problematike te xhamia e Namazgjasë, drejt së cilës u hodhën molotovë. Një imam tha për Report Tv se një pjesë e besimtarëve kishin mbetur brenda në xhami, ndërsa në zonë është hedhur edhe shumë gaz lotsjellës.

“Ne nuk merremi me protesta, mundohemi t’i nxjerrim vëllezërit myslimanë pa bërë dëm. Jemi në muajin e Ramazanit, ishalla e kalojmë me sukses. Bëjmë thirrje policisë dhe popullit të mos përzihen në xhami, ne vazhdojmë punën e Namazit. Myslimanëve u urojmë qetësi. Ishim në Namaz, po mundohemi të qetësojmë njerëzit dhe të dalin në qetësi. Një pjesë janë brenda, një pjesë është jashtë, nuk po dinë ku të dalin, po mundohemi t’i orientojmë”, tha imami për Report Tv.

Ndërsa dukej se dhunës dhe vandalizmit të militantëve të Sali Berishës po i vinte fundi në protestën e mbrëmjes së sotme, një numër i lartë fishekzjarresh u shpërthyen drejt policisë, pranë xhamisë së Namazgjasë, në Tiranë. Protesta ka nisur që prej orës 18:30.

Militantët e Sali Berishën kanë hedhur edhe molotovë në drejtim të xhamisë së Namazgjasë. Një besimtare tha për Report Tv se ndalën namazin.

“Të bëjnë ca duan, por jo të paktën këtu te xhamia. Kanë dalë të gjithë, e ndaluan namazin edhe dolën”, tha besimtarja.

Shoqërimi i disa militantëve nga policia

Policia ka shoqëruar disa militantë të PD, në protestën e dhunshme të Sali Berishës. Dy të tjerë u shoqëruan më parë në polici, pasi kishin çanta me molotovë.

Militantët e Berishës kanë hedhur molotvë fare pranë Xhamisë së Manazgjasë, një akt ky i paprecedentë. Molotovët janë hedhur në hyrje të parkimit të xhamisë ndërkohë që brenda po faleshin besimtarë. Ndërkohë aty pranë ishte dhe operatori i Report Tv, i cili menjëherë është futur brenda në garazh për t’i shpëtuar dëmtimeve.

Militantët e Sali Berishës kanë hedhur sërish molotov, shumë pranë Xhamisë së Namazgjasë.

Report TV ka siguruar pamjet nga shpërthimi i molotovit, ku duket se sheshi para Parlamentit duket si i kthyer në një ‘arenë lufte’.

Një person duket se ka mbetur i dëmtuar në protestën e organizuar nga Sali Berisha, në ambientet para Parlamentit.

Report TV ka siguruar pamjet, ku personi në fjalë duket i shtrirë në tokë, duke marrë ndihmën e parë nga të pranishmit.

Ndërkohë ende nuk dihet nëse ai është dëmtuar nga zjarri i molotovëve që hodhën militantët e Berishës, apo nga gazi lotsjellës i hedhur nga Policia.

Dy persona janë shoqëruar nga policia teksa me vete kanë pasur dhe çanta me shishe molotovë brenda.

Policia ka hedhur masivisht gaz lotsjellës në Rrugën e Elbasanit me qëllim shpërndarjen e protestuesve që vijojnë të hedhin molotovë e sende të forta në drejtim të policisë. Siç shihet dhe nga pamjet, ka dhe të mitur që po hedhin gurë në drejtim të efektivëve.

Besimtarët u larguan me vrap nga xhamia e Namazgjasë, pranë Kuvendit, aty ku militantët e Berishës u përballën me forcat e policisë dhe hodhën molotovë. Në ajër kishte ende prani të gazit lotsjellës të përdorur nga policia për të shpërndarë protestuesit.

Sali Berisha pretendon se kandidatja për deputete e Partisë Demokratike për Shkodrën në zgjedhjet parlamentare të 11 majit 2025, Senada Mehmeti, është qëlluar në ballë me plumb gome gjatë protestës, nga Kryeministria

“Kandidaten tone për deputete ne Shkodrës, protestuesen me paqësore këta po tejkalojnë çdo vijë të kuqe dhe i deklaroj që do marrin ndëshkim shembullor”, tha Berisha.

Ndërkohë që vetë Mehmeti u shpreh se ajo po qëndronte paqësisht në momentin që ndodhi ngjarja. Sipas saj, persona të cilët qëndronin në tarracën e Kryeministrisë e kanë qëlluar me plumb gome.

 “Kam qenë pa filluar mbarimi protestës gjatë kohës së Berisha po mbante fjalimin e tij, isha nëj dëgjuese.  Mendoj se ka ardhur nga tarraca e Kryeministrisë, nga andej ka ardhur goditja. Edhe uën pas mjekimit do vazhdoj protestën asgjë nuk na ndal ne”, tha ajo.

Policia ka hedhur gaz lotsjellës te dera e Xhamisë së Namazgjasë, pasi militantët e Berishës, të cilët po kryejnë akte të dhunshme pranë Kuvendit, janë zhvendosur atje.

Kjo ngjarja ka ndodhur teksa besimtarët janë duke falur në Xhami Namazin e Teravisë, i cili në muajin e Ramazanit zgjat 1 orë e 15 minuta.

Deputetët e PD, e militantët po mbrojnë me trup Sali Berishën nga uji që po hidhet nga autobotët. Uji është hedhur për shkak të molotovëve të hedhur në rrugën e Elbasanit. Shumë çadra janë hapur për të mbrojtur Berishën, i cili nuk arriti që të mbante dhe një fjalë tjetër për mediat.

Militantët e Sali Berishës i kanë hedhur molotov autobotit të ujit që ndodhej te Ura e Lanës, për të bërë të mundur shpërndarjen e protestuesve të dhunshëm.

Automjeti është përfshirë nga flakët, por fatmirësisht është bërë e mundur shuarja e zjarrit në kohë.

Ndërsa militantët e Sali Berishës po hidhnin molotovë te Kuvendi, besimtaret nuk e ndërprenë për asnjë moment faljen tek xhamia e Namazgjasë, pak metra larg godinës së parlamentit. Protestuesit po vijonin me aktet e dhunës, ndërsa në sfond dëgjohej edhe hoxha i cili drejtonte lutjen në muajin e shenjtë të Ramazanit.

Pas akteve të dhunës të ushtruara përpara kryeministrisë, tashmë radhën e ka godina e Parlamentit. Militantët e Berishës kanë hedhur molotov në pjesën e përparme të parlamentit ndërsa policia i është përgjigjur me gaz lotsjellës dhe ujë. Molotovët janë hedhur shumë pranë kordonit të policisë, duke rrezikuar seriozisht jetën e tyre.

Militantët e Sali Berishës i kanë vënë zjarrin koshave që ndodhen para godinës së Parlamentit.

Vënia e zjarrit është në vijim të akteve të dhunës nga militantët e PD-së, ku më herët u hodh molotov para godinës së Kryeministrisë.

Fishekzjarre dhe molotovë të paplasur në bulevard

Militantë të PD hodhën fishekzjarrë dhe molotovë drejt godinës së Kryeministrisë, pas mbarimit të fjalimit të kryedemokratit Sali Berisha.

Por pamjet e Report Tv tregojnë se ka pasur dhe fishekzjarrë e molotovë të pashpërthyera, që kanë mbetur në bulevard.

Teksa besimtarët myslimanë po falnin Namazin në Xhaminë e Namazgjasë, kryedemokrati Sali Berisha ka udhëzuar zhvendosjen e protestuesve nga sheshi para godinës së Kryeministrisë, te sheshi para Kuvendit, shumë pranë Xhamisë.

Ndërkohë në momentin që Hoxha po drejtontelutjen, protestuesit kanë hedhur molotov duke e kthyer zonën në një 'arenë lufte'. Në këto momente po falej vakti i Teravisë, që në Ramazan zgjat 1 orë e 15 minuta.

Sali Berisha ndryshe nga herët e tjera, ka hecur në këmbë nga kryeministria drejt godinës së Parlamentit. Për mediat, Berisha tha se Rama do të ndajë të njëjtin fat me Erion Veliajn.

“Planin ndiqeni dhe raportojeni qytetarëve. E patë sesi Tirana ishte si Shqipëria e derdhur, njëlloj si në 20 shkurt të vitit ’91. Rama është i pashpresë, është i përfunduar. Dy janë ata që hedhin ujë dhe gaz: Ilirjan Proda dhe Sokol Bizhga. Dy kriminelë të klasit të lartë që do të ndëshkohen me gjithë forcën e ligjit. Se skenarët ndryshojnë. E pastruam bashkinë nga Veliaj, do pastrojmë Kryeministrinë nga hajduti Rama. Do ndajnë fatin me njëri-tjetrin. Nuk ka gjë në botë që i shpëton. Dhe azil politik që po përpiqen të gjejnë, s’do ta gjejnë. Vrimë miu s’do të gjejnë. Ministria e Infrastrukturës është në Kryeministri. Nëse ka njerëz të lidhur si mishi me thoin, është Rama me Lubinë”, tha Berisha.

Militantët e PD, pas hedhjes së molotovëve drejt godinës së Kryeministrisë, po shkojnë drejt ambienteve të Kuvendit. Ky skenar është parë edhe në protestat e mëparshme.

Ndërkaq, autoboti hodhi ujë për shpërndarjen e protestuesve, ku aty ishte edhe kreu i PD, Sali Berisha.

Pa mbaruar fjalën, militantët e Berishës filluan të lëshonin fishekzjarrët dhe të hidhnin molotovët drejt kryeministrisë. Berisha nuk priti më të tundte flamurin në podium, por zbriti menjëherë dhe vendosi vendosi masën kundërgaz ashtu si dhe deputetët e tjerë të PD.

Kreu i Partisë Demokratike Sali Berisha në fjalimin e mbajtur në protestë, ka krahasuar kryeministrin Edi Rama me diktatorin e Shqipërisë Enver Hoxha.

“Satani i shqiptarëve e Enver Hoxha, siç dihet vdiq në vitin 1985 por e vërteta është se ai diktatura e tij, vazhduan, sundimi në fuqiplotë gjer në ditën që ne shembëm shtatoren e tij kultin makabër të Enver Hoxhës që kishte pushtuar shpirtrat e shqiptarëve. Njëlloj si sot, Rama është një kufomë politike, kalbësirë politike i damkosur, i diskredituar, i tmerruar. Njësoj si shtatorja e Enver Hoxhës, do të mbetet në atë zyrë për sa kohë nuk do ta tërheqim prej saj siç tërhoqëm Hoxhën 35 vite më parë. Diktatura hoxhiste ishte një diktaturë e pashembull në Evropë. Ajo përveç lojës së luftës së klasave me të cilën ekzekutoi mijëra e mijëra shqiptarë për liri, dinjitet, për besimin tek zoti tek shqiptaria, internoi e persekutoi me qindra mijëra. Përdori tiraninë e mjerimin, izolimin indoktrinimin ekstrem. Sot regjimi  i Edi Ramës përsëri ngrihet mbi 3 shtylla turpi, të cilat rrënojnë çdo ditë qenien tonë. Nga Enver Hoxha me varfërinë, mjerimin e urinë kronike, i bëri shqiptarët një popull fantazmë, Rama me politikat e tij, vjedhje e farsën elektorale, me krimin dhe ligjin mburojë, po e shndërron Shqipërinë në dheun e joshqiptarëve, po shkreton kombin dhe vendin. Ngjashmëritë janë tmerrësisht të hidhura. E vërteta është se kurrë ky komb nuk është vjedhur si sot nga qeveritarët e Ramës. Miliarda euro porti i Durrësit në të cilën ai e ndërton Dubain e 1001 netëve të tij. Nëse Enver Hoxha përdori kundër shqiptarëve policinë e Sigurimit të Shtetit, Rama përdor falangat e krimit. Dhe prapra diellit të shkojnë, do t’i gjejmë dhe do t’i ndëshkojmë me forcën e ligjit. Shqipëria e lirë, do shpallë vjedhjen e qytetarë krim të rëndë”, tha Berisha.

Kryetari i Partisë Demokratike, Sali Berisha, është shprehur se PD është opozita e vërtetë, pasi është ngritur sipas tij, si feniksi nga hiri. 

Më pas Berisha në fjalën e tij, duke thënë se 'do shpëtojmë Shqipërinë', duket se u ka dhënë një mesazh grupit të molotovit, të cilët kanë nisur menjëherë hedhjen e tyre në drejtim të Kryeministrisë.

“Kanë filluar të ikin minjtë, drejtora, etj. Braktisin Shqipërinë me shpresë se do të shpëtojnë. As ju, as Lubia dhe as Edi Rama vrimë miu nuk do të gjeni.

Miq, në 1991, pak muaj pas themelimit dhe me të drejtë të gjithë ata që na shikonin shtonin pyetjen kur shihnin shtatoren e diktatorit aty, thoshin janë apo nuk janë opozitë këta. Por një ditë, ne ju faktuam atyre që ishim opozitë dhe u përballëm me diktatorën më të egër dhe e shembëm atë. Sot mendjet dhe sytë e shqiptarëve janë të drejtuara vetëm te ne. Nëse 35 vite më parë me të drejtë pyesnin janë apo nuk janë opozitë këta, sot pasi u ngritëm si feniksi nga hiri, nuk e bën më njeri këtë pyetje. Jemi opozita e vërtetë dhe do shpëtojmë Shqipërisë”, tha Berisha.

Gjatë fjalimit standard të Sali Berishës, militantët e tij hodhën molotovë dhe fishekzjarre drejt Kryeministrisë, duke rrezikuar seriozisht jo vetëm jetën e qindra efektivëve të policisë, por edhe të vetë demokratëve të pranishëm në protestë.

Pavarësisht se kryeministri Edi Rama ishte dje në Uashington teksa mori pjesë në mbledhjen e parë konstituuese të Bordit të Paqes, përsëri duket se demokratët nuk e pranojnë dot faktin që narrativa e tyre për marrëdhënie të prishura Rama-SHBA, nuk ekziston. Numri i flamujve amerikanë në protestën e sotme është rritur më shumë se ato në herët e kaluara.

Mes folësve në protestën e Partisë Demokratike, ishte dhe i riu Alessandro Xhufi, i cili u shpreh i zhgënjyer me qeverisjen e kryeministrit Edi Rama, dhe qëndrimin e gjatë të këtij të fundit në pushtet.

“Kur unë fillova shkollën fillore, Edi Rama ishte kryeministër, kur vazhdova gjimnazin, ky prap ishte ishte kryeministër, dhe tani që jam në universitet, ky prap është kryeministër. Tani vetëm në dasëm ta kam se është bëra qeshara kjo punë. Një fëmijë rritet, një brez plaket, një vend vdes, ama pushteti nuk ndryshon në këtë vend. PD-ja ka qenë për herë të fundit në pushtet kur unë isha në pushtet, dhe këta ju thonë fajin e ka PD-ja, fajin e ka Saliu. O popull, o njerëz, po këta jo vetëm që ju vjedhin, por ju shajnë, ju dhunojnë dhe çdo ditë ju poshtërojnë”,- tha Xhufi.

Në protestën në të cilën mblodhi vetëm një grusht militantësh, Sali Berisha u ndal edhe tek 35-vjetori i rrëzimit të bustit të diktatorit Enver Hoxha. Berisha tha se ajo ditë është frymëzim për ta, ndonëse në shesh ka mbledhur vetëm një grusht militantësh, duke shtuar se kryeministri Edi Rama i ka ditët e numëruara.

“20 shkurti është dita kur qindra mijëra të rinj nisen drejt sheshi skënderbej të rrethuar nga të katërt anët me autoblindë, mitraloza, snajper në një betejë e cila shënon kulmin e guximit të qytetarëve shqiptarë. Në një betejë paqësore që ka dhëndrit dhe do shndrisë gjithmonë në historinë e revolucionit demokratik, në të cilën përmbysën shtatoren, kultin e Enver Hoxhës, Hitlerit shqiptar të pas luftës, përmbysën regjimin i cili në 46 vite persekutoi, burgosi, ekzekutoi, varfëroi, më shumë shqiptare se çdo pushtues tjetër që ata kishin njohur në tërë historinë e tyre. Ata kurrë s’do ta mendonin se 35 vite me vonë do ndodheshin para një regjimi, shumë të ngjashëm në shumë aspekte, nuk mund të besonin se 35 vite më vonë pushtetet e vendit do ishin në duart e një krimineli. Pushtetet e vendit do ishin në duart e një tradhtari që do nxijë gjithmonë historinë kombëtare për aktet e tij të tradhtisë ndaj kombit dhe vendit. E vërteta është se ne sot nderojmë këtë datë me ndjenjën e mirënjohjes, por edhe me frymëzim më të madh, me zotimin para shqiptarëve se Rama do t’i këtë kohërat e numëruara”, tha Berisha.

Deputetja demokrate, Jorida Tabaku

Deputetja e PD, Jorida Tabaku thotë se sot në Shqipëri, të korruptuarit bëjnë ligje për të mbrojtur njëri-tjetrin.

Ajo u shpreh se forcat opozitare duhet të bashkohen dhe t'i lënë ndasitë.

Sipas Tabakut, keqqeverisja e Edi Ramës ka larguar shqiptarët nga vendi.

"Në 20 shkurt u rrëzua monumenti i një njeriu që kishte menduar se ishte i përjetshëm. 35 vite më pas, jemi në shesh, jemi përballë një autokrati të rilindur. Sistemi i dikurshëm i dhunës është zëvendësuar me dhunën e korrupsionit, me diktaturën e korrupsionit. Pasojat e dhunës dhe korrupsionit janë dramatike. Sot Shqipëria është republikë ku të korruptuarit bëjnë ligje për të mbrojtur njëri-tjetrin. Kjo është ajo që Edi Rama ka ndërtuar. Një sistem dhe regjim që po largon shqiptarët. Për herë të parë në 35 vite, Shqipëria sot nuk prodhon më, ky sistem ka vrarë meritokracinë. Në sistemet autokratike, ekonomia është e para që falimenton. Kjo është beteja jonë, kjo nuk është betejë partiake, por për thelbin e Republikës, për Shqipërinë e qytetarëve, jo të klientëve, për drejtësinë e barabartë. Në këtë përvjetor duhet të jemi më të fortë se kurrë. Brenda forcave opozitare ka pasur gjëra që na kanë ndarë, debate e qasje të ndryshme, por sot duhet ta shohim njëri-tjetrin duke thënë se ato që na ndajnë nuk janë më të mëdha se ato që na bashkojnë. Nuk ka rrugë tjetër për të ndalur shpopullimin, nuk ka rrugë tjetër për të shpëtuar Shqipërinë. Sot na duhet guxim, besim e bashkim. Vetëm bashkë e kthejmë lirinë. Autokratët bien, por Shqipëria është e përjetshme", theksoi ajo.

Ish-deputeti i Partisë Demokratike, Ervin Salianji i është bashkuar protestës së organizuar nga Partia Demokratike para godinës së Kryeministrisë.

Nga pamjet e siguruara nga Report TV, Salianji shihet tejet i distancuar nga kryedemokrati Sali Berisha dhe nga kupola drejtuese e PD-së dhe nën shoqërinë e disa të rinjve.

Kujtojmë se Salianji ka marrë pjesë në të gjitha protestat Kombatare të thirrura nga PD, pavarësisht se linja e tij politike nuk përputhet me atë të Berishës.

Grupi i Adriatik Lapajt, të cilët qëndrojnë poshtë kryeministrisë 24 orë që prej 8 dhjetorit, janë spostuar në krahun tjetër të bulevardit duke i liruar vendin Partisë Demokratike.

Ermal Hasimja, i cili prej disa javësh po kryen e rolin e "shkesit" politik, duke tentuar të bashkojë në llogore të vetme të gjitha partitë opozitare, foli në protestën mbrëmjes së sotme të Partisë Demokratike.

Ndërkohë që Sali Berishën e kishte përballë, Hasimja u bëri thirrje qytetarëve, që ndër shumë arsye të tjera, të protestojnë edhe për mbrojtjen e prokurorëve të SPAK dhe gjyqtarëve të GJKKO, të cilët po godasin korrupsion në nivele të larta, si dhe atë të kryer nga ish-zyrtarë të lartë të shtetit, përfshirë vetë krydemokratin.

"Njerëz të lirë të këtij vendi, njerëz të ndershëm dhe sidomos ju intelektualë, asnjë ndryshim nuk ka ardhur ndonjëherë nga kafeneja dhe divanate e rehatshme të shtëpive. Nëse mendoni se politika është e pisët, keni të drejtë, atë e mendoj unë, është sepse të ndershmit largohen dhe u hapin rrugë të pandershmëve. Vendi më i sigurt për një anije është porti, por anijet nuk janë bërë për të qëndruar në port. Nëse nuk ju pëlqejnë partitë që janë, krijoni partitë tuaja. Bashkohuni me ne që të kërkojmë kushtin minimal të demokracisë, zgjedhje të lira dhe të ndershme. Bashkohuni me ne për të mbrojtur ata gjykatës dhe prokurorë të ndershëm që i nxorën bojën këtij sistemi të kalbur",- tha Hasimja.

Shkëlzen Berisha është shfaqur sërish në protestën e Partisë Demokratike. Ai iu bashkua militantëve të të atit në sheshin para bulevardit, ndërsa siç shihet edhe në këtë video që sjell Report Tv, ai qëndron krah deputetit dhe ish-prokurorit Arjan Ndoja. Ky i fundit, i shkarkuar nga drejtësia për lidhje me krimin. 

Nuk mund të mungonte as në këtë protestë ‘grupi i zjarrit’ “i rekrutuar” nga Partia Demokratike. Të rinj të maskuar me kapuça e duke përdorur çadrat për tu mos ekspozuar përpara kamerave, janë shoqëruesit e Berishës gjatë mbërritjes së tij përpara kryeministrisë. Pjesë e tyre është dhe deputeti Gjin Gjoni. Në krahë gjithashtu kanë dhe çantat ku siç ka rezultuar dhe më parë, janë të mbushura me shishe molotov që hidhen drejt godinave të shtetit e akoma më keq drejt efektivëve të policisë.

Ndonëse ora 18:00 kishte kaluar, sheshi përpara kryeministrisë ishte thuajse bosh.

Në mungesë të protestuesve dhe të organizatorëve, në podium u ngjit dikush me daulle dhe performoi deri në mbledhjen e militantëve të Sali Berishës.

Report Tv sjell pamjet me dron nga protesta e 3-të e organizuar nga Partia Demokratike. Siç shihet, militantët e Berishës nga protesta në protestë sa vijnë dhe pakësohen në numër. Në pamje dallohet se numri i tyre është më i ulët se në protestën e 10 shkurtit. Ashtu si dhe herët e kaluara, protestat nuk kanë prodhuar asgjë tjetër përveç dhunës.

Kryetari i Partisë Demokratike Sali Berisha ka dalë nga selia blu për tu drejtuar nga bulevardi “Dëshmorët e Kombit” për të çelur protestën e 3-të për këtë vit. Berisha shoqërohet nga besnikët e tij, Flamur Noka e Luçiano Boçi dhe nga militantët.

Disa demokratë janë shfaqur në selinë e PD-së para protestës me bluza në të cilat është stampuar imazhi i kryetarit të Bashkisë Kavajë, Fisnik Qosja.

Duket se Qosja i përfaqëson më shumë këta demokratë, edhe se vetë lideri i PD-së, Sali Berisha, i cili edhe ka thirrur këtë protestë.

Kujtojmë se Qosja u mbështet në garën për Bashkinë e Kavajës, ku edhe fitoi, nga ish-deputeti Ervin Salianji.